ATƏT PA-nın payız sessiyasında ermənilərə layiqli cavab verilmişdir

Oktyabrın 6-da ATƏT Parlament Assambleyasının payız sessiyası öz işini "Müvafiq idarəetmənin təşviqində KİV-lərin rolu" mövzusunun müzakirəsi ilə davam etdirmişdir.

İclasa sədrlik edən ATƏT PA sədrinin müavini xanım Uta Tsapf ATƏT tərəfindən qəbul olunmuş sənədlərdə mətbuat, informasiya, fikir azadlığı, jurnalistlərin təhlükəsizliyi ilə bağlı müddəaların əksini tapdığını bildirmişdir.

Sonra Albaniya parlamentinin üzvü, Təhsil və kütləvi informasiya vasitələri üzrə parlament komissiyası sədrinin müavini Mark Marku, "Transperansy İnterneşnl" təşkilatının Albaniya üzrə icraçı direktoru Lutfi Dervişi və ATƏT-in Skopyedəki missiyasının rəhbəri Ralf Bretin məruzələri dinlənilmişdir.

Qırğızıstan, Albaniya, Niderland, Fransa, Latviya, Ermənistan, İtaliya, İrlandiya və digər ölkələrin nümayəndə heyətlərinin üzvləri müasir dövrdə informasiya texnologiyalarının yayılmasının müsbət və mənfi təsirlərindən danışmışlar.

Müzakirələr zamanı Ermənistan nümayəndə heyətinin rəhbəri Artaşes Qeqamyan yenə də Azərbaycanı Xocalı sakinlərini qətlə yetirməkdə və Ramil Səfərovu əfv edərək qəhrəman kimi qələmə verməkdə günahlandırmışdır.

Azərbaycan parlament nümayəndə heyəti bu dəfə də ermənistanlı deputatların layiqli cavabını vermiş, onların təxribatlarının qarşısını almışlar.

ATƏT PA-da Azərbaycan nümayəndə heyətinin üzvü Azay Quliyev çıxış edərək Xocalı soyqırımının Ermənistan silahlı birləşmələri tərəfindən törədildiyini konkret faktlarla iclas iştirakçılarının diqqətinə çatdırmış, Ermənistan prezidenti Serj Sarkisyanın Xocalı soyqırımının ermənilər tərəfindən törədildiyini etiraf etməsi faktını xüsusi qeyd etmişdir.

Sonra A.Quliyev Azərbaycan ordusunun zabiti Ramil Səfərovun verilməsi və əfv olunması ilə əlaqədar məsələyə də aydınlıq gətirmişdir. Bildirilmişdir ki, R.Səfərovun Azərbaycana verilməsi və əfv edilməsi beynəlxalq hüquq normalarına tam cavab verir. Ona görə də Ermənistan rəsmilərinin Ramil Səfərov məsələsindən bəhanə kimi istifadə edərək beynəlxalq aləmi çaşdırmaq cəhdləri əbəsdir. Ramil Səfərov məsələsi bitmişdir və bundan sonra müzakirə olunmamalıdır.

Milli Məclisin deputatı Ermənistanın bu cür hərəkətlərinin bölgədə sülhün təmin olunmasına ciddi zərbə vurduğunu qeyd etmiş, Ermənistan rəsmilərini regiondakı gərginliyi artırmamağa və qarayaxma kampaniyasından çəkinməyə çağırmışdır. Azərbaycanlı deputatın çıxışı digər iştirakçılar tərəfindən razılıqla qarşılanmışdır.

Həmin gün ATƏT Parlament Assambleyasının Daimi komitəsinin də iclası keçirilmişdir. Azərbaycan nümayəndə heyətinin rəhbəri xanım Bahar Muradovanın iştirak etdiyi iclasda təşkilatın maliyyə məsələləri, üzv dövlətlərin üzvlük haqları, ATƏT PA-nın xüsusi nümayəndələrinin fəaliyyəti və seçkilərə müşahidə missiyaları haqqında məlumatlar dinlənilmişdir.

ATƏT-in Demokratik Təsisatlar və İnsan Haqları Bürosu ilə ATƏT-in PA arasında əməkdaşlıq, seçki monitorinqi sahəsində iki qurum arasındakı fikir ayrılığı da diqqət mərkəzində olmuşdur.

Tədbirin sonunda Türkiyə nümayəndə heyətinin rəhbəri Emin Onen tərəfindən təqdim edilmiş Türkiyə-Suriya sərhədindəki hadisələrə dair qətnamə qəbul edilmişdir.

Oktyabrın 6-da Azərbaycan parlamentinin ATƏT PA-dakı nümayəndə heyətinin rəhbəri, Milli Məclis Sədrinin müavini Bahar Muradova ATƏT PA-nın Sədri Rikkardo Milyori ilə görüşmüşdür.

Görüşdə ATƏT PA ilə Milli Məclis arasındakı əməkdaşlığın pespektivləri müzakirə olunmuşdur. B.Muradova ATƏT PA-nın ötən il Dubrovnikdə keçirilmiş payız sessiyasında Dağlıq Qarabağ münaqişəsinə həsr edilmiş xüsusi dinləmələrin davamı olaraq, məsələnin gələcəkdə də geniş müzakirələrə çıxarılacağına və problemin xırda elementləri ilə bağlı debatlara yol verilməyəcəyinə əmin olduğunu bildirmişdir.

Xanım B.Muradova R.Milyoriyə Milli Məclisin parlamentinin Sədri Oqtay Əsədovun Azərbaycana rəsmi səfərə dəvət məktubunu təqdim etmişdir.

AzərTAc

Azərbaycan.-2012.- 9 oktyabr.- S. 8.