Avropa Parlamentinin qəbul etdiyi qətnamənin heç bir hüquqi qüvvəsi yoxdur

Rəşidə DATİ: "Azərbaycan çoxmədəniyyətliliyin inkişafı baxımından bir çox Avropa ölkələrinə nümunə ola bilər"

Bakı Beynəlxalq Humanitar Forumunda iştirak etmək üçün ölkəmizdə səfərdə olan Avropa Parlamentinin üzvü, Paris şəhərinin 7-ci ərazisinin meri Rəşidə Dati oktyabrın 5-də Milli Məclisdə mətbuat konfransı keçirib.

Avropa Parlamentinin üzvü Rəşidə Dati bildirib ki, Beynəlxalq Humanitar Forumun Bakıda keçirilməsi onun əhəmiyyətini daha da artırır. Çünki Bakı müxtəlif mədəniyyətlərin, qədimliklə müasirliyin qovuşduğu bir məkandır. O, diqqətə çatdırıb ki, Azərbaycan Prezidenti İlham Əliyevin təşəbbüsü ilə keçirilən bu forum Azərbaycanda çoxmədəniyyətliliyə göstərilən yüksək diqqətin bariz nümunəsidir. Qonaq bu beynəlxalq tədbirin bir çox məsələlərin müzakirə edilməsi və onların həlli yollarının tapılması istiqamətində mühüm əhəmiyyətə malik olduğunu nəzərə çatdırıb. Rəşidə Dati Azərbaycanda müxtəlif dinlərin və xalqların nümayəndələrinin qarşılıqlı hörmət və anlayış şəraitində bir arada yaşadığını yüksək qiymətləndirib: "Azərbaycanda çoxmədəniyyətlilik birləşdirmə rolunu oynayır. Azərbaycan çoxmədəniyyətliliyin inkişafı baxımından bir çox Avropa ölkələrinə nümunə ola bilər. Azərbaycanda çoxmədəniyyətlilik cəmiyyətin birliyini təmin etdiyi halda bir sıra Qərb ölkələrində isə çoxmədəniyyətlilik bölgüyə gətirib çıxarır. Azərbaycanda çoxmədəniyyətliliyin stimullaşdırılması və inkişafı Avropa və digər ölkələr üçün nümunə ola bilər".

Azərbaycanla Avropa İttifaqı arasında münasibətlərə toxunan qonaq onun daha da inkişaf etdirilməsinin zəruriliyini vurğulayaraq bu təşkilat tərəfindən ölkəmizə qarşı qəbul edilmiş qətnamənin hüquqi çərçivədən kənar olduğunu xüsusi qeyd edib. O bildirib ki, bu qətnamənin heç bir hüquqi qüvvəsi yoxdur və bəyannamə xarakteri daşıyır.

Rəşidə Dati onu da vurğulayıb ki, şəxsən özü Avropa Parlamentində Dağlıq Qarabağ məsələsi üzrə müzakirə təşkil etmək fikrindədir. Onun sözlərinə görə, Avropa Parlamentinin növbəti sessiyalarında bu məsələ qaldırılacaq və bununla bağlı qurumun rəhbərliyinə rəsmi müraciət ediləcək: "Mən və digər deputatlar bu məsələnin qaldırılması istiqamətində birgə işlər görəcəyik. Bu müzakirələri təşkil etməkdə əsas məqsədimiz Dağlıq Qarabağ münaqişəsinə qaçqın və məcburi köçkünlərə, Azərbaycanın mövqeyinə diqqəti yönəltmək olacaq".

Bu günlərdə Prezident İlham Əliyevin Fransaya səfəri çərçivəsində Parisdə Azərbaycan Mədəniyyət Mərkəzinin açılmasından danışan Rəşidə Dati bu mərkəzin Azərbaycanın təkcə neft-qaz ölkəsi deyil, həm də zəngin tarixə, mədəniyyətə malik və uğurlu siyasət yürüdən ölkə olduğunu nümayiş etdirmək üçün mühüm əhəmiyyət daşıdığını qeyd edib. Qonaq Fransa-Azərbaycan münasibətlərinin həmişə yaxşı olduğunu və bundan sonra da yaxşı olacağına əminliyini bildirib.

Rəşad BAXŞƏLİYEV

Azərbaycan.-2012.- 6 oktyabr.- S.2.