Bakı Beynəlxalq Humanitar Forumunun iştirakçıları Şəkiyə səfər etmişlər

İkinci Bakı Beynəlxalq Humanitar Forumunun iştirakçılarının bir qrupu oktyabrın 7-də Şəki şəhərində olmuşdur. AzərTAc xəbər verir ki, 130 nəfərlik qrupun tərkibinə dünyanın bir sıra ölkələrini, beynəlxalq qurumları təmsil edən tanınmış ictimai-siyasi xadimlər, elm adamları daxil idilər.

Şəkiyə səfərləri çərçivəsində qonaqlar şəhərin görməli yerlərini gəzmiş, tarixi-memarlıq abidələri ilə tanış olmuşlar.

Azərbaycan memarlığının şah əsərlərindən olan Şəki xanlarının sarayı ilə tanışlıq forum iştirakçılarının xüsusilə böyük marağına səbəb olmuşdur. Qonaqların diqqətinə çatdırılmışdır ki, Şərq memarlığının nadir incisi hesab olunan bu saray XVIII əsrə aid dünya əhəmiyyətli nadir tarixi-memarlıq abidəsidir. Saray 1761-1762-ci illərdə tikilmişdir. İnşaat texnologiyasına görə dünyada bənzəri olmayan bu sarayın tikintisində mismar və yapışqandan istifadə olunmamışdır. Üç yüz kvadratmetr ərazisi olan ikimərtəbəli sarayda 6 otaq, 4 dəhliz və 2 güzgülü eyvan vardır. Sarayın divar rəsmləri əsasən həndəsi və nəbati naxışlardan ibarətdir. İkinci mərtəbədəki otaqların tavan və divarlarını bəzəyən döyüş və ov səhnələri xüsusilə diqqəti cəlb edir.

Qonaqlar sarayın eyvanından Şəkinin qədim məhəllələrini seyr etmiş, sarayın önündə xatirə şəkilləri çəkdirmişlər.

Sarayın həyətindəki yaşı 500-ə çatan qoşa Xan çinarları qonaqlarda böyük maraq doğurmuşdur. Onların diqqətinə çatdırılmışdır ki, bu il iyulun əvvəllərində Şəki xanları sarayının 250 illik yubileyi böyük təntənə ilə qeyd olunmuşdur.

Forum iştirakçıları sarayın həyətində Şəki şirniyyatları ilə bəzədilmiş çay süfrəsinə qonaq edilmişlər.

Şəkiyə səfərləri çərçivəsində forum iştirakçıları Kiş kəndindəki qədim alban məbədini də ziyarət etmişlər. Qonaqların diqqətinə çatdırılmışdır ki, məbəd eramızın I əsrində Qafqaz Albaniyasında geniş yayılan Ay məbədinin özülü üzərində qurulmuşdur. Əhəng daşından tikilən bu abidə erkən orta əsrlərdə yaranan ilk günbəzli, zal tipli məbəddir. 2001-2003-cü illərdə məbəddə Azərbaycan-Norveç birgə layihəsi üzrə bərpa işləri aparılmışdır. Layihə məşhur Norveç alimi Tur Heyerdalın dəstəyi ilə həyata keçirilmişdir. Alimin xatirəsini əbədiləşdirmək məqsədilə məbədin yanında onun büstü qoyulmuşdur. Məbəd tarixi-memarlıq abidəsi kimi dövlət tərəfindən qorunur.

Məbədin içərisindəki Yaloylutəpə mədəniyyətinə aid nümunələr, orta Tunc-antik dövrünə aid saxsı qablar, həyətindəki ilkin orta əsrlərə aid sərdabalar qonaqların marağına səbəb olmuşdur.

Forum iştirakçıları daha sonra XVIII əsrin sonu - XIX əsrin əvvəllərində inşa edilmiş "Yuxarı Karvansaray" mehmanxana kompleksi ilə tanış olmuşlar.

Məlumat verilmişdir ki, Şərq memarlığı üslubunda tikilmiş bu karvansaray şəhərin "Yuxarı baş" Tarix-Memarlıq Qoruğunun ərazisində yerləşir. Ümumi sahəsi 6 min kvadratmetr olan bu kompleks 300-ə yaxın otaq və zirzəmidən ibarətdir. Hazırda bu abidə mehmanxana kimi fəaliyyət göstərir. Şəhərin qonaqları burada qalmağa daha çox üstünlük verirlər.

Daha sonra forum iştirakçıları karvansarayın həyətində Şəki Musiqi Kollecinin kamera ansamblının ifasında maraqlı konsert proqramını izləmişlər.

Qədim Şəki ilə tanışlıq Bakı Beynəlxalq Humanitar Forumunun iştirakçılarının ürəyincə olmuşdur. Qonaqlar Şəkidən xoş təəssüratlarla ayrılmışlar.

Azərbaycan.-2012.- 10 oktyabr.- S. 8.