Yeni Azərbaycan Partiyasının rəhbərliyi Bilgəhdəki müharibə və əmək əlilləri üçün pansionatda olmuşdur

Oktyabrın 24-də Yeni Azərbaycan Partiyası (YAP) sədrinin müavini-icra katibi, Milli Məclisin deputatı Əli Əhmədov, icra katibinin müavinləri, idarə heyətinin üzvləri, Sabunçu Rayon İcra Hakimiyyətinin rəhbərliyi və partiyanın rayon təşkilatının təmsilçiləri Bilgəhdəki müharibə və əmək əlilləri üçün pansionatda olmuşlar.

AzərTAc xəbər verir ki, görüşdə Əli Əhmədov Qurban bayramı münasibətilə YAP-ın sədri, ölkə Prezidenti İlham Əliyevin adından əlilləri, ahılları təbrik etmiş, dövlət başçısının ehtiyacı olan şəxslərə, xüsusən ahıl və əlillərə daim diqqət və qayğı göstərdiyini bildirmişdir. Qeyd edilmişdir ki, onların rahat yaşaması, ehtiyaclarının ödənməsi üçün dövlətimiz tərəfindən bütün lazımi addımlar atılır.

Azərbaycanın son illər qazandığı genişmiqyaslı uğurlardan danışan Əli Əhmədov qeyd etmişdir ki, YAP əhalinin müxtəlif təbəqələrinin nümayəndələri ilə, o cümlədən də ahıl insanlarla, qocalar evində yaşayanlarla mütəmadi görüşlər keçirir, onların problemləri ilə maraqlanır, imkan daxilində onlara kömək göstərilir.

Əli Əhmədov vurğulamışdır ki, hazırda ahıl və əlil, kimsəsiz insanlar üçün yeni bina tikilir. Yeni bina istifadəyə veriləndən sonra bu qəbildən olan insanların həyat şəraiti daha da yaxşılaşacaqdır.

Ə.Əhmədov məmnunluq hissi ilə qeyd etmişdir ki, burada yaşayan insanların gümrahlığı, əhval-ruhiyyəsinin yaxşı olması YAP üzvlərinin hamısını sevindirir. Bu cür yüksək şərait hökumətin həyata keçirdiyi siyasətin humanizmindən, insanpərvərliyindən, insanlara qayğısından xəbər verir. Prezident İlham Əliyevin həyata keçirdiyi siyasətin əsas qayəsi də ondan ibarətdir ki, dövlətimizin iqtisadi imkanlarından hər bir vətəndaşın həyatının yaxşılaşdırılması üçün istifadə edilsin, o cümlədən də qocalar evləri diqqət mərkəzindən kənarda qalmasın.

Pansionat sakinləri ömürlərinin ahıl vaxtlarında respublika rəhbərliyinin onlara yaratdığı şəraitə, göstərilən diqqət və qayğıya görə minnətdarlıqlarını bildirmişlər. Qeyd etmişlər ki, bu gün ölkədə aparılan geniş quruculuq işləri onları da sevindirir.

Sonda pansionat sakinlərinə bayram sovqatı verilmişdir.

Azərbaycan.-2012.- 25 oktyabr.- S.2.