«Əl işdən soyumur, ürək arzudan»

Ölkə başçısının bölgələrə hər işgüzar səfəri əsl bayrama çevrilir. Neçə-neçə istehsal müəssisəsinin, sosial obyektin təməli qoyulur, yeniləri istifadəyə verilir. Hər təzə tikili şəhərlərimizi, qəsəbə və kəndlərimizi gözəlləşdirməklə yanaşı, yeni iş yerlərinin açılmasına, insanların məşğulluğunun artmasına, sosial həyat tərzinin, yaşayış səviyyəsinin yüksəlməsinə şərait yaradır.

Prezident rayonlara səfər edəndə əhali ilə görüşüb səmimi söhbətlər aparır, onları düşündürən məsələlərlə maraqlanır. Belə iş metodunun üstünlüyü çoxdur. Ölkə başçısı bölgələrdəki real vəziyyəti yerində öyrənir, verdiyi tövsiyə və tapşırıqların icra vəziyyəti ilə tanış olur. Bu da hamını daha yaxşı işləməyə, qurub-yaratmağa ruhlandırır.

Prezident İlham Əliyev bu il iyul ayının 31-də Lənkəranda oldu. Sayca 8-ci olan bu səfərin də əhəmiyyəti "Cənub mirvarisi" sayılan qədim, zəngin tarixə, mədəniyyətə, adət-ənənələrə, gözəl təbiətə malik olan diyar üçün ölçüyəgəlməzdir. Prezident yenidən qurulan Heydər Əliyev Mərkəzi, Dövlət Sərhəd Xidmətinin əsaslı təmir edilən Lənkəran Sərhəd Dəstəsi Qarnizonu, Bayraq meydanı ilə tanış oldu, Gənclər Mərkəzinin, hotel kompleksinin təməlqoyma mərasimində iştirak etdi. Heydər Əliyev Mərkəzi qarşısında ictimaiyyətin nümayəndələri ilə görüşü zamanı dedi: "Çox şadam ki, Lənkəranda işlər yaxşı gedir. Rayon inkişaf edir, şəhər gözəlləşir, abadlaşır, gözəl binalar ucaldılır... Ona görə mən əminəm ki, Lənkəranda hələ görüşlərimiz, açılışlar, tədbirlər çox olacaqdır..."

Lənkəranlılar adından çıxış edən Mənsur Ağayev isə öz ürək sözlərini belə ifadə eidi: "Cənab Prezident, biz bilirik ki, Sizin əsas məqsədiniz hər bir azərbaycanlı ailəsinin firavan yaşamasıdır. Siz əhalinin bütün zümrələrinə eyni məhəbbətlə, eyni həssaslıqla yanaşırsınız. Sovet dövründən qalan əmanətlərin əhaliyə verilməsi buna daha bir bariz nümunədir. Sizin diqqət və qayğınız sayəsində Lənkəran abadlaşır, gözəlləşir, Azərbaycanın dilbər guşələrindən birinə çevrilir. Bütün bunlara görə lənkəranlılar Sizə minnətdardırlar".

Ölkə rəhbərinin səfərindən keçən 3 aya yaxın dövr ərzində Lənkəranda çox işlər görülüb. Tikinti-abadlıq işləri davam edir. Küçələr təmir olunur, çoxmərtəbəli yaşayış evləri, hasarlar gülbax lay daşı ilə üzlənir, park və xiyabanlar abadlaşdırılır, şəhərin mərkəzindəki Heydər Əliyev parkı yenidən qurulur.

Lənkəranlılar cari ili uğurla başa vurmağa hazırlaşırlar. Bunu Nazirlər Kabinetinin 2012-ci ilin 9 ayının yekunlarına həsr olunmuş iclasındakı Prezidentin nitqindən irəli gələn vəzifələrlə əlaqədar Lənkəranda keçirilən tədbir bir daha göstərdi. Şəhər icra hakimiyyətinin başçısı Taleh Qaraşovun məruzəsində ötən vaxt ərzində görülmüş işlər, qarşıda duran vəzifələr ətraflı təhlil edildi. Qeyd olundu ki, 9 ay ərzində rayon üzrə ümumi məhsul istehsalı 4,2 faiz artaraq 225 milyon manat təşkil etmişdir. Sənayedə 17,1 milyon manatlıq və ya ötən ilin müvafiq dövrünə nisbətən 5,9 faiz çox məhsul istehsal olunmuşdur. Qeyri-dövlət sektorunda sənaye istehsalının həcmi 3,1 faiz artmış və ümumi həcmdə onun xüsusi çəkisi 77,7 faizə çatmışdır. Müasir standartlara cavab verən "Nur-Süd" MMC-də "Pal-Süd" markası ilə 12 çeşiddə yüksək keyfiyyətli süd və süd məhsulları istehsal edilir. Onlar daxili bazarda satılmaqla yanaşı, xarici ölkələrə də ixrac olunur. 9 ayda müəssisədə 5,1 milyon litr süd və süd məhsulları istehsal edilmişdir. Bunlardan əlavə, Lənkəranın sənaye müəssisələrində 15 min ton dondurulmuş balıq, 184 ton quru çay, 2,6 min kubmetr tikinti kərpici buraxılmışdır.

Dövlət başçısının aqrar sahəyə diqqət və qayğısı sayəsində kənd təsərrüfatı məhsulları istehsalına maraq artmışdır. İstifadəyə verilmiş "Gilan-Lənkəran" konserv zavodu, çay fabriki, "Lənkəran konserv" ASC və hazır məhsulların saxlanma kamerası aqrar sahənin inkişafını sürətləndirmişdir. Sahələrdən nəzərdə tutulduğundan çox taxıl, kartof, tərəvəz və digər kənd təsərrüfatı məhsulları yığılmışdır. 220 hektar sahədə yeni çay plantasiyası salınmış və daha 100 hektarda əkin işləri davam etdirilir. Hesabatdan o da məlum oldu ki, keçən ilin 9 ayı ilə müqayisədə mal-qaranın sayı 7,4, diri çəkidə ət istehsalı 5, süd istehsalı 4,2 və yumurta istehsalı 0,2 faiz artmış, iqtisadiyyatın və sosial sferanın inkişafına 45,5 milyon manat investisiya yönəldilmişdir. İlin əvvəlindən ötən 9 ayda əhalinin məşğulluğunun təmin edilməsi üçün 1245 yeni iş yeri açılmışdır. Ümumilikdə 2003-cü ildən indiyədək rayonda 29 mindən çox yeni iş yeri yaradılmışdır ki, onun da 16 min 683-ü daimidir. Bunlardan əlavə, əhaliyə göstərilən ticarət, nəqliyyat, poçt, rabitə xidmətlərinin keyfiyyəti və həcmi xeyli genişləndirilmiş, əhalinin pul gəlirləri artmışdır.

Son məlumata görə, sahibkarlığın inkişafı nəticəsində rayonda istehsal həcminin sənayedə 77,7, aqrar bölmədə 99,9, pullu xidmətdə isə 79,6 faizi özəl sektorun payına düşür. Bu yüksək göstəricinin əsas səbəbi dövlətin ölkədə sahibkarlığın inkişafına göstərdiyi qayğıdan irəli gəlir. Məsələn, 9 ayda lənkəranlı sahibkarlara və iş adamlarına kredit təşkilatları tərəfindən 43,6 milyon manat kredit verilmişdir.

Hesabat dövründə əhaliyə göstərilən kommunal xidmətlərin yaxşılaşdırılması, rayonun normal elektrik enerjisi və təbii qazla təchiz olunması, Lənkəran şəhərində içməli su və kanalizasiya sisteminin yenidən qurulması istiqamətində də tədbirlər həyata keçirilmişdir. Lənkəran Elektrik Şəbəkəsi tərəfindən 11,5 kilometr hava xətti yenidən qurulmuş, 1,7 kilometr yeni xətt, 48,5 kilometr SİP kabel çəkilmiş, SMART kart tipli sayğacların sayı 14,3 minə çatdırılmış, 3 yeni transformator yarımstansiyası quraşdırılmışdır. Rayon qaz istismarı sahəsi əhalinin və müəssisələrin təbii qazla təmin olunması üçün bir sıra işlər həyata keçirmişdir. Hazırda Lənkəran şəhərinin 75 faizi, Liman şəhəri və rayonun digər 8 yaşayış məntəqəsi təbii qazla təmin edilir. İlin sonunadək daha 2 min abonenti olan 34 yaşayış məntəqəsinə "mavi yanacaq" verilməsi proqnozlaşdırılır. Bu da rayonun 80 faizinin qazlaşdırılması deməkdir.

Bunlardan əlavə, Lənkəran şəhərindəki bir sıra yaşayış binalarının içməli su və kanalizasiya xətləri qaydaya salınmış, nasos stansiyalarındakı elektrik nasosları və mühərriklər təmir olunmuşdur. Yeri gəlmişkən, Lənkəran şəhərinin su və kanalizasiya sisteminin yenidən qurulması ikinci regional inkişaf Dövlət Proqramına daxil edilmişdir.

Məruzədə rayon ərazisinin yol təsərrüfatında görülən tədbirlərdən də geniş bəhs olundu. Bildirildi ki, 42 saylı Yol İstismar İdarəsi tərəfindən 9 ay ərzində Ələt-Astara, Lənkəran-Lerik, Lənkəran-Zövlə avtomobil yolunda cari təmir işləri görülmüş, şəhərin küçələrinə təzə asfalt döşənmiş, 40 min nəfər əhalisi olan 20 yaşayış məntəqəsini birləşdirən Vilvan-Osaküçə-Türkəncil avtomobil yolunun 16,5 kilometrlik hissəsi genişləndirilmiş və çətin təbii şəraitdə çəkilən bu yolun üzərində yeni avtomobil körpüsü və suötürücü qurğular tikilmiş, eləcə də 28 min əhalinin yaşadığı və 16 yaşayış məntəqəsi arasında əlaqə yaradan yolun yenidən qurulmasına başlanmışdır.

Təhsil sahəsində də müəyyən işlər görülmüş, onun maddi-texniki bazası xeyli yaxşılaşdırılmışdır. Şilavar kəndində 220, Hirkan qəsəbəsində 480, Xarxatan kəndində 360 yerlik məktəb binaları tikilib istifadəyə verilmişdir. Hazırda Vilvan kəndində 640 yerlik yeni orta məktəb binası tikilir. Eyni zamanda, ötən dövr Mərkəzi Rayon Xəstəxanası (MRX) və digər səhiyyə ocaqlarında əhaliyə göstərilən tibbi xidmətin səviyyəsinin yaxşılaşdırılması üçün bir sıra tədbirlər görülmüşdür. Prezidentin sərəncamı ilə MRX-nin əsaslı təmiri üçün ayrılan 3 milyon manat vəsait hesabına hazırda burada təmir işləri aparılır.

Məlum olduğu kimi, dövlət başçısının sərəncamı ilə 2012-ci il ölkəmizdə "İdman ili" elan edilib. Bununla bağlı Lənkəran Gənclər və İdman İdarəsinin təşkilatçılığı ilə boks, şahmat, ağır atletika və futbol üzrə rayon birinciliyi keçirilib. Şahmat üzrə Bakı şəhərində gənclər arasında ölkə birinciliyində rayonun bir şahmatçısı 3-cü yeri tutub. Futbol üzrə yeniyetmələrin 8-ci respublika turnirində də Lənkəran idmançıları fəxri yer tutaraq finala vəsiqə qazanmışlar. Onu da qeyd edək ki, lənkəranlı Ramin Əzizov taekvondo idman növü üzrə 2012-ci il London Yay Olimpiya Oyunlarının iştirakçısı olmuşdur. Onu da vurğulayaq ki, Lənkəran 2 böyük beynəlxalq çempionata ev sahibliyi etmişdir. May ayında veteran ağır atletlər arasında Avropa çempionatı, sentyabr ayında 17 yaşadək qızlar arasında futbol üzrə dünya çempionatının 3 oyunu Lənkəranda keçirilmişdir.

Dünya miqyaslı tədbirlərin Lənkəranda yüksək səviyyədə keçirilməsi bir daha onu göstərir ki, buradakı sosial-iqtisadi inkişaf, həyata keçirilən iri həcmli infrastruktur layihələri şəhərin şöhrətini beynəlxalq əlaqələr səviyyəsinə yüksəltmişdir.

Uğurlarla yanaşı, rayonda həllini gözləyən bir çox məsələlər də var. Məruzəçi qeyd etdi ki, onların aradan qaldırılması üçün şəhər, qəsəbə və kəndlərin inkişafı ilə bağlı yeni infrastruktur layihələri həyata keçiriləcək, su-kanalizasiya sistemi yenidən qurulacaq, elektrik təsərrüfatının yaxşılaşdırılması və qazlaşdırma işləri davam etdiriləcək. Aqrar sahədə işlərin sürətləndirilməsi, çayçılığın inkişafına diqqətin artırılması, sahibkarlığın daha da inkişaf etdirilməsi, yeni iş yerlərinin yaradılması da ardıcıl tədbirlər görülməsini tələb edən məsələlərdir. Gələcəkdə yeni məktəblər, uşaq bağçaları, səhiyyə, mədəniyyət ocaqları tikilməli, bir sıra kənd yolları yenidən qurulmalıdır. Bu arzu-niyyətlə Lənkəranda hər sahədə dirçəliş, inkişaf var və bu işlər getdikcə daha geniş vüsət alır.

Seyran CAVADOV

Azərbaycan.-2012.- 23 oktyabr.- S.5.