Kiyevdə GUAM ölkələrinin Xarici İşlər Nazirləri Şurasının növbədənkənar iclası Azərbaycan tərəfinin sədrliyi ilə keçmişdir

Kiyevdə GUAM-ın Katibliyindən AzərTAc-a bildirmişlər ki, Demokratiya və İqtisadi İnkişaf uğrunda Təşkilatın iqamətgahında GUAM ölkələrinin Xarici İşlər Nazirləri Şurasının (XİNŞ) qurumun yaradılmasının 15 illiyinə həsr olunmuş növbədənkənar iclası keçirilmişdir.

Forumda Azərbaycanı xarici işlər naziri Elmar Məmmədyarov (iclasın sədri), Gürcüstan xarici siyasət idarəsinin başçısı David Calaqaniya, Moldova Respublikasının xarici işlər və Avropa inteqrasiyası naziri Yuri Lyanke, Ukrayna XİN-in başçısı Konstantin Qrişşenko, GUAM-ın baş katibi Valeri Çeçelaşvili iştirak etmişlər.

Təşkilatın gələcək inkişafı məsələlərini müzakirə edən XİNŞ-də vurğulanmışdır ki, GUAM regional qarşılıqlı fəaliyyətin inkişafı kontekstində böyük rol oynayır və gələcəkdə də qurum çərçivəsində səmərəli əməkdaşlıq aparılacaqdır.

İclasda GUAM-ın ənənəvi tərəfdaşları olan dövlətlərin - ABŞ-ın və Yaponiyanın Ukraynadakı səfirləri, habelə Avropa Komissiyasının bu ölkədəki nümayəndə heyətinin başçısı iştirak etmişlər.

Şura XİNŞ-in GUAM-ın təsis edilməsinin 15 illiyinə həsr olunmuş növbədənkənar iclası barədə rəsmi məlumat qəbul etmişdir.

Axşam GUAM Katibliyinin ofisində qurum ölkələrinin Demokratiya və İqtisadi İnkişaf uğrunda Təşkilatın yaradılmasının 15 illiyinə həsr olunmuş musiqi gecəsi keçirilmişdir. Ukraynanın "Kiyev-Klassik" Simfonik Orkestrinin dirijoru, Ukraynanın əməkdar incəsənət xadimi, professor German Makarenkonun rəhbərliyi ilə orkestrin kamera qrupunun ifasında GUAM-ın üzvü olan ölkələrin xalq mahnıları və bəstəkarlarının əsərləri səslənmişdir.

Tədbirdə Kiyevdə akkreditə olunmuş diplomatik korpusun, Ukrayna XİN-in, digər nazirliklərin və idarələrin nümayəndələri iştirak etmişlər.

Konsertdən sonra təntənəli qəbul olmuşdur.

Azərbaycan xarici siyasət idarəsinin başçısı Elmar Məmmədyarov oktyabrın 10-da Ukrayna Milli Təhlükəsizlik və Müdafiə Şurasının katibi Andrey Klyuyevlə görüşmüşdür.

Ukrayna Prezidenti Viktor Yanukoviç E.Məmmədyarovu qəbul etmişdir.

Zeynal AĞAZADƏ,

AzərTAc-ın xüsusi müxbiri

Kiyev

Azərbaycan.-2012.- 12 oktyabr.- S.4.