Pakistanın «Diplomatic Insight» jurnalının ölkələrimiz arasında diplomatik münasibətlərin 20 illiyinə həsr olunmuş xüsusi buraxılışı çapdan çıxmışdır

Pakistanın nüfuzlu "Diplomatic Insight" jurnalının Azərbaycan-Pakistan diplomatik münasibətlərinin 20 illiyinə həsr olunmuş xüsusi buraxılışı işıq üzü görmüşdür. Azərbaycanın Pakistandakı səfirliyindən AzərTAc-a bildirmişlər ki, jurnalın üz qabığında ölkələrimiz arasındakı münasibətlərin əsaslarını qoymuş ümummilli lider Heydər Əliyevin və Pakistanın tanınmış siyasətçisi Benazir Bhuttonun şəkilləri yer almışdır.

Nəşr Peşavar Universitetinin siyasi elmlər fakültəsinin professoru Zahid Ənvərin "Azərbaycan sülh şəraitində yaşamaq axtarışında" sərlövhəli məqaləsi ilə başlayır. Yazıda Azərbaycanın tarixinə nəzər yetirilmiş, ölkəmizin vaxtilə Rusiya və İran arasında iki hissəyə bölünməsi haqqında məlumat verilmişdir. Azərbaycanın müasir tarixindən də bəhs edən alim ölkəmizin müstəqilliyinin ilk günlərindən başlayaraq Ermənistanın hərbi təcavüzü ilə üzləşdiyini vurğulamış, işğalın acı nəticələrini açıqlamışdır.

Məqalədə rəsmi İslamabadın Dağlıq Qarabağ münaqişəsinin həllində ölkəmizi tam dəstəklədiyi bildirilmiş, Pakistan Senatı tərəfindən qəbul edilmiş müvafiq qətnamənin əsas müddəaları açıqlanmışdır. Münaqişənin həlli yolunda Azərbaycan Prezidenti İlham Əliyevin atdığı addımlardan, beynəlxalq təşkilatlar tərəfindən qəbul olunmuş qətnamələrdən, danışıqlar prosesindən ətraflı bəhs edən müəllif həmçinin ölkəmizin artmaqda olan hərbi potensialından da söz açmışdır.

Yazıda həmçinin Azərbaycan ilə Pakistan arasında ikitərəfli münasibətlərin əsas mərhələləri barədə də məlumat verilmişdir.

Pakistan Strateji Araşdırmalar İnstitutunun əməkdaşı Sabah Aslamın jurnalda yer alan "Mehriban Əliyeva - təhsil, sülh və inkişafın rəmzi" sərlövhəli məqaləsində Azərbaycanın birinci xanımı, Heydər Əliyev Fondunun prezidenti, UNESCO-nun və ISESCO-nun xoşməramlı səfiri, Milli Məclisin deputatı Mehriban Əliyevanın təşəbbüsü ilə Azərbaycanda və xarici ölkələrdə həyata keçirilən layihələr haqqında geniş söhbət açılmışdır. Vurğulanmışdır ki, fond təhsil, səhiyyə, humanitar, idman sahələrində, eləcə də Azərbaycanın və dünya mədəni irsinin qorunub saxlanması istiqamətində böyük işlər görür.

Yazının müəllifi Mehriban xanım Əliyevanın təşəbbüsü və dəstəyi ilə Pakistanda səhiyyə, təhsil, humanitar və digər sahələrdə həyata keçirilən layihələr barədə də geniş məlumat vermişdir. Azərbaycanın birinci xanımının yüksək insanpərvərliyi haqqında danışan S.Aslam məqaləsini Böyük Britaniyanın sabiq Baş naziri Uinston Çörçilldən gətirdiyi "Həyat əldə edilənlə yaşanılır, lakin həyat bəxş olunanla qurulur" sitatı ilə yekunlaşdırmışdır.

Pakistan Televiziya Assosiasiyasının redaktoru İrtaza Abbasın "Enerji ehtiyatları ilə zəngin Xəzər dənizi hövzəsinin strateji əhəmiyyəti" məqaləsində isə Xəzərin zəngin karbohidrogen ehtiyatları, Azərbaycanın neft strategiyası, bu dənizin hüquqi statusu ilə bağlı gedən danışıqlar prosesi, enerji daşıyıcılarının nəqli və hövzənin təhlükəsizlik məsələlərinə dair geniş tədqiqat aparılmışdır.

Jurnalın xüsusi buraxılışı Azərbaycanın Pakistandakı səfiri Daşqın Şikarovun ölkələrimiz arasında diplomatik əlaqələrin 20 illiyinə həsr olunmuş müraciəti ilə yekunlaşmışdır. Müraciətdə Azərbaycan-Pakistan münasibətlərinin siyasi, diplomatik, iqtisadi, sosial, humanitar və hüquqi-normativ aspektlərindən söz açılmış, xalqlarımız arasındakı oxşar cəhətlərdən bəhs edilmişdir.

Səfir rəsmi İslamabadın Ermənistan-Azərbaycan, Dağlıq Qarabağ münaqişəsinin həlli məsələsində ölkəmizin mövqeyini tam dəstəklədiyini, Pakistan Senatı tərəfindən 2012-ci il fevralın 1-də Xocalı soyqırımını tanıyan qətnamənin qəbul edildiyini diqqətə çatdıraraq bütün bunların Azərbaycan xalqı və rəhbərliyi tərəfindən böyük rəğbətlə qarşılandığını vurğulamışdır.

Jurnalda Prezident İlham Əliyevin, Azərbaycanın birinci xanımı Mehriban Əliyevanın və onun rəhbərlik etdiyi Heydər Əliyev Fondunun Pakistanda həyata keçirdiyi layihələrin, həmçinin Bakının gözəlliyinin çoxsaylı fotoşəkilləri yerləşdirilmişdir.

Jurnalla http://thediplomaticinsight.com elektron ünvanı vasitəsilə tanış olmaq mümkündür.

Azərbaycan.-2012.- 19 oktyabr.- S.5.