Bakıda «Xidməti fəaliyyətin qiymətləndirilməsi vasitəsilə dövlət qulluğunda səmərəliliyin artırılması» mövzusunda beynəlxalq konfrans keçirilir

Oktyabrın 10-da Bakıda Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın (DQMK) və Almaniya Federativ Respublikasının İqtisadi Əməkdaşlıq və İnkişaf Nazirliyi adından Almaniya Beynəlxalq Əməkdaşlıq Cəmiyyətinin (GİZ) birgə təşkilatçılığı ilə "Xidməti fəaliyyətin qiymətləndirilməsi vasitəsilə dövlət qulluğunda səmərəliliyin artırılması" mövzusunda beynəlxalq konfrans başlamışdır.

AzərTAc xəbər verir ki, "Azərbaycanda dövlət qulluğu sektorunda islahatların dəstəklənməsi" Azərbaycan-Almaniya layihəsi çərçivəsində keçirilən tədbirin məqsədi ölkəmizdə dövlət qulluqçularının xidməti fəaliyyətinin qiymətləndirilməsi sistemi barədə məlumat vermək, beynəlxalq təcrübədə dövlət qulluqçularının xidməti fəaliyyətinin qiymətləndirilməsi zamanı tətbiq edilən üsul və metodları, xidməti fəaliyyətin qiymətləndirilməsinin dövlət qulluqçularının karyeralarının inkişafında rolunu və bu sahədə mövcud problemləri müzakirə etməkdir.

Tədbirdə Türkiyə, ABŞ, Almaniya, Avstriya, Belçika, Koreya Respublikası, Estoniya, Gürcüstan, Kanada, Litva, Moldova, Monqolustan, Monteneqro, Polşa, Rumıniya, Ukrayna, Uqanda və Yaponiyanın dövlət qulluğu və inzibati idarəetmə sahəsində müvafiq qurumlarının, o cümlədən GİZ-in, BMT-nin İnkişaf Proqramının (UNDP), SİGMA-nın və digər beynəlxalq təşkilatların yüksək vəzifəli şəxsləri iştirak edirlər.

Tədbiri açan Dövlət Qulluğu Məsələləri üzrə Komissiyanın sədri Bəhram Xəlilov demişdir ki, Azərbaycanda bütün sahələrdə olduğu kimi, dövlət qulluğu sistemində də həyata keçirilən islahatlar uğurlu nəticələrini verir. Bildirilmişdir ki, hazırda Azərbaycanda dövlət qulluğu sistemində gənclər üstünlük təşkil edir.

Almaniya Beynəlxalq Əməkdaşlıq Cəmiyyətinin Bakı ofisinin rəhbəri Henninq Tvesten tədbirin əhəmiyyəti haqqında danışaraq demişdir ki, dövlət qulluqçularının fəaliyyətinin qiymətləndirilməsi çox vacibdir. Lakin bu proses zamanı dövlət qulluqçularının öz rəyləri də nəzərə alınmalıdır. "Dövlət qulluğu sektorunda aparılan iş hesabatlılıq prinsipinə əsaslanmalıdır" - deyən H. Tvesten işçilərin qiymətləndirilməsində şəffaflığın nəzərə alınmasının vacibliyini qeyd etmişdir.

Azərbaycan Respublikası Prezidenti Administrasiyasının kadr məsələləri şöbəsinin kadr siyasəti sektorunun müdiri Vasif Xələfov ölkəmizdə dövlət qulluğu sahəsində son dövrlərdə əldə olunmuş nailiyyətlərdən danışmışdır. Bildirmişdir ki, 2001-ci ildən Azərbaycanda yeni dövlət idarəçiliyinin təşkili məqsədi ilə mühüm əhəmiyyət kəsb edən bir sıra qərarlar qəbul edilmiş, dövlət qulluğu sahəsində münasibətləri tənzimləyən normativ hüquqi baza yaradılmışdır. Hazırda Azərbaycanda şəffaf dövlət idarəçilik sistemi həyata keçirilir.

Sonra Dövlət Qulluğu Məsələləri üzrə Komissiyanın baş məsləhətçisi Nərmin Mirzəyeva "Azərbaycan Respublikasında xidməti fəaliyyətin qiymətləndirilməsi sistemi: təcrübəsi" və SİGMA təşkilatının məsləhətçisi xanım Ayri Alakivi "Dövlət qulluğunda xidməti fəaliyyətin qiymətləndirilməsi: mövcud təcrübələrin xülasəsi" mövzularında təqdimatlarla çıxış etmişlər.

Beynəlxalq konfransda, həmçinin Kaliforniya Universitetinin Anderson adına idarəetmə fakültəsinin professoru Samuel Kalbertin "Xidməti fəaliyyətin qiymətləndirilməsi: formalaşma üsulları", "Dövlət qulluğunda islahatların dəstəklənməsi" layihəsinin məsləhətçisi Kristof Vaynmanın "Dövlət qulluğunda xidməti fəaliyyətin qiymətləndirilməsinin əsas məqamları" mövzularında məruzələri dinlənilmişdir.

Oktyabrın 11-də başa çatacaq konfrans işçi qruplar üzrə müzakirələrlə davam etmişdir.

AzərTAc

Azərbaycan.-2012.- 11 oktyabr.- S.5.