Dəmiryolçular peşə bayramlarını qeyd etmişlər

"Azərbaycan Dəmir Yolları" Qapalı Səhmdar Cəmiyyətində (QSC) 13 Oktyabr - Dəmir yolu işçilərinin peşə bayramı gününə həsr edilmiş təntənəli yığıncaq keçirilmişdir.

AzərTAc xəbər verir ki, QSC-nin foyesində müstəqillik illərində ölkənin polad magistralında həyata keçirilən yenilikləri özündə əks etdirən fotostendlər, videoçarx və "Azərbaycan dəmir yolları müstəqillik illərində" sənədli filmi nümayiş olunmuşdur.

Bayram tədbiri Azərbaycanın dövlət himninin səsləndirilməsi ilə başlanmışdır.

Nəqliyyat naziri Ziya Məmmədov dəmiryolçuları peşə bayramları münasibətilə təbrik etmişdir. Bildirmişdir ki, son illərdə Azərbaycan iqtisadiyyatının hərtərəfli və sürətli inkişafı ulu öndər Heydər Əliyevin uzaqgörənliklə müəyyən etdiyi sosial-iqtisadi inkişaf strategiyasına əsaslanır. Respublikamız bütün sahələrdə böyük nailiyyətlərə imza atır, iqtisadi inkişaf tempinə görə dünyanın lider dövlətləri sırasındadır. Bütövlükdə ölkə iqtisadiyyatının, o cümlədən nəqliyyat sisteminin inkişaf konsepsiyası Prezident İlham Əliyevin rəhbərliyi ilə təkmilləşdirilərək uğurla davam etdirilir. Bu sahədə aparılan ardıcıl islahatlar ölkənin nəqliyyat sektorunu da ən perspektivli sahələrdən birinə çevirmişdir.

Nazir vurğulamışdır ki, Azərbaycan Dövlət Dəmir Yolunun inkişafının ən sürətli və parlaq dövrü ulu öndər Heydər Əliyevin respublikamıza rəhbərliyinin birinci və ikinci dövrlərini əhatə edir. Həmin illərdə dahi rəhbərin fəaliyyəti sayəsində respublika iqtisadiyyatının bütün sahələrində olduğu kimi, dəmir yolu nəqliyyatında da əsaslı dəyişikliklərə və köklü islahatlara təkan verilmişdir.

Bildirilmişdir ki, görülən işlərin məntiqi davamı kimi, Prezident İlham Əliyevin 2010-cu il iyulun 6-da "Azərbaycan Respublikasında dəmir yolu nəqliyyat sisteminin 2010-2014-cü illərdə inkişafına dair Dövlət Proqramı"nın təsdiq edilməsi haqqında imzaladığı sərəncam dəmir yolunun tarixində ən mühüm sənəddir. Proqramda ölkənin dəmir yolu nəqliyyatının sürətli inkişafını təmin edən bütün məqamlar öz əksini tapmış və qarşıda qoyulan vəzifələrin icrası istiqamətində mühüm addımlar atılmaqdadır. Dövlət proqramının əsas məqsədi Azərbaycanın tranzit potensialının artırılması, dəmir yolu nəqliyyatında xidmətlərin səviyyəsinin yüksəldilməsi, sərnişin və yük daşımalarında nəqliyyat xərclərinin azaldılması yolu ilə nəqliyyat kompleksinin səmərəli fəaliyyətini təmin etməkdir.

"Azərbaycan Dəmir Yolları" QSC-nin sədri Arif Əsgərov çıxış edərək, ölkəmizdə dəmir yolunun yaranma tarixi barədə ətraflı məlumat vermişdir. Qeyd etmişdir ki, Azərbaycanda dəmir yolunun təməli hələ 1878-ci ildə qoyulmuş və inşası 1880-ci ilin yanvar ayında başa çatmışdır. Bu, uzunluğu 20 kilometr olan Bakı-Suraxanı-Sabunçu dəmir yolundan ibarət olmuşdur.

Həmin tarixi dövrdən başlayaraq Azərbaycan dəmir yolu yük daşınmasına olan tələbatın artması ilə əlaqədar inkişaf etmiş və təkmilləşmişdir. Hazırda baş yolların ümumi uzunluğu 2 min 910,1 kilometr, istismar uzunluğu 2 min 79,3 kilometrdir ki, onlardan da 802,3 kilometri ikiyolludur. Yolun ümumi istismar uzunluğunun 1241,4 kilometri və ya 59,7 faizi elektrikləşdirilmiş, 837,9 kilometri, yəni, 40,3 faizi teplovoz dartısı ilə işləyir. Həmçinin 1527,7 kilometri avtomatlaşdırılmış işarəvermə sistemi ilə təchiz edilmişdir.

QSC-nin sədri vurğulamışdır ki, erməni hərbi birləşmələri tərəfindən Azərbaycan ərazilərinin 20 faizinin işğal edilməsi və bir milyondan çox azərbaycanlının qaçqın düşməsinə gətirib çıxaran hərbi təcavüz nəticəsində Azərbaycan dəmir yoluna da ciddi ziyan dəymişdir. Belə ki, 240 kilometrdən çox dəmir yolu xətti işğal altında qalmışdır. Mehri-Kərçivan sahəsində qatarların hərəkətinin dayandırılması nəticəsində Naxçıvan Muxtar Respublikası blokadaya düşmüş və 20 ildən çoxdur ki, onun acı nəticələrini öz üzərində hiss edir.

A.Əsgərov qeyd etmişdir ki, ölkəmiz beynəlxalq və regional layihələrin, o cümlədən Bakı-Tbilisi-Qars və Şimal-Cənub nəqliyyat layihələrinin reallaşması prosesində də fəal iştirak edir. Azərbaycanın daha çox önəm verdiyi beynəlxalq layihələrdən biri olan Bakı-Tbilisi-Qars beynəlxalq dəmir yolu layihəsinin reallaşması məsələsi Azərbaycan, Gürcüstan, Türkiyə hökumətləri və dəmir yolları rəhbərlərinin də diqqət mərkəzindədir. Bu, hər üç ölkənin, eyni zamanda, həmin nəqliyyat dəhlizinin xidmətlərindən istifadə etmək marağında olan başqa ölkələrin də sıx nəqliyyat əlaqələri qurmasına böyük imkanlar açacaqdır. Bakı-Tbilisi-Qars dəmir yolunun Gürcüstan hissəsinin tikintisində "Azərbaycan Dəmir Yolları" QSC-nin "Dəmiryolservis" Məhdud Məsuliyyətli Cəmiyyətinin kollektivi podratçı təşkilat kimi iştirak edir. Bu ilin sonuna kimi ilk qatarın Türkiyə sərhədinədək göndərilməsi nəzərdə tutulmuşdur. Layihə tam olaraq 2014-cü ildə istismara veriləcəkdir.

"Azərbaycan Dəmir Yolları" QSC-nin 2012-ci ilin 9 ayı ərzində istehsalat və maliyyə-təsərrüfat fəaliyyəti ilə bağlı göstəriciləri barədə ətraflı məlumat verən A.Əsgərov bildirmişdir ki, əsası ulu öndər Heydər Əliyev tərəfindən qoyulan dəmir yolu nəqliyyatının inkişaf strategiyası Prezident İlham Əliyev tərəfindən uğurla davam etdirilir. Dövlət başçısının 2005-ci il 7 oktyabr tarixli sərəncamı ilə 13 oktyabr - Dəmir yolu işçilərinin peşə bayramı günü kimi təsis olunmuşdur. Artıq 8 ildir ki, bu bayram sevincini sizinlə bölüşürük. Hər il olduğu kimi, bu il də Prezident İlham Əliyev peşə bayramımız ərəfəsində bir qrup dəmiryolçunu ali dövlət mükafatları və fəxri adlarla təltif etmişdir. Ölkənin dəmir yoluna və dəmiryolçulara göstərdiyi bu böyük diqqət və qayğıya görə dövlət başçısına bir daha dərin minnətdarlığımızı bildiririk.

Çıxışlardan sonra dəmir yolu nəqliyyatının inkişafında xidmətlərinə görə təltif edilən bir qrup dəmiryolçuya Nəqliyyat Nazirliyinin fəxri fərmanı və "Fəxri dəmiryolçu" döş nişanı təqdim edilmişdir.

Sonda tədbir iştirakçıları adından Azərbaycan Respublikasının Prezidenti İlham Əliyevə müraciət qəbul olunmuşdur.

Azərbaycan.-2012.- 14 oktyabr.- S.2.