Naxçıvan Bakı Beynəlxalq Humanitar Forumunun iştirakçılarını valeh etdi

Bakı Beynəlxalq Humanitar Forumunun iştirakçılarından 35 ölkəni təmsil edən 83 nəfərlik nümayəndə heyəti dünən Naxçıvan Muxtar Respublikasına səfər etmişdir. Qonaqlar əvvəlcə ümummilli lider Heydər Əliyevin Naxçıvan şəhərindəki büstünü ziyarət etmiş, Heydər Əliyev Muzeyində olmuşlar.

Daha sonra nümayəndə heyətinin üzvləri Naxçıvan Xalça muzeyi, Açıq səma altında muzey, Xan Sarayı tarixi-memarlıq kompleksi, Şərqin möhtəşəm memarlıq abidəsi Möminə Xatun türbəsi, Heydər Əliyev Sarayı ilə tanış olmuşlar. Nuh Peyğəmbərin məzarüstü türbəsi qonaqları bu torpağın qədimliyi ilə heyrətləndirmişdir.

Forum iştirakçıları Naxçıvan Dövlət Tarix Muzeyi və Hüseyn Cavidin ev-muzeyində olmuşlar. Naxçıvan şəhəri ilə tanışlıqdan xeyli məmnun görünən qonaqlar Duzdağ Fizioterapiya Mərkəzini təbiətin möcüzəsi sayıblar.

Forumun iştirakçıları bu gün Naxçıvan Muxtar Respublikası ilə tanışlıqlarını davam etdirəcəklər. Qonaqlar qədim milli memarlığı, yaşı əsirlərlə ölçülən xan çinarları və kəhrizləri ilə məşhur olan Ordubad rayonunu gəzəcək, Quranda adı çəkilən Əshabi-Kəhf ziyarətgahı və Badamlı mineral sular zavodu ilə tanış olacaqlar. Qonaqların şərəfinə Naxçıvan Dövlət Musiqili Dram Teatrında konsert veriləcək və günün sonunda nümayəndə heyəti Bakıya qayıdacaq.

Elxan MƏMMƏDOV

Azərbaycan.-2012.- 7 oktyabr.- S.4.