Təcavüzkarlıq siyasəti Ermənistanı uçuruma aparır

Ermənistan bu günlərdə okeanda fırtınaya düşmüş bir gəmiyə bənzəyir. Gəminin kapitanı aciz və səriştəsiz olduğu üçün batmaqda davam edir. Sərnişinlər tam ümidsizdirlər. Çünki onlar düşdükləri vəziyyətin çətinliyini və kapitanın acizliyini yaxşı bilirlər. Ancaq Allahdan kömək diləməkdən başqa əllərindən heç nə gəlmir.

Bu bir həqiqətdir ki, son illər Ermənistanda hakimiyyətdə olanlar bu ölkəni çıxılmaz vəziyyətə salıblar və bu dövlət batmaqda olan gəmini xatırladır. Dağlıq Qarabağa azadlıq və müstəqillik şüarı ilə hakimiyyəti zəbt edən bir qrup terrorçu erməni xalqını çarəsi çətin tapılan bəlalara düçar edib.

Koçaryan hakimiyyətindən heç bir fayda görməyən ermənilər ondan da aciz və qaniçən S.Sarkisyanın rəhbərliyinin dəhşətlərini yaşayırlar. Siyasəti terrora, şantaja və separatizmə arxalanan bu hakimiyyətin tutduğu yol Ermənistanı bəlalardan xilas etməyə deyil, daha dərin uçurumlara, fəlakətlərə aparmağa hesablanıb.

Ermənistan rəhbərləri düşdükləri çətin vəziyyəti hər vasitə ilə ört-basdır etməyə çalışsalar da, bunu bacarmırlar, əksinə, bir çox hallarda öz çıxışları ilə özlərini inkar edirlər. Bir tərəfdən Ermənistanı müstəqil, azad, demokratik bir dövlət kimi təqdim edənlər digər tərəfdən erməni xalqının varlığını Rusiyasız, İransız, erməni lobbisiz təsəvvür etmədiklərini dilə gətirir, bununla yanaşı, cəmiyyətdə korrupsiya, özbaşınalıq hallarının baş alıb getdiyini, insanların həyat şəraitinin gündən-günə pisləşdiyini, böhranın dərinləşdiyini bildirirlər.

Əsl həqiqətləri isə əldə olunan nəticələr, real faktlar və hadisələr əks etdirir. Reallıqlar isə Azərbaycanla müqayisədə tamamilə Ermənistanın əleyhinədir. Azərbaycanın beynəlxalq aləmdə nüfuzu nə qədər yüksəlirsə, Ermənistan o qədər hörmətdən düşür.

İndi əksər beynəlxalq təşkilatlar, bir çox dövlətlər Ermənistanı öz müstəqil siyasəti olmayan respublika kimi tanıyır və bu dövləti işğalçılıq siyasətindən əl çəkməyə, zəbt olunmuş Azərbaycan torpaqlarını azad etməyə çağırır.

Azərbaycan BMT-nin qeyri-daimi üzvü kimi dünyada sülhün və əmin-amanlığın bərpa edilməsi sahəsində fəal iş apardığı, düzgün və düşünülmüş siyasəti ilə beynəlxalq aləmin diqqətini cəlb etdiyi halda, Ermənistan işğalçılıq siyasətindən əl çəkmir, hər gün atəşkəsi pozur, günahsız insanları qətlə yetirir, beynəlxalq təşkilatların qərar və qətnamələrinə məhəl qoymur.

Təəssüflər olsun ki, BMT, ATƏT, İslam Konfransı Təşkilatı və digər nüfuzlu qurumlar Ermənistanın təcavüzkarlıq hərəkətlərinə qarşı ciddi tədbirlər görmür, hadisə və faktlara bir çox hallarda ikili mövqedən yanaşır, qəbul etdikləri qərar və qətnamələrə hörmətsizlik nümayiş etdirirlər. ATƏT-in Minsk qrupunun həmsədr ölkələri Qarabağ nizamlamasında irəliləyiş olmamasından narazılıqlarını ifadə etsələr də, əməli işə keçməkdən, işğalçını cəzalandırmaqdan, haqqın-ədalətin bərpa edilməsindən çəkinirlər.

Azərbaycan Respublikasının Prezidenti cənab İlham Əliyev ikili standartlara öz mənfi münasibətini dəfələrlə bildirərək qeyd etmişdir ki, münaqişənin nisamlanması üçün 20 ildir ki, beynəlxalq vasitəçi qrup fəaliyyət göstərir, amma heç bir nəticə yoxdur.

Ölkə rəhbəri beynəlxalq təşkilatlardan narazılığını gizlətmir, onların nöqsanlarını söyləyir. Ermənistan-Azərbaycan, Dağlıq Qarabağ nünaqişəsinin həllində düzgün, obyektiv mövqe tutulmamasından, əksinə, yeri gələndə təcavüzkara dəstək verilməsindən danışır və bildirir ki, "Azərbaycan düşmən qarşısında təkbaşına mübarizə aparır".

Əlbəttə, Azərbaycan Prezidenti bu ifadələri işlədərkən dövlətinin və xalqının gücünə, ölkənin iqtisadi potensialına və beynəlxalq aləmdəki nüfuzuna, düşünülmüş düzgün siyasətə, insanların ona olan hörmət və etimadına arxalanır. Beynəlxalq hüququn norma və prinsiplərinə, haqqa, ədalətə, bir milyondan artiq qaçqın və köçkünün ağır vəziyyətinə istinad edir.

Dövlətimizin başçısı həm də bütün dünyaya bəyan edir ki, "Dağlıq Qarabağ münaqişəsi dondurulmayıb, amma sülh olduqca kövrəkdir. Nə sülh, nə də müharibə şəraiti həmişəlik davam edə bilməz".

Azərbaycan Prezidentinin fikirləri ilə dünyanın ağıllı siyasətçiləri, bir çox nüfuzlu qurumlar, hətta Ermənistanın düşdüyü ağır vəziyyəti düzgün qiymətləndirən ermənilər də həmfikirdirlər.

Beynəlxalq təşkilatlar, ATƏT-in Minsk qrupunun həmsədrləri Dağlıq Qarabağ münaqişəsinin həllində irəliləyişin olmamasını, status-kvonun saxlanılmasını mənfi hal kimi qiymətləndirirlər. Bir çox tanınmış siyasətçilər zamanın Azərbaycanın lehinə işlədiyini, Ermənistanın isə gündən-günə zəiflədiyini qeyd edirlər.

Bu günlərdə Azərbaycanda səfərdə olmuş Türkiyənin keçmiş baş naziri Məsud Yılmaz ölkəmizlə tanışlıqdan sonra Ermənistan-Azərbaycan, Dağlıq Qarabağ münaqişəsindən söz açaraq demişdir: "Ermənistanın haqsız mövqeyini davam etdirməsi mümkün deyil. Sonunda ermənilər mütləq məğlub olacaqlar. Zaman Azərbaycanın lehinə işləyir".

Məsud Yılmaz "Bütün Türkiyə bugünkü Azərbaycanla qürur duyur" sözlərini dilə gətirərkən ilk növbədə respublikamızın dünyada qazandığı nüfuzuna, ölkənin sosial-iqtisadi inkişafına, qardaş ölkələrin birliyinə və əməkdaşlığına, bir-birilərinə dəstək vermələrinə, müstəqil siyasət yeritmələrinə istinad edir.

Dünyada təklənməkdə olan, ancaq təcavüzkarlıq siyasətindən əl çəkməyərək Türkiyə, Azərbaycan, Gürcüstan dövlətlərinin ərazilərində gözü olan və "böyük Ermənistan" xülyası ilə yaşayan terrorçu Ermənistan düşdüyü böhrandan çıxış yolunu qonşu ölkələrlə münasibətləri yaxşılaşdırmaqda görmək əvəzinə, əksinə, bu respublikalarla vəziyyəti gərginləşdirir. Əsassız torpaq iddiaları, qonşu dövlətlərlə əlaqələrin zəifləməsi Ermənistanı mühüm layihələrdən kənarlaşdırır, ölkə iqtisadiyyatına ağır zərbə vurur və əhalinin güzəranını ildən-ilə çətinləşdirir.

Bu gün Azərbaycanın valyuta ehtiyatı 40 milyard dollardan artıq olduğu halda, Ermənistanın dövlət büdcəsinin kəsiri 400 milyon dollardan çoxdur. Orduda, səhiyyədə, təhsildə korrupsiya halları, ölkədəki özbaşınalıq, qarşıdurmalar bu dövləti iflic etmişdir. Başda S.Sarkisyan olmaqla, digər vəzifə sahibləri də bu vəziyyəti ancaq təəssüflə qeyd etməklə kifayətlənir və heç bir əməli tədbir görə bilmirlər.

Ermənilər böhranın ağırlığını hiss edir, onun nəticələrinin gələcəkdə daha böyük fəsadlar yaradacağını duyur və hadisələri ürək ağrısı ilə izləyirlər. Ermənistan Milli Konqresinin lideri Levon Ter-Petrosyan erməni xalqının aldadıldığını, bir qrup terrorçu rəhbər tərəfindən terrora məruz qaldığını bəyan edərək deyir: "Ermənistan güclü dövlət olmaq üçün Türkiyə ilə münasibətləri normallaşdırmalı, Dağlıq Qarabağ problemini həll etməli və korrupsiyanı aradan qaldırmalıdır".

Ölkənin taleyinə biganə olmayan bir çox erməni siyasətçiləri, ziyalıları da bu fikirdədir. Ancaq Ermənistanın dövlət rəhbərləri istər beynəlxalq təşkilatların, istərsə də erməni xalqının istəklərinin əleyhinə hərəkət edir, status-kvonun dəyişməməsi üçün əsassız iddialar irəli sürür, təxribata, şantaja, təqiblərə əl atır, aqressiv təsir vasitələrindən istifadə etməyə çalışırlar. Lakin onlar dərk etmirlər ki, son illərdə Azərbaycan qüdrətlənib və hər hansı təsir onun üçün qəbuledilməzdir. Azərbaycanla təzyiq və təsir dili ilə danışmaq heç zaman fayda verməz.

Azərbaycan Respublikasının Prezidenti cənab İlham Əliyev bütün problemlərin qarşılıqlı anlaşma şəraitində həll olunmasının tərəfdarıdır və təzyiq vasitəsinin önəmli olmadığını, ölkəsinin bu təzyiqlərdən çəkinmədiyini dəfələrlə bildirərək demişdir: "Qarşılıqlı anlaşma ancaq qarşılıqlı etimad və hörmət əsasında yaradılmalıdır".

Qarşılıqlı etimad və hörmət olmadan ikitərəfli anlaşmanın mümkünsüzlüyünü bildirən ölkəmizin rəhbəri sülh yolu ilə torpaqlarımızın işğaldan azad edilməsinə nail ola bilməyəcəyimiz halda başqa vasitələrdən istifadə olunacağını bəyan edir.

Öz ərazi bütövlüyünü bərpa etmək və işğal altında olan torpaqlarını təcavüzkarlardan təmizləmək Azərbaycan xalqının borcu və haqqıdır. Beynəlxalq hüququn norma və prinsipləri bunu təsdiq edir. Azərbaycanın dünyada artan nüfuzu, iqtisadi və hərbi gücü Ermənistanla münasibətləri istər sülh, istərsə də hərb yolu ilə öz xeyrinə həll etməyə imkan verir. Bunu erməni xalqı dərk etsə də, Ermənistanın hakim dairələri başa düşməkdə acizdirlər. Bu acizlik və yeridilən təcavüzkarlıq siyasəti isə Ermənistanı daha dərin uçurumlara aparır.

Tahir RZAYEV,

Milli Məclisin deputatı

Azərbaycan.-2012.- 21 oktyabr.- S. 4.