Elmi-nəzəri konfrans

Azərbaycan Dövlət Mədəniyyət və İncəsənət Universitetində dünya romantizminin görkəmli nümayəndəsi filosof-şair Hüseyn Cavidin anadan olmasının 130 illik yubileynə həsr olunmuş beynəlxalq elmi-nəzəri konfrans keçirilib. Mütəfəkkir-şair, görkəmli dramaturq Hüseyn Cavid Azərbaycan ədəbiyyatı tarixində orijinal ədəbi simalardan biri olmaqla yanaşı, xalqımızın minillik ədəbiyyatının növbəti inkişaf mərhələsi sayılan XX əsr Azərbaycan romantizmi də hamıdan çox onun adı ilə bağlıdır. Çünki Hüseyn Cavid orijinal bir dramaturq kimi ədəbiyyat aləmində 1910-1912-ci illərdən tanınır.

Azərbaycan Respublikasının Prezidenti İlham Əliyevin imzaladığı müvafiq sərəncamdan irəli gələn tədbirlər planına uyğun olaraq, keçirilən konfransda H.Cavidin dünya romantizmində tutduğu mövqe məruzələrin əsas mövzusu olub. O da qeyd edilib ki, Azərbaycan milli romantizminin poetika və estetikasının təşəkkülü H.Cavidin adıyla bağlıdır. Cavid Şərq-Qərb romantizm ənənələrini yeni bir zirvəyə qaldırmış qüdrətli sənətkardır.

Konfransın plenar iclasını açan ADMİU-nun rektoru, professor Timuçin Əfəndiyev çıxış edərək 1982-ci ildə ulu öndər Heydər Əliyev tərəfindən Hüseyn Cavidin nəşinin uzaq Sibirdən gətirilməsi ilə bağlı fikirlərini bildirib, ölkə başçısı cənab İlham Əliyevin dahi Cavidin yubileyi ilə əlaqədar sərəncamın ədəbi-tarixi əhəmiyyətini qeyd edib. O, Cavidin romantik fəlsəfəsindən və səmavi qəhrəman konsepsiyasından danışıb.

Konfransda dünyanın bir çox ölkəsindən, o cümlədən, ABŞ, Türkiyə, Özbəkistan, Almaniya və Rusiyadan mütəxəssislər iştirak ediblər. Plenar iclasdan sonra konfrans bölmə iclasları ilə öz işini davam etdirib.

Azərbaycan.-2012.- 25 oktyabr.- S.7.