Milli Televiziya və Radio Şurasının yaradılmasının 10-cu ildönümü ilə bağlı hesabat konfransı keçirilmişdir

Oktyabrın 3-də Milli Televiziya və Radio Şurasının (MTRŞ) yaradılmasının 10-cu ildönümü ilə bağlı hesabat konfransı keçirilmişdir.

AzərTAc xəbər verir ki, tədbir iştirakçıları əvvəlcə Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə gül dəstələri qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üzərinə tər çiçəklər düzülmüşdür.

Şəhidlər xiyabanına gələn qonaqlar Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad etmiş, məzarları üzərinə gül düzmüşlər.

Tədbir Milli Televiziya və Radio Şurasında davam etdirilmişdir. Şuranın sədri Nuşirəvan Məhərrəmli teleradio sahəsində görülmüş işlər və gələcək planlar barədə məlumat vermişdir. Qeyd olunmuşdur ki, bu illərdə ölkədə fəaliyyət göstərən ümumrespublika yayımçısı olan telekanalların sayı 9-a, regional yayımçıların sayı 14-ə, radio yayımçılarının sayı 14-ə, kabel şəbəkəsi yayımçılarının sayı isə 13-ə çatdırılmışdır.

N.Məhərrəmli bildirmişdir ki, ölkədə bütün telekanallarda filmlərin yalnız Azərbaycan dilində səsləndirilməsinin təmin olunması barədə qərarlar qəbul edilmişdir. Bundan əlavə, milli-mənəvi dəyərlərin qorunmasına ardıcıl əməl edilmiş, milli teleserialların istehsalının stimullaşdırılması məqsədi ilə ölkədə yayımlanan bütün əcnəbi teleserialların yayımlanması dayandırılmışdır.

Prezident Administrasiyasının İctimai-siyasi məsələlər şöbəsinin müdir müavini Ərəstun Mehdiyev MTRŞ-ın 10 illik fəaliyyətini yüksək qiymətləndirmişdir. Bildirilmişdir ki, Şura "Televiziya və radio yayımı haqqında" Azərbaycan Respublikası Qanununun tətbiq edilməsi barədə dövlət başçısının 2002-ci il 5 oktyabr tarixli fərmanı ilə yaradılmışdır. Yarandığı dövrdən bugünədək MTRŞ qanunvericiliklə ona verilmiş səlahiyyətlər daxilində öz fəaliyyətini qurmuş, televiziya və radio yayımlarının fəaliyyətini tənzimləmiş, yayım zamanı ictimaiyyətin maraqlarını qorumuş, televiziya və radio yayımı sahəsində qanunvericiliyin icrasına nəzarəti həyata keçirmiş, beynəlxalq sahədə bir sıra teleradio qurumları ilə əməkdaşlıq etmişdir. Şura bu müddət ərzində öz işini göstərə bilmiş, cəmiyyət tərəfindən qəbul olunmuş, qiymətləndirilmişdir.

Ə.Mehdiyev "Azərbaycan Respublikası Milli Televiziya və Radio Şurasının üzvlərinə fəxri adların verilməsi haqqında" və "Azərbaycan Respublikası Milli Televiziya və Radio Şurası əməkdaşlarının "Tərəqqi" medalı ilə təltif edilməsi haqqında" Azərbaycan Respublikası Prezidentinin sərəncamlarını oxumuşdur.

Tədbirdə çıxış edən Mətbuat Şurasının sədri Əflatun Amaşov, Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli Azərbaycanda televiziyanın və radionun sürətlə inkişaf etdiyini bildirmiş, bu yayım sahəsinin cəmiyyətdə, dövlətin həyatının bütün sahələrində öz yerini tutduğunu qeyd etmişlər.

Bildirilmişdir ki, MTRŞ bütövlükdə teleradio məkanında cəmiyyətimizin, ictimaiyyətin maraqlarının qorunması sahəsində mühüm tədbirlər həyata keçirilmişdir. Şuranın üzvləri onların qarşısına qoyulmuş vəzifələrin öhdəsindən layiqincə gəlmişlər. Sonda jurnalistləri maraqlandıran suallar cavablandırılmışdır.

Azərbaycan.-2012.- 4 oktyabr.- S.2.