Azərbaycan-İran münasibətləri normal inkişaf edir

İki qardaş dövlət və xalq arasında heç bir anlaşılmazlıq yoxdur

Mürəkkəb geosiyasi coğrafi məkanda yerləşən Azərbaycan Respublikasının həyata keçirdiyi xarici siyasətin üstünlüklərindən biri dünyanın mütərəqqi dövlətləri ilə siyasi, iqtisadi, diplomatik münasibətlərin qurulması və qarşılıqlı etimad əsasında inkişaf etdirilməsidir. Bu çərçivədə, xüsusən münasibətlərin mövcud olduğu region və həmsərhəd dövlətlərlə əməkdaşlıq əlaqələrinin sivil müstəvidə həyata keçirilməsi və daim genisləndirilməsi rəsmi Bakının xarici siyasətdə müəyyən etdiyi əsas meyarlardandır.

Ulu öndər Heydər Əliyevin 1993-cü ildə hakimiyyətə qayıdışından sonra ölkəmizin xarici siyasətində bərqərar olmuş bu mütərəqqi ənənənin yeni dünya nizamında Prezident İlham Əliyev tərəfindən uğurla davam etdirilməsi, dövrün tələblərindən irəli gələrək məzmun və keyfiyyətcə yeniləşdirilməsi son 9 ildə Azərbaycanın həm beynəlxalq, həm regional imicinin yüksəlməsinə əhəmiyyətli dərəcədə təsir göstərmişdir. Qonşu Gürcüstan və Rusiya ilə əlaqələrin davamlı inkişafı, Türkmənistanla münasibətlərin istiləşməsi deyilənlərin bariz nümunəsidir.

Azərbaycanın yerləşdiyi regionda geniş əlaqələrə malik olduğu dövlətlərdən biri də İran İslam Respublikasıdır. Əhalisinin böyük hissəsi azərbaycanlılardan ibarət olan bu ölkə ilə müstəqil Azərbaycan dövlətini ortaq, mədəni və mənəvi dəyərlər bağlayır. Qeyd edək ki, İranla münasibətlərin keyfiyyətcə yeni mərhələyə qədəm qoyması ulu öndər Heydər Əliyevin hakimiyyətə qayıdışından sonrakı dövrə təsadüf edir. Məhz bundan sonra bütün sahələr üzrə əməkdaşlığın inkişaf etdirilməsini nəzərdə tutan bir sıra mühüm sənədlərin imzalanması, əvvəllər iki dövlət arasında münasibətlərdə olan soyuqluğun aradan qalxmasına və əlaqələrin möhkəmlənməsinə təkan verdi. Naxçıvanda İranın, Təbrizdə isə Azərbaycanın Baş Konsulluğunun açılması ölkələrimiz arasında siyasi münasibətlərin daha da möhkəmlənməsinin bariz nümunəsi hesab oluna bilər.

İqtisadi əlaqələrin genişlənməsi isə Azərbaycanla İran arasında əmtəə dövriyyəsinin artmasına güclü təkan verdi. Azərbaycanda İran müəssisələrinin fəaliyyətinə lazımi imkan yaradılmış və bu gün də iranlı iş adamları Azərbaycan iqtisadiyyatının müxtəlif sahələrinə sərmayə yatırmaqda davam edirlər. İranla Azərbaycan beynəlxalq təşkilatlar çərçivəsində də səmərəli əməkdaşlıq edirlər və bir-birilərinin dövlət maraqlarını qorumaqla yanaşı, beynəlxalq səviyyəli müxtəlif məsələlərə münasibətdə eyni mövqedən çıxış edirlər.

Rəsmi Bakı cənub qonşusu ilə əlaqələrin inkişafına həmişə diqqət və həssaslıqla yanaşmış, münasibətlərin yüksələn xətlə inkişafına çalışmışdır. Azərbaycan ikitərəfli əlaqələrə azacıq da olsa kölgə salacaq addım atmamış, habelə beynəlxalq müstəvidə İranın milli maraqlarına zidd olan təşəbbüslərə və siyasi qarşıdurmalara qoşulmamışdır. Xüsusən İranın nüvə proqramı ilə bağlı müzakirələrdə Azərbaycan bu ölkəyə qarşı hərbi müdaxilələri və siyasi-iqtisadi sanksiyaları dəstəkləməmişdir və bu mövqeyində qətiyyətlidir.

İranda hər hansı xoşagəlməz hadisənin baş verməsi, bu ölkənin münaqişəyə cəlb edilməsi, başqa dövlətlə toqquşması Azərbaycanın ümumi geopolitik, siyasi və iqtisadi maraqları ilə uzlaşmır. Azərbaycan istəyir ki, bölgədə sabitlik olsun, o cümlədən İran digər ölkələrlə öz münasibətlərini sülh və əmin-amanlıq şəraitində qursun. Digər tərəfdən, rəsmi Bakı İranın daxili işlərinə qarışmamış, bu qonşu ölkədə hər zaman əmin-amanlığın olmasını arzulamışdır.

Azərbaycan həmişə öz cənub qonşusunun ərazi bütövlüyünü dəstəkləmişdir. Bu baxımdan ölkəmiz bəzi xarici dairələrdə, mətbuatda özünü büruzə verən spekulyasiyalara daim qarşı çıxmış, İranın milli və dövlət maraqlarına toxunan fəaliyyəti heç bir vaxt dəstəkləməmişdir.

Bu gün həm Azərbaycan, həm də İran tərəfi dövlətlərarası münasibətlərin bütün istiqamətlərində qarşılıqlı maraqların təmin olunması üçün müxtəlif tədbirlər həyata keçirir. Oktyabrın 14-də İranın ölkəmizdə yeni təyin olunmuş fövqəladə və səlahiyyətli səfirinin etimadnaməsini qəbul edən Prezident İlham Əliyev Azərbaycan ilə İran arasında əlaqələrin inkişafına toxunaraq əməkdaşlığın gələcəkdə də uğurla gedəcəyinə əminliyini ifadə etmiş, ikitərəfli münasibətlərimizin çoxşaxəli olduğunu və bir çox sahələri əhatə etdiyini bildirmişdir.

Müştərək tarix, din və digər mənəvi dəyərlərlə bir-birinə bağlı olan Azərbaycan və İran respublikaları arasındakı münasibətlər hazırda yüksələn xətlə inkişaf etməkdədir. Bunu iki ölkənin prezidentlərinin, nümayəndə heyətlərinin qarşılıqlı səfərləri və bu zaman aparılan danışıqların yekunu, imzalanan sənədlər də təsdiq edir. Bu səfərlər zamanı dövlətlərarası münasibətlərin müxtəlif aspektləri müzakirə olunmuş, qarşılıqlı əlaqələrin daha da genişləndirilməsinin vacibliyi vurğulanmış və danışıqların yekunu olaraq siyasi, iqtisadi və mədəni əlaqələrin dərinləşməsi üçün yeni imkanlar açılmışdır.

İran İslam Respublikasının Prezidenti Mahmud Əhmədinejadın Azərbaycana səfəri də iki ölkənin münasibətlərinin normal məcrada inkişafının təsdiqidir. Bu səfər həm də ondan xəbər verir ki, Azərbaycan və İran dövlətləri və onların xalqları arasında heç bir anlaşılmazlıq yoxdur. Aparılan səmərəli fikir mübadilələri göstərir ki, iki ölkə arasında qarşılıqlı səmimiyyətə söykənən dostluq münasibətləri çox güclü və qırılmazdır. Hər iki dövlət bütün məsələlərə münasibətdə vahid mövqedən yanaşır.

Azərbaycan və İran prezidentləri hər zaman əlaqələrin genişləndirilməsi üçün daha böyük potensialın olduğunu qeyd edirlər. Bu da ondan irəli gəlir ki, həm Azərbaycanın, həm də İranın bütün sahələrdə əlaqələri daha da genişləndirmək üçün kifayət qədər siyasi iradəsi və qətiyyəti var.

Rəşad CƏFƏRLİ

Azərbaycan.-2012.- 16 oktyabr.- S.7.