«Qarabağ» Fondunun icraçı direktoru Diana Altman KOHEN: «Ermənistan-Azərbaycan, Dağlıq Qarabağ münaqişəsinin həlli istiqamətində səylərimizi birləşdirməliyik»

"Ermənistan-Azərbaycan, Dağlıq Qarabağ münaqişəsinin həlli istiqamətində səylərimizi birləşdirməliyik".

Bu sözləri II Bakı Beynəlxalq Humanitar Forumunda iştirak edən ABŞ-dakı "Qarabağ" Fondunun icraçı direktoru xanım Diana Altman Kohen demişdir.

D.Kohen rəhbərlik etdiyi fondun Ermənistan-Azərbaycan, Dağlıq Qarabağ münaqişəsinin tez bir zamanda həlli istiqamətində daim amerikalıların maarifləndirilməsi sahəsində bir çox işlər həyata keçirdiyini diqqətə çatdırmışdır. Qonaq həmçinin Amerika vətəndaşlarına Cənubi Qafqazda sürətli inkişaf edən Azərbaycanın hər zaman Ermənistanın təcavüzünə məruz qaldığını bildirməyə çalışdıqlarını söyləmişdir.

D.Kohen bildirmişdir ki, fondun fəaliyyətindən Azərbaycanın mədəni irsi və adət-ənənələrini təbliğ etməyə çalışır.

Qonaq "Qarabağ" fondu tərəfindən bu günlərdə ABŞ-da keçirilən sərgiyə də toxunmuşdur. O, amerikalıların Azərbaycan mətbəxinə, mədəniyyətinə, folkloruna böyük maraq göstərdiklərini diqqətə çatdırmışdır.

Bakıya artıq ikinci dəfə gəldiyini deyən qonaq ölkəmizin sürətli inkişafını yüksək qiymətləndirmişdir. O, şəhərin gözəlliyindən, xüsusilə gecələrinin möhtəşəmliyindən söz açaraq demişdir: "Gəzməli yerləriniz, fəvvarələriniz hər kəsdə yaxşı təəssürat yaradır. Azərbaycanlılar çox mehriban və qonaqpərvərdirlər".

D.Kohen forumda müzakirə edilən vacib məsələlərin bəşəriyyətin üzləşdiyi bir sıra problemlərin həlli yollarının tapılması işinə kömək edəcəyinə əminliyini ifadə etmişdir.

O, forumda dünyanın tanınmış siyasətçilərinin, Nobel mükafatı laureatlarının, bir sıra beynəlxalq təşkilatların nümayəndələrinin iştirak etməsini Azərbaycanın dünyada gündən-günə artan nüfuzunun bariz nümunəsi kimi səciyyələndirmişdir.

Qonaq həmçinin Bakı Beynəlxalq Humanitar Forumunun yüksək səviyyədə təşkil olunduğunu xüsusi vurğulamışdır.

AzərTAc

Azərbaycan.-2012.- 9 oktyabr.- S. 10.