BSU-da tanınmış rus yazıçısı ilə görüş keçirilmişdir

Oktyabrın 4-də işə başlayacaq Beynəlxalq Humanitar Forumda iştirak etmək üçün Bakıya gəlmiş tanınmış rus yazıçısı Vladimir Nikolayeviç Voynoviç Bakı Slavyan Universitetinin (BSU) tələbə və müəllimləri ilə görüşmüşdür.

AzərTAc xəbər verir ki, görüşdə çıxış edən BSU-un rektoru, professor Kamal Abdullayev forumun əhəmiyyətindən danışmışdır.

Qeyd olunmuşdur ki, forumda iştirak edən qonaqların Azərbaycanın tarixi, mədəniyyəti, o cümlədən ədəbiyyatı ilə yaxından tanış olmaq imkanları vardır. Forum eyni zamanda Azərbaycan ictimaiyyətinin rus nəsrinin nümayəndələri ilə tanış olması baxımından da əhəmiyyətlidir.

Sonra K.Abdullayev nəinki Rusiyada, eləcə də Avropa və Amerikada da sevilən yazıçı V.N.Voynoviçi görüş iştirakçılarına təqdim edərək onun həyat və yaradıcılığından danışmışdır.

V.N.Voynoviç Bakıya gəlməsindən məmnunluğunu bildirmiş, gənclərlə görüşünə böyük əhəmiyyət verdiyini və bu cür görüşlərin yaradıcılığına müsbət təsir göstərdiyini demişdir.

Rus və Azərbaycan xalqlarının uzun illər boyu birlikdə yaşadıqlarını vurğulayan yazıçı qeyd etmişdir ki, tarixən ədəbiyyat nümayəndələri iki xalq arasındakı münasibətlərin yaxınlaşmasında mühüm rol oynamışlar. Bundan sonra da yazıçılar, şairlər və ədəbi tənqidçilər münasibətlərin inkişafına böyük töhfələr verəcəklər.

Gənclərlə görüşə üstünlük verməsinin səbəbindən danışan tanınmış yazıçı diqqətə çatdırmışdır ki, o, bu görüşlərdə gənc nəslin fikirlərini və düşüncələrini öyrənərək yaradıcılığında istifadə edir. Yeni əsərlər yaratmaq üçün gənclərin fikirlərini bilmək olduqca vacibdir. Ona görə ki, xalqlar arasındakı münasibətləri gələcəkdə bugünkü gənclik davam etdirməli olacaqdır.

Sonra V.N.Voynoviç tələbələri maraqlandıran sualları cavablandırmışdır.

Sonda tanınmış yazıçı yeni çapdan çıxmış "Böyüklər üçün nağıllar" kitabının bir neçə nüsxəsini BSU-nun kitabxanasına hədiyyə etmişdir.

Azərbaycan.-2012.- 4 oktyabr.- S.7.