Dövlət İdarəçilik Akademiyasında ABŞ-da fəaliyyət göstərən Qarabağ Fondunun icraçı direktoru ilə görüş olmuşdur

Oktyabrın 10-da Azərbaycan Respublikasının Prezidenti yanında Dövlət İdarəçilik Akademiyasında (DİA) İkinci Bakı Beynəlxalq Humanitar Forumunun iştirakçısı, ABŞ-da fəaliyyət göstərən Qarabağ Fondunun icraçı direktoru xanım Diana Altman Kohen ilə görüş olmuşdur.

AzərTAc xəbər verir ki, professor və müəllimlərin, tələbələrin iştirak etdikləri görüşdə DİA-nın rektoru, akademik Urxan Ələkbərov xalqımızın ümummilli lideri, müstəqil dövlətimizin memarı və qurucusu Heydər Əliyev siyasətinin əhəmiyyətindən danışmış, ulu öndərin siyasi xəttinin Azərbaycan Prezidenti İlham Əliyev tərəfindən uğurla həyata keçirildiyini bildirmişdir.

Rektor müdrik şəxsiyyət Heydər Əliyevin Azərbaycan, o cümlədən Qarabağ həqiqətlərinin dünya ictimaiyyətinə çatdırılmasına daim böyük önəm verdiyini xatırlatmışdır.

Azərbaycan Prezidenti İlham Əliyevin apardığı siyasətin uğurlu nəticələrindən bəhs edən akademik U.Ələkbərov ölkəmizin dinamik inkişaf etdiyini, onun beynəlxalq aləmdə nüfuzunun daha da artdığını söyləmişdir.

ABŞ-da fəaliyyət göstərən Qarabağ Fondu barədə fikirlərini bölüşən rektor bildirmişdir ki, bu təşkilat Azərbaycanı, xüsusilə onun Qarabağ bölgəsini amerikalılara tanıtmaq, xalqımızın mədəniyyətini və incəsənətini həmin ölkədə təbliğ etmək məqsədinə xidmət edir. Bunun üçün qurum müxtəlif səmərəli tədbirlər, layihələr həyata keçirir.

Görüşdən məmnun qaldığını deyən ABŞ-da fəaliyyət göstərən Qarabağ Fondunun icraçı direktoru xanım Diana Altman Kohen Birləşmiş Ştatlar ilə Azərbaycan əlaqələrinin və bu münasibətlərin inkişafının əhəmiyyətindən danışmışdır.

Qarabağ Fondu barədə məlumat verən D.A.Kohen bildirmişdir ki, təşkilatın missiyası ABŞ ilə Azərbaycan arasında mədəni körpünün yaradılmasından ibarətdir.

Qonaq Qarabağ Fondunun Ermənistan-Azərbaycan, Dağlıq Qarabağ münaqişəsinin ədalətli şəkildə həlli üçün daim amerikalıların maarifləndirilməsi sahəsində səmərəli tədbirlər reallaşdırdığını söyləmişdir. Qeyd etmişdir ki, təşkilat fəaliyyətində Azərbaycanın, o cümlədən Qarabağın mədəni irsini və adət-ənənələrini təbliğ etməyə xüsusi önəm verir və bu istiqamətdə müxtəlif layihələr həyata keçirir.

Sonra D.A.Kohen sualları cavablandırmışdır.

Digər çıxış edənlər Qarabağ Fondunun fəaliyyətinin əhəmiyyətindən danışmışlar.

Azərbaycan.-2012.- 11 oktyabr.- S.9.