Moskvada RAGT-nin illik forumu keçirilmişdir

Moskvada, "Holidey İnn Moskva Sokolniki" hotelində Rusiyanın Azərbaycanlı Gənclər Təşkilatının (RAGT) illik forumu keçirilmişdir. Forumun açılış mərasimində RAGT-nin sədri, Heydər Əliyev Fondunun vitse-prezidenti, IDEA Beynəlxalq ekologiya kampaniyasının təsisçisi Leyla Əliyeva, habelə Azərbaycanın və Rusiyanın rəsmi şəxsləri iştirak etmişlər.

Forum başlanmazdan əvvəl Rusiyanın Ümumdünya Vəhşi Təbiət Fondu (WWF-Rossiya) və IDEA Beynəlxalq kampaniyası arasında əməkdaşlıq haqqında sazişin təntənəli imzalanma mərasimi olmuşdur. Sənədi IDEA kampaniyasının təsisçisi Leyla Əliyeva və Rusiyanın Ümumdünya Vəhşi Təbiət Fondunun sədri İqor Çestin imzalamışlar. Əməkdaşlıq haqqında sazişdə Rusiyanın və Azərbaycanın təbiətinin qorunması sahəsində qabaqcıl ekoloji praktika, texnologiya və standartların tətbiqi, populyarlaşması, əhalinin ekoloji şüurunun formalaşması istiqamətlərində qarşılıqlı fəaliyyətin genişləndirilməsi, habelə Avropa zubrunun və Orta Asiya bəbirinin populyasiyasının bərpası proqramlarının inkişaf etdirilməsi nəzərdə tutulur.

RAGT-nin sədri Leyla Əliyeva "Azərbaycan" sərgisi ilə tanış olmuşdur.

İmzalanma mərasimindən sonra RAGT-nin illik forumu açılmışdır.

Əvvəlcə Azərbaycan Respublikasının və Rusiya Federasiyasının dövlət himnləri səslənmişdir.

Təntənəli tədbiri Azərbaycanın Rusiyadakı səfiri Polad Bülbüloğlu açmışdır. Səfir ötən beş ildə bu təşkilatın böyük uğurlar qazandığını qeyd etmişdir. Onun fikrincə, bu gün RAGT inamla təşkilatlanır, ölkəmizin hüdudlarından kənarda, o cümlədən Rusiyada Azərbaycanın imicinin formalaşması məsələsinə düşünülmüş, savadlı, proqram mövqeyindən yanaşır. Səfir demişdir: "Sizin daha yaxşı gələcəyə istiqamətlənməyiniz, qeyri-standart qərarlar qəbul etmək bacarığınız azərbaycanlıların keyfiyyətcə yeni, kreativ təfəkkürlü nəslinin yetişməsinə dəlalət edir. Bu gün RAGT Rusiyanın bütün regionlarını əhatə edən və ölkələrimizin gələcəyi üçün çox böyük əhəmiyyətə malik olan mühüm gənclər təşkilatlarından birinə çevrilmişdir".

Sonra RAGT-nin fəaliyyəti haqqında sənədli film nümayiş etdirilmişdir.

Tədbirin moderatoru, Rusiyanın məşhur teleaparıcısı Andrey Malaxov RAGT-nin fəaliyyəti barədə səmimi söhbət açmış, sonra isə çıxış üçün bu gün yenidən RAGT-nin sədri seçilmiş Leyla xanım Əliyevaya söz vermişdir.

Azərbaycan.-2012.- 14 oktyabr.- S.7.