Vyana Forumunda «Xocalıya ədalət» kampaniyasının təqdimatı keçirilmişdir

Avstriyanın paytaxtında keçirilən Avropa ölkələrində təhsil alan azərbaycanlı tələbələrin Vyana Forumu çərçivəsində oktyabrın 27-də "Xocalıya ədalət" beynəlxalq məlumatlandırma kampaniyasının növbəti illər üçün fəaliyyət planı müzakirə edilmişdir.

AzərTAc xəbər verir ki, əvvəlcə forumda iştirak edən 100-ə yaxın xaricdə təhsil alan azərbaycanlı tələbəyə və Azərbaycan Respublikasının Avropanın 30 ölkəsində akkreditə olunmuş səfirlərinə "Xocalıya ədalət" kampaniyasının fəaliyyəti və kampaniya çərçivəsində əldə olunmuş uğurlar barədə məlumat verilmişdir.

Daha sonra kampaniyanın gələcək strategiyası ilə bağlı təkliflər müzakirə edilmişdir. Müzakirələr zamanı kampaniyanın Azərbaycan və xüsusilə, Xocalı soyqırımı barədə həqiqətlərin dünya ictimaiyyətinə çatdırılması sahəsində rolunun əhəmiyyəti vurğulanmış və xaricdə təhsil alan hər bir tələbənin kampaniyanın işində yaxından iştirakının zəruriliyi qeyd edilmişdir.

"Xocalıya ədalət" beynəlxalq məlumatlandırma kampaniyası 2008-ci ildə Heydər Əliyev Fondunun vitse-prezidenti, Dialoq və Əməkdaşlıq uğrunda İslam Konfransı Gənclər Forumunun mədəniyyətlərarası dialoq üzrə baş əlaqələndiricisi Leyla Əliyevanın təşəbbüsü ilə irəli sürülmüşdür. Kampaniya Xocalı soyqırımı və Qarabağ münaqişəsi barədə həqiqətlərin dünya ictimaiyyətinə çatdırılması istiqamətində səmərəli fəaliyyət göstərir.

Azərbaycan.-2012.- 30 oktyabr.- S.9.