Bakıda GT3 və klassik «Formula-1» yarışlarının final mərhələsi keçirilmişdir

Oktyabrın 28-də Bakıda Azərbaycan Gənclər və İdman Nazirliyinin və Almaniyanın "City Challenge" şirkətinin təşkilatçılığı ilə GT3 və klassik "Formula-1" yarışlarının final mərhələsi keçirilmişdir.

AzərTAc xəbər verir ki, əvvəlcə bütün kateqoriyalar üzrə mühərriklərin qızdırılması və starta hazır vəziyyətə gətirilməsi işləri görülmüş, ardınca idman maşınları (GT) sürücülərinin paradı olmuşdur.

İlk olaraq "Gymkhana city drift" turnirinin final mərhələsi keçirilmişdir. Azadlıq meydanının qarşısından başlayan yarış Neftçilər prospektinədək (2,1 kilometr) davam etmişdir. Turnirin qalibi "BMW M5" markalı avtomobilin sürücüsü Rohan Van Rile (Almaniya) olmuşdur.

Sonra klassik "Formula - 1" üzrə Qran-pri yarışlarına start verilmişdir. Yarışda idmançılar 2,1 kilometrlik marşrut üzrə 20 dəfə dövrə vurmalı olsalar da, 34 nömrəli bolidin yolun kənarına çırpılaraq sıradan çıxması ilə əlaqədar yürüş vaxtından əvvəl dayandırılmışdır. Əsas göstəricilərə görə almaniyalı Malay Kanthuat qalib gəlmişdir. İdman avtomobillərinin final yarışında isə 19 maşın iştirak etmişdir. "Hexis" komandasının sürücüləri Frederik Makaveski və Stef Düsseldorf təsnifat mərhələsinin qalibi olduqları üçün 17 nömrəli maşınla (McLaren) startda birinci dayanmışdılar. Paytaxt sakinlərinin hərarətli alqışları altında bir saat ərzində Bakı yollarında şütüyən avtomobillərin sürücüləri 35 dəqiqədən sonra dəyişdirilmişdir. Turnirin qalibi yenə də "Hexis" komandası olmuşdur. İkinci və üçüncü yerlərin sahibləri "Vita4one" (BMW) komandasının pilotları Matias Lauda-Frank Keçele və Yelmer Buurman- Nikolaus Mayr-Melnhof cütlükləri olmuşdur.

Sonda qaliblərə və mükafatçılara kuboklar təqdim olunmuşdur.

"City Challenge" layihəsi çərçivəsində təşkil edilmiş GT3 yarışına Avropadan dəvət olunmuş 10 komanda qatılmışdır. Komandaların hər biri turnirdə 2 yarış maşını ilə təmsil olunmuşdur. Turnirdə "Porsche", "Lamborghini" kimi məşhur avtomobil markaları yarışmışdır.

Yarışın təhlükəsizlik qaydaları beynəlxalq standartlara və yerli avtoidman federasiyasının tələblərinə cavab vermişdir.

Dünyanın 65 televiziya kanalının birbaşa yayımladığı turniri 130 milyondan çox tamaşaçı izləmişdir.

Azərbaycan.-2012.- 30 oktyabr.- S.12.