2012-ci ilin doqquz ayında Sabunçu rayonunun sosial-iqtisadi inkişafının yekunları və qarşıda duran vəzifələr müzakirə edilmişdir

Dünən Sabunçu Rayon İcra Hakimiyyətində rayonun 2012-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş yığıncağı keçirilmişdir. Yığıncağı giriş sözü ilə açan rayon icra hakimiyyətinin başçısı Adil Vəliyev Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2012-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş geniş iclasındakı nitqindən irəli gələn məsələlər barədə məlumat verərək hesabat dövründə Sabunçu rayonunda görülən işlərdən danışdı. A.Vəliyev vurğuladı ki, istər Sabunçu rayonunda, istərsə də respublikamızda davamlı sosial-iqtisadi inkişaf dövlət başçısı cənab İlham Əliyevin apardığı uğurlu daxili və xarici siyasətin nəticəsidir.

Rayonun 2012-ci ilin doqquz ayının sosial-iqtisadi inkişafının yekunları və qarşıda duran vəzifələr haqqında Sabunçu Rayon İcra Hakimiyyəti başçısının birinci müavini Qəzənfər Həsənov məruzə etdi. O bildirdi ki, doqquz ay ərzində ölkə iqtisadiyyatına 16 milyard dollar sərmayə qoyulmuşdur ki, bunun da təxminən 70 faizi daxili investisiyalardır. Burada özəl sektor da uğurla iştirak edir. Bütövlükdə özəl sektor ümumdaxili məhsulda öz yüksək çəkisini saxlayaraq 83 faizə çatdırmışdır ki, bu da Azərbaycanda bazar iqtisadiyyatı prinsiplərinin tam bərqərar olduğunu göstərir.

İqtisadi sahədəki inkişaf təbii ki, insanların yaşayış səviyyəsinə də təsirini göstərir. Cari ilin doqquz ayında əhalinin pul gəlirləri 12 faiz, inflyasiya isə cəmi 1,5 faiz artmışdır. Göründüyü kimi, inflyasiya ilə əhalinin pul gəlirləri arasında 10 faiz fərq var və bu da çox yaxşı göstəricidir.

Azərbaycanda artıq orta aylıq əməkhaqqı 500 dollar, orta pensiya isə 190 dollar təşkil edir ki, bu da MDB məkanında ən yüksək göstəricidir.

Məruzəçi sonra qeyd etmişdir ki, hazırda rayon üzrə məşğul əhalinin sayı 28748 nəfər, o cümlədən büdcə təşkilatlarında çalışanlar 1018 nəfər, sənayedə 7625 nəfər, tikintidə 1007 nəfər, nəgliyyatda 661 nəfər, təhsildə 5248 nəfər, səhiyyədə 4196 nəfər, digər sahələrdə 899 nəfərdir.

2012-ci ilin 9 ayı ərzində məşğulluq mərkəzində 971 nəfər vətəndaş iş axtarmaq məqsədilə qeydə alınmışdır. Onlardan 421 nəfəri işlə təmin olunmuşdur.

2012-ci ilin 9 ayı ərzində 2366 ailəyə orta hesabla 125 manat olmaqla ünvanlı dövlət sosial yardımı təyin olunmuşdur. 278 nəfər şəhid, 7 Milli Qəhrəman, 5 nəfər 20 Yanvar şəhidlərinin ailələrinə, 51 nəfər I qrup, 376 nəfər II qrup, 59 nəfər III qrup müharibə əlilinə Prezident təqaüdü, 1222 nəfərə kommunal xidmətlərə görə müavinət, 7843 nəfərə sosial müavinət təyin olunaraq ödənilmişdir.

Azərbaycan Respublikası Prezidentinin sərəncamı ilə təsdiq olunmuş "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində ümumən nəzərdə tutulmuş 16 sahəni əhatə edən 801 bənddən 119 bəndi Sabunçu rayonunun qəsəbələrini əhatə edir. 2011-ci və 2012-ci illərin doqquz ayı ərzində həmin bəndlər uyğun tədbirlərdən 32-si üzrə işlər başa çatdırılıb, 43-ü üzrə işlər davam etdirilir, 4-ü üzrə isə layihə-smeta sənədlərinin tərtibatı və digər hazırlıq işləri aparılmaqdadır. Qalan 14 bənd üzrə işlərin yerinə yetirilməsi 2013-cü ildə nəzərdə tutulmuşdur ki, artıq onlardan da 1-də işlərin icrasına başlanılmış, 1-də isə hazırlıq işləri aparılır.

Dövlət proqramında nəzərdə tutulan ən irihəcmli işlərdən biri təhsil sahəsidir ki, burada da 52 bənd üzrə 3472 şagird yerlik 4 yeni məktəbin tikintisi, mövcud 6 məktəbdə 2600 şagird yerlik 130 sinif otaqlarının tikintisi, 1 məktəbdə idman və akt zalının tikintisi, 3 yeni uşaq bağçasının tikintisi (iki yerdə 120 yerlik, bir yerdə isə 80 yerlik) və 43 təhsil obyektində (orta məktəb, uşaq bağçası və peşə məktəbləri binalarında) əsaslı təmir və bərpa gücləndirmə işlərinin yerinə yetirilməsi nəzərdə tutulmuşdur. Bunlardan 29-da artıq işlər başa çataraq istifadəyə verilmiş, 5-də isə işlər davam etdirilir. Qalan işlər 2012-ci və 2013-cü illərdə yerinə yetiriləcəkdir.

Qəzənfər Həsənov diqqətə çatdırmışdır ki, Əmək və Əhalinin Sosial Müdafiəsi Nazirliyi tərəfindən Zabrat qəsəbəsində yetkinlik yaşına çatmayanlar üçün 3 mərtəbəli 50 yerlik ixtisaslaşdırılmış reabilitasiya və 50 yerlik sosial sığınacaq, eləcə də gözdən əlillər üçün 4 mərtəbəli tədris bərpa mərkəzlərinin tikintisinə başlanılmışdır. Hazırda həmin obyektlərdə işlər davam edir. Hər üç binada xəstələrin sağlamlığının bərpası üçün əlavə idman korpuslarının tikintisi də nəzərdə tutulmuşdur.

Dövlət proqramı çərçivəsində Gənclər və İdman Nazirliyi tərəfindən Bakıxanov qəsəbəsinin Y.Əliyev küçəsində 3 mərtəbəli Gənclər evinin tikintisinə bu yaxınlarda başlanmışdır.

Sabunçu-Maştağa avtomobil yolunun Zabrat körpüsünə qədər olan məsafədə əsaslı təmiri və asfalt örtüyünün vurulması, ətraf sahələrdə abadlıq işlərinin aparılması başa çatdırılmış, cari ilin sentyabr ayının 27-də olkə Prezidenti cənab İlham Əliyevin iştirakı ilə istifadəyə verilmişdir. Sabunçu qəsəbəsinin Elşən Mehdiyev küçəsindən Bakıxanov qəsəbəsinə qədər yolda da təmir işləri tamamlanmışdır. Hazırda isə Y.Əliyev küçəsində, dəmiryolu keçidindən Sabunçu körpüsünə qədər yolun ətrafında yenidənqurma və abadlıq işləri davam etdirilməkdədir ki, bunların da xeyli hissəsi icra hakimiyyəti tərəfindən həyata keçirilir.

Ölkə Prezidenti İlham Əliyevin ötən ilin aprel ayında Sabunçu qəsəbəsində aparılan abadlıq işlərinin gedişatı ilə tanış olmasını qeyd edən Q.Həsənov dedi ki, sakinlərin müraciətini nəzərə alan ölkə başçısı 12 saylı şəhər poliklinikasının sökülərək yerində yenisinin tikinisi üçün Prezident fondundan 2,0 milyon manat vəsait ayrılması barədə sərəncam vermişdir. Hazırda həmin obyektin ümumi tikinti işləri başa çatmaq üzrədir.

"Yeniləşən Azərbaycanda yeni məktəb" devizi altında Heydər Əliyev Fondu tərəfindən Pirşağı qəsəbəsindəki 112 saylı məktəbin köhnə binası sökülərək yerində yeni 3 mərtəbəli tədris korpusunun tikintisi davam etdirilir.

Məruzəçi rayonda su təchizatı, kanalizasiya, qazlaşdırma, istilik sistemi, elektrik enerjisi, rabitə və başqa sahələrdə aparılan çoxsaylı işlərdən də geniş söz açdı.

Yığıncaqda çıxış edən rayonun bir sira idarə və təşkilatlarının rəhbərləri son 9 ayda görülən işlərdən, əldə olunmuş nailiyyətlərdən, həllini gözləyən problemlərdən və onların aradan qaldırılması yollarından söz açdılar.

Sonda rayon icra hakimiyyətinin başçısı Adil Vəliyev yekun nitqi söylədi.

B.ƏZİZLİ

Azərbaycan $g 2012.- 20 oktyabr.- S. 4.