İqtisadi strategiya xalqın rifah halının daha da yaxşılaşdırılmasına yönəldilib

Əhalinin sosial müdafiəsinin gücləndirilməsini hər zaman diqqət mərkəzində saxlayan ölkə başçısı İlham Əliyev hökumətin 2012-ci ilin 9 ayının sosial-iqtisadi inkişafının yekunlarına həsr olunmuş geniş toplantısında çıxış edərkən bu məsələləri yenidən diqqətə çəkdi. Bildirdi ki, insanların daha da yaxşı yaşaması, gəlirlərinin artmasına dövlət dəstəyinin gücləndirilməsi hökumətin siyasətinin əsas prioritetlərindəndir.

Bu bir həqiqətdir ki, Prezident İlham Əliyevin rəhbərliyi ilə müəyyənləşdirilən iqtisadi inkişaf siyasəti 5-10 il bundan öncə həyata keçirilməsi mümkün olmayan sosial proqramları reallaşdırmağa imkan verir. Hökumətin həyata keçirdiyi məqsədyönlü iqtisadi strategiya ölkənin siyasi və iqtisadi sabitliyinə, hər sahədə möhkəmlənməsinə əhəmiyyətli dərəcədə təsir edir. Ötən dövrdə Azərbaycan iqtisadiyyatı 1,1 faiz, qeyri-neft iqtisadiyyatı isə 10,3 faiz artıb. Azərbaycanda inkişaf prosesi sürətlə gedir, beynəlxalq maliyyə institutları, əsas reytinq agentlikləri ölkəmizin uğurlarını yüksək qiymətləndirir. Ölkəmizin kredit reytinqi artır. Regionların sosial-iqtisadi inkişafı Dövlət Proqramının icrası nəticəsində indiyə qədər ölkədə 1 milyon 100 min iş yerinin açıldığını deyən Prezident İlham Əliyev keçən rübdə hər bir sahədə ölkəmizin uğurlara imza atdığını bildirdi. Beynəlxalq arenada da ölkəmizin nüfuzu artıb: "BMT TŞ-də Azərbaycanın uğurları rəğbətlə qarşılanır. Qoşulma hərəkatına üzv olan 120 ölkə də Azərbaycanın ərazi bütövlüyünü dəstəkləyir. Bununla da dünyanın çox hissəsi Dağlıq Qarabağ münaqişəsinin həllini ərazi bütövlüyü çərçivəsində görür".

Azərbaycanda inkişaf strategiyasının başlıca istiqamətləri respublikanın mövcud potensialından səmərəli istifadə etməklə yoxsul təbəqənin, işsizliyin sayının minimuma endirilməsindən ibarətdir. Zəngin valyuta sərvətlərinin ölkəyə daxil olmasının fonunda bütün sosial təbəqələrin və sahələrin inkişafının yüksək sıçrayışla müşayiət olunması qaçılmazdır. Respublikanın maliyyə resurslarının və büdcə gəlirlərinin əsas xərc istiqamətlərinə diqqət yetirsək, görərik ki, vətəndaşların rifah halının yaxşılaşması, aztəminatlı ailələrin sosial müdafiə tədbirləri ilə əhatə edilməsi, sosial sahədə mövcud olan problemlərin aradan qaldırılması daim diqqət mərkəzindədir. Sosialyönümlü iqtisadiyyatı respublikanın strateji inkişaf və modernizasiya konsepsiyasının əsas təməllərindən biri kimi qiymətləndirmək olar.

Son 20 il ərzində əhalinin real gəlirləri 2,4 dəfə, ölkə üzrə iqtisadiyyatla məşğul olan işçilərin orta aylıq əməkhaqqı nominal ifadədə 107 dəfə artıb. Ötən il isə əhalinin pul gəlirlərində artım 20 faizə çatıb. Minimum aylıq əməkhaqqının məbləği 10, orta aylıq əməkhaqqı isə 9,6 faiz artaraq analoji olaraq 93,5-359,3 manata yüksəlib. Cari ilin 9 ayının yekunlarına görə bu rəqəm 12 faiz artım təşkil edib. Dünya Bankının məlumatında deyilir ki, milli gəlirin əhatəli bölgüsünə görə Azərbaycan inkişaf etmiş bir çox ölkəni geridə qoyur.

Oktyabrın 10-da Nazirlər Kabinetinin 2012-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxış edən ölkə başçısı İlham Əliyev ölkəmizdə müşahidə olunan inkişaf tendensiyasının əhalinin yaşayış səviyyəsinə müsbət təsir etdiyini vurğuladı və yeni neft strategiyasının bugünkü uğurlara yol açdığını da qeyd etdi. Qaz resurslarımız da təkcə "Şahdəniz"lə məhdudlaşmır. 2010-cu ildə ARDNŞ-in daxili imkanları hesabına "Ümid" yatağı, 2011-ci ildə "Total" və "Gaz de France" şirkətləri tərəfindən "Abşeron" yatağı aşkarlanıb.

İnkişafın Azərbaycan modelinin daha da zənginləşdirilməsi üçün dünya bazarlarında yeni ünvanların əldə olunmasını vacib hesab edən Prezident ilk növbədə alternativ variantların seçiminə diqqətlə yanaşır.

Avropa Birliyi ölkələrinin enerji təhlükəsizliyinin təminatında böyük imkanlara malik Xəzəryanı ölkələrin karbohidrogen ehtiyatlarından istifadə məsələlərinin müzakirəsində regionda geosiyasi cəhətdən daha əlverişli məkanda yerləşən Azərbaycana üstünlük verilməsi də siyasi cəhətdən sabit, sərmayələr cəhətdən etibarlı imkanı olan ölkəmizə maraqlardan irəli gəlir.

Prezidentin dediyi kimi, indi heç bir beynəlxalq layihənin reallaşması Azərbaycanın iştirakı olmadan mümkün deyil. Ölkəmiz tərəfindən irəli sürülən layihələrin heç birinin iflasa uğramadığını, hər birinin gözəl nəticələrlə sonuclandığını bildirən dövlət başçısı TANAP layihəsinin də əhəmiyyətindən danışaraq dedi ki, bu, sırf Azərbaycan-Türkiyə layihəsidir. Pay bölgüsü 80 faiz Azərbaycan, 20 faiz Türkiyə tərəfinə çatacaq: "Bu bizə imkan verəcək ki, öz qaz resurslarımızı Türkiyəyə və ondan sonra Avropaya daha böyük həcmdə nəql edək. Beləliklə, biz enerji siyasətimizdə əsas amil olan şaxələndirmə məsələlərinə tam şəkildə çatacağıq".

Respublikamızda sosial-iqtisadi siyasətlə bağlı islahatların keyfiyyətcə yeni mərhələ üzrə inkişaf etdirilməsindən, iqtisadiyyatda, insanların sosial müdafiəsində müsbət meyillərin gücləndirilməsindən, regionda və dünyada baş verən proseslərin təhlil olunmasının, öyrənilməsinin, milli mənafe və dövlətçilik baxımından tətbiqinin vacibliyindən bəhs edən Prezident dedi: "Bizim növbəti onilliklərlə də bağlı planlarımız olduqca aydındır".

Azərbaycan 2020-ci ilədək ümumi daxili məhsulun 2 dəfə artırılmasını qarşıya məqsəd qoyub. Başlıca hədəf Azərbaycanı inkişaf etmiş ölkələr sırasına çıxarmaqdır. Məqsədlərə nail olmaq üçün ciddi elmi əsaslara söykənən ən müasir idarəetmə üsullarının tətbiqi tələb edilir, strateji yanaşmaların daha uzunmüddətli dövrü əhatə etməsi zərurəti yaranır. Müşavirədə diqqət bir daha sosial sahəyə çəkildi. Bildirildi ki, ölkədə icra olunan ünvanlı yardım proqramı hazırda 127 minə yaxın ailəni əhatə edir. Hər ailəyə isə ayda orta hesabla 112 manat vəsait ödənilir. Araşdırmalar göstərir ki, ünvanlı yardım alan ailələrin təxminən 40 faizinin ailə tərkibində və əmlak vəziyyətində yaxın illərdə onların bu növ dəstək almaq hüququna təsir edəcək dəyişikliklər gözlənilmir. Ona görə də belə ailələrə təyinat müddətinin iki, yaxud üç ilədək uzadılması barədə aidiyyəti orqanlara təkliflər göndərilmişdir. Mütərəqqi dünya təcrübəsi əsasında icra olunan "Özünədəstək" proqramı məhz müvafiq potensialı olan aztəminatlı ailənin məşğulluğuna imkan yaratmaqla onun yoxsulluqdan çıxmasına şərait yaradır. Proqramın davamı kimi ölkəmizdə ilk dəfə olaraq Sosial Dəstək Fondunun yaradılmasına, aztəminatlı ailələrə güzəştli mikrokreditlərin verilməsi mexanizminin tətbiqinə hazırlıq işləri aparılır. Bununla da müəyyən potensiala malik yoxsul ailələr şəxsi təsərrüfatlarını inkişaf etdirmək imkanı qazanacaqlar.

Məlumat verildi ki, indiyədək 5 minə yaxın mənzil tikilərək istifadəyə verilmişdir və növbədə dayanan bütün müharibə əlilləri və şəhid ailələrinin yaxın bir neçə ildə yeni mənzillə təmin olunmaları barədə tapşırıqlara əməl olunacaq. Belə ki, cari ilin sonunadək ölkənin müxtəlif bölgələrində ümumilikdə 411 mənzil əlil və şəhid ailələrinə təqdim olunacaq, yaxın aylarda ayrı-ayrı bölgələrdə 510 mənzildən ibarət binaların inşasına başlanılacaqdır. "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" həmin yaşayış məntəqələrində yeni sosial müdafiə əhəmiyyətli müəssisələrin də inşasına şərait yaratmışdır. Ölkəmizin davamlı sosial-iqtisadi inkişafı demoqrafik vəziyyətə də müsbət təsir göstərmişdir. Yaşlı insanların sosial vəziyyətinin daha da yaxşılaşdırılması və onlara dövlət qayğısının artırılması məqsədilə növbəti dövlət proqramının hazırlanması üçün müvafiq tədbirlər görülməkdədir.

Dövlət başçısı bir daha diqqəti bu məsələyə çəkərək bildirdi ki, 9 ayda əhalinin pul gəlirləri 12 faiz, inflyasiya isə cəmi 1,5 faiz artmışdır: "Gördüyünüz kimi, inflyasiya ilə əhalinin pul gəlirləri arasında 10 faiz fərq vardır və hesab edirəm ki, Azərbaycan bu göstəricilərə görə dünya miqyasında ən qabaqcıl yerlərdədir. Bizim bütün iqtisadi təşəbbüslərimiz və ümumiyyətlə, iqtisadi strategiyamız Azərbaycan xalqının rifah halının yaxşılaşdırılmasına yönəldilmişdir. Biz bu istiqamətdə böyük nailiyyətlərə çatmışıq və bu göstəricilər görülən işlərin məntiqi nəticəsidir".

Rəsmiyyə RZALI

Azərbaycan.-2012.- 21 oktyabr.- S. 1-4.