Yunanıstanın tanınmış ictimai-siyasi xadimi Azərbaycan Diplomatik Akademiyasında mühazirə oxumuşdur

Beynəlxalq Humanitar Forumda iştirak etmək üçün Bakıya gəlmiş Yunanıstanın sabiq informasiya texnologiyaları naziri, parlamentin sabiq üzvü, tanınmış ictimai-siyasi xadim Andreas Andrianopoulos oktyabrın 4-də Azərbaycan Diplomatik Akademiyasında (ADA) "Beynəlxalq münasibətlərdə qlobal risklər və çətinliklər" mövzusunda mühazirə oxumuşdur.

A.Andrianopoulos Bakıda keçirilən Beynəlxalq Humanitar Forumun əhəmiyyətini qeyd etmiş, forumun dünyada beynəlxalq humanitar əməkdaşlığın inkişafına töhfə verəcəyini bildirmişdir.

Azərbaycan iqtisadiyyatının dünya iqtisadiyyatının tərkib hissəsinə çevrildiyini və ölkənin istənilən geosiyasi risklərə dayanıqlı olduğunu xüsusi vurğulamışdır. Qeyd olunmuşdur ki, dünyada böyük problemlər yaratmış iqtisadi böhran Azərbaycana çox az təsir etmiş, digər ölkələr isə bu böhrandan ciddi zərər çəkmişlər.

A.Andrianopoulos bildirmişdir ki, enerji sektoru Azərbaycan iqtisadiyyatının aparıcı sahəsidir. Azərbaycan Cənubi Qafqazda ən güclü dövlətdir. Azərbaycan Qərbin mühüm qaz ixracatçısına və qlobal enerji təhlükəsizliyinin təminatçılarından birinə çevrilmişdir. Eyni zamanda Azərbaycan xarici siyasət sahəsində də böyük uğurlara nail olmuşdur.

Ölkədə həyata keçirilən dövlət proqramları və islahatlar çərçivəsində təhsilin bütün sahələrinin inkişaf etdiyini deyən A.Andrianopoulos bu istiqamətdə ADA-nın fəaliyyətini yüksək qiymətləndirmişdir.

Sonda A.Andrianopoulos tələbələri maraqlandıran sualları cavablandırmışdır.

AzərTAc

Azərbaycan.-2012.- 5 oktyabr.- S.6.