Azərbaycanın dünya şöhrətli şərqşünas alimi Aida İmanquliyevanın Belarus dilinə tərcümə edilmiş «Məqalələr, tərcümələr» kitabının təqdimat mərasimi keçirilmişdir

Belarus Respublikasının Prezidenti Administrasiyası nəzdindəki Milli Kitabxanada Azərbaycanın dünya şöhrətli şərqşünas alimi, professor Aida İmanquliyevanın Belarus dilinə tərcümə edilmiş "Məqalələr, tərcümələr" kitabının təqdimat mərasimi keçirilmişdir.

Azərbaycan Respublikasının Belarusdakı səfirliyinin təşəbbüsü və hərtərəfli dəstəyi ilə Belarus dilinə tərcümə edilmiş kitabın təqdimat mərasimində Belarusun dövlət qurumlarını, mədəniyyət, elm və təhsil ocaqlarını, yerli KİV-ləri və bu ölkədə akkreditə olunmuş diplomatik korpusu təmsil edən 100-dək qonaq iştirak etmişdir.

Azərbaycanın Belarusdakı səfirliyindən bildirmişlər ki, tədbirdə çıxış edən səfir İsfəndiyar Vahabzadə kitab barədə məlumat verərək ümumilikdə Aida xanım İmanquliyevanın Azərbaycanda şərqşünaslıq elminin inkişafına verdiyi böyük töhfədən, habelə mühacir ərəb ədəbiyyatının tədqiqi istiqamətindəki əvəzsiz xidmətlərindən danışmışdır. O, "Məqalələr, tərcümələr" kitabının Belarusun şərqşünaslıq sahəsində fəaliyyət göstərən elm ocaqları və tələbələr üçün qiymətli vəsait olacağını vurğulamışdır.

Təqdimat mərasimində həmçinin Belarus Milli kitabxanasının direktoru Roman Motulski, M.Tank adına Belarus Dövlət Pedaqoji Universitetinin rus dili filologiyası fakültəsinin dekanı Vasili Stariçenok və Belarus Azərbaycan İcmaları Konqresi sədrinin müavini Baxşı Qəmbərov çıxış edərək görkəmli şərqşünas alimin kitabının Belarus dilinə tərcümə edilməsinin təqdirəlayiq hal olduğunu diqqətə çatdırmışlar. Bu kimi təşəbbüslərin, tədbirlərin, ümumilikdə ölkələrimiz arasında humanitar əlaqələrin inkişafına, xalqlarımızın daha da yaxınlaşmasına xidmət etdiyi vurğulanmışdır.

Təqdimat mərasimi ərəfəsində Belarusun aparıcı mətbuat orqanlarında Aida xanım İmanquliyevaya həsr olunmuş məqalələr dərc edilmiş, habelə təqdimat mərasimi yerli KİV-lərdə işıqlandırılmışdır.

Tədbirlə bağlı səfir İsfəndiyar Vahabzadə Belarusun yerli KİV-lərinə müsahibə vermişdir.

AzərTAc

Azərbaycan.-2012.- 17 oktyabr.- S.4.