İkinci Bakı Beynəlxalq Humanitar Forumunun iştirakçıları Gəncədə keçirilən Beynəlxalq şərab festivalının açılışında iştirak etmişlər

İkinci Bakı Beynəlxalq Humanitar Forumunun və I Beynəlxalq şərab festivalının iştirakçıları oktyabrın 6-da Gəncədə böyük mehribanlıqla qarşılanmışlar.

AzərTAc xəbər verir ki, qonaqlar əvvəlcə dünya şöhrətli siyasi xadim, ümummilli lider Heydər Əliyevin abidəsini ziyarət etmiş, önünə gül dəstələri qoymuşlar. Sonra dahi Azərbaycan şairi Nizami Gəncəvinin məqbərəsi ziyarət edilmiş, məzarı üzərinə güllər düzülmüşdür. Şairin həyat və fəaliyyəti barədə qonaqlara ətraflı məlumat verilmişdir. Məqbərə ətrafında gəzintidən sonra qonaqlar xatirə kitabına ürək sözlərini yazmışlar.

Sonra Gəncə Şəhər İcra Hakimiyyətində "dəyirmi masa" keçirilmişdir. Şəhər icra hakimiyyətinin başçısı Elmar Vəliyev qonaqları qədim Nizami yurdunda salamlamış və qeyd etmişdir ki, bu gün bütün Azərbaycanda olduğu kimi, Gəncə də öz simasını dəyişir. Dövlət başçısının diqqət və qayğısı sayəsində şəhərin qədimliyi qorunub saxlanmaqla onun müasirləşməsi istiqamətində sürətli işlər aparılır. Bu gün yeniləşən Azərbaycanın nəinki paytaxtında, eləcə də regionlarında genişmiqyaslı yenidənqurma işləri görülür. İndi müstəqil Azərbaycan ən mötəbər tədbirlərin mərkəzinə çevrilmişdir. Bakıda keçirilən İkinci Beynəlxalq Humanitar Forum, Gəncədə keçirilən Beynəlxalq şərab festivalı buna əyani sübutdur.

Görüşdə Fransanın Yon vilayətinin ali şurasının prezidenti Andre Villiers, Fransanın Azərbaycandakı səfiri Paskal Mönye, Azərbaycanın Fransadakı səfiri Elçin Əmirbəyov, Paris şəhərinin 7-ci rayonunun meri, Avropa Parlamentinin deputatı xanım Rəşidə Dati, Fransanın Koqnak şəhərinin meri Mişel Qurinşa, Beynəlxalq Üzümçülük və Şərabçılıq Təşkilatının baş direktoru Federiko Kastelluci və başqaları çıxış edərək Azərbaycan-Fransa əlaqələrinin genişləndirilməsində belə görüşlərin əhəmiyyətini vurğulamış və bu ilin may ayında Fransada keçirilən Beynəlxalq şərab festivalını xatırlatmışlar. Bildirilmişdir ki, Azərbaycan Fransa üçün əhəmiyyətli ölkədir və o, təkcə enerji resursları ilə deyil, həm də digər sahələrdə də əməkdaşlıq üçün əlverişli tərəfdaşdır.

Görüşdə şəhər icra hakimiyyəti adından qonaqlara Nizami Gəncəvinin 870 illik yubileyi ilə əlaqədar hazırlanmış xatirə hədiyyələri təqdim olunduqdan sonra onlar şəhərlə tanışlıq məqsədilə gəzintiyə çıxmışlar. Qonaqlar Heydər Əliyev meydanında, Şah Abbas məscidində, Çökək hamamda, Cavad xan türbəsində olmuş, əsaslı şəkildə aparılan yenidənqurmadan sonra istifadəyə verilmiş Cavad xan küçəsində dahi Azərbaycan şairi Nizami Gəncəvinin əsərlərinin motivləri əsasında Gəncə Dövlət Dram Teatrı aktyorlarının hazırladıqları ədəbi-bədii kompozisiyaya baxmış, burada qədim el sənətkarlarının əl işləri ilə tanış olmuşlar.

Şəhərlə tanışlıqdan razı qalan qonaqlar sonra I Azərbaycan beynəlxalq şərab festivalının açılışında iştirak etmişlər. Açılış mərasimində qonaqlara Azərbaycanın mədəni dəyərləri, milli musiqisi, milli mətbəx nümunələri, eləcə də rəsm əsərlərindən ibarət sərgi təqdim olunmuşdur.

Festivalı giriş sözü ilə açan Gəncə Şəhər İcra Hakimiyyətinin başçısı Elmar Vəliyev qonaqları və şəhər ictimaiyyətinin nümayəndələrini əlamətdar hadisə ilə əlaqədar təbrik etmiş, bu mötəbər festivalın iştirakçılarına uğurlar arzulamışdır. Bildirilmişdir ki, oktyabr ayı gəncəlilər üçün əlamətdar aydır. Bu ayda dahi söz ustası Nizami Gəncəvinin yubileyi qeyd edilir. Bugünkü festivalın açılışı da məhz belə bir dövrə təsadüf etmişdir.

Sonra kənd təsərrüfatı nazirinin müavini Aslan Aslanov, iqtisadi inkişaf nazirinin müavini Niyazi Səfərov çıxış edərək müstəqilliyə qovuşduqdan sonra Azərbaycanın Avropaya inteqrasiyası istiqamətində həyata keçirilən işlərdən, respublikada üzümçülüyün, eləcə də şərabçılığın inkişaf etdirilməsi üçün görülən işləri diqqətə çatdırmışlar. Natiqlər qeyd etmişlər ki, "2012-2020-ci illərdə üzümçülüyün inkişafına dair Dövlət Proqramı"nın icrası üzümçülüyün və şərabçılığın inkişaf etdirilməsinə, eləcə də ixracat potensialının artırılmasına əlverişli şərait yaratmaqla yanaşı, şərabçılığın stimullaşdırılmasına geniş imkanlar açacaqdır.

Fransanın Yon vilayətinin ali şurasının prezidenti Andre Villiersin çıxışı mərasim iştirakçılarında xoş ovqat yaratmışdır. Qonaq demişdir ki, mən Azərbaycana gələnə kimi elə bilirdim ki, şərabın vətəni Fransadır. Lakin Azərbaycana ilk səfərimdə gördüm ki, fikrimdə yanılmışam. Şərabın əsl vətəni elə Azərbaycandır. Bundan sonra bu qədim diyara bir neçə dəfə səfər etdim və hər gəlişimdə xalqınızdan xoş münasibət gördüm və yəqin etdim ki, azərbaycanlılar həm də dünyada ən mehriban və insanpərvər xalqdır.

Sonra İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO), Gəncə Şəhər İcra Hakimiyyətinin təşkilatçılığı ilə keçirilən I Beynəlxalq şərab festivalının açılışı olmuşdur. Mərasim iştirakçıları nəfis şəkildə hazırlanmış ayrı-ayrı pavilyonlarda nümayiş etdirilən şərab nümunələrindən dekustasiya etmiş, arzu və təkliflərini bildirmişlər.

Oktyabrın 7-də "RAMADA Plaza" otelində yerli və xarici şərab istehsalçılarının iştirakı ilə "Üzümçülük və şərabçılığın inkişafı perspektivləri: qabaqcıl təcrübə və texnologiyalardan istifadə imkanları" mövzusunda beynəlxalq elmi-praktik konfrans keçiriləcəkdir.

Azərbaycan.-2012.- 7 oktyabr.- S.6.