Ramil SƏFƏROV: Mənə Azərbaycana qayıtmaq xoşbəxtliyini bəxş etmiş Prezidentimiz İlham Əliyevə minnətdaram

Macarıstanda ömürlük həbs cəzasına məhkum edilmiş Azərbaycan Ordusunun zabiti Ramil Səfərov avqustun 31-də Bakıya gətirilmiş və elə həmin gün Prezident İlham Əliyevin sərəncamı ilə əfv olunmuşdur.

Heydər Əliyev Beynəlxalq Aeroportunda Ramil Səfərovu Ədliyyə Nazirliyinin yüksək vəzifəli şəxsləri və bir qrup jurnalist qarşılamışdır.

Çox uzun sürmüş səkkiz ildən sonra Ramil Səfərov, nəhayət, Vətəndə, öz evindədir.

"Azərbaycana qayıtmağımdan çox xoşbəxtəm. Buna görə prezidentimizə sonsuz minnətdarlığımı bildirirəm". Ramil Səfərovun Vətən torpağında dediyi ilk sözlər bunlardır.

Ramil Səfərov aeroportda jurnalistlərə müsahibəsində demişdir: "İnsanın həyatında elə anlar olur ki, onu sözlərlə ifadə etmək çətin olur. Hazırda mən də belə hisslər keçirirəm. İlk növbədə, humanist bir addım olaraq əfv sərəncamı imzalayaraq həbsimi başa çatdıran Prezident, Ali Baş Komandan cənab İlham Əliyevə həm öz adımdan, həm də ailə üzvlərim adından dərin təşəkkürümü və minnətdarlığımı bildirirəm".

Ramil Səfərov daha sonra bildirmişdir ki, əfv edilməsi haqqında Azərbaycan Respublikasının Prezidenti İlham Əliyevin imzaladığı sərəncamın mətni elə aeroportdaca onun üçün oxunmuş və ona Azərbaycan Respublikası vətəndaşının pasportu təqdim edilmişdir.

Ramil Səfərov aeroportdan öz evlərinə getmişdir. Orada onu doğmaları gözləyirdi. Təbii ki, Azərbaycan Respublikasının Prezidenti İlham Əliyevin bu humanist addımı ilk növbədə, Ramilin ailəsini sevindirmişdir. Evdə onu atası, qardaşı və yaxın qohumları qarşıladılar. Ramilin atası Sahib Səfərovun sevincinin həddi-hüdudu yox idi. O, həyəcanını güclə gizlədərək dedi: "Bu günü bütün Azərbaycan xalqı gözləyirdi. İndi hamı sevinir".

2006-cı il aprelin 13-də Ramil Budapeştdə ömürlük həbs cəzasına məhkum ediləndə çoxları düşünürdü ki, artıq onu Azərbaycana qaytarmaq mümkün olmayacaqdır. Ekspertlər, analitiklər zabitin Azərbaycana verilməsinin mümkünlüyünə bədbinliklə yanaşırdılar. Lakin xalqımız, Ramilin ailəsi onun gec-tez ölkəmizə qayıdacağına ümidini itirmirdi. Onlar bilirdilər ki, hər bir azərbaycanlının harada olmasından asılı olmayaraq, dövlətimizin başçısı İlham Əliyev bu insanların taleyinə biganə deyildir. Ramilin Vətənə qaytarılması bir daha təsdiq etdi ki, Prezident İlham Əliyev başda olmaqla Azərbaycan dövləti öz vətəndaşlarını darda qoymur. Bu insanlar harada olsalar, dövlət onları müdafiə etmək, onların salamatlığı və təhlükəsizliyi qeydinə qalmaq iqtidarındadır.

Sahib Səfərov səkkiz ildən çox davam etmiş ayrılıqdan sonra oğlunu qucaqlayaraq dedi: "Bu gün gəlməli idi. Biz bilirdik ki, Ramil gec-tez Azərbaycana qayıdacaqdır. Çünki Azərbaycanın İlham Əliyev kimi Prezidenti var. Biz əmin idik ki, dövlətimizin başçısı Ramili köməksiz qoymayacaqdır. Prezident öz vətəndaşını, zabitini unutmamışdı. Sadəcə, səbirli olmaq və bu anı gözləmək lazım idi. Bu məqam yetişdi. Mən ailəmiz adından möhtərəm Prezidentimizə dərin təşəkkürümü bildirirəm, ona möhkəm cansağlığı, çətin və məsul vəzifəsində uğurlar diləyirəm".

Sahib Səfərovun sözlərinə görə, dövlətimizin başçısı İlham Əliyev bir daha sübut etdi ki, o, bütün azərbaycanlıların Prezidentidir, özünün hər bir vətəndaşının, bütün Azərbaycan xalqının arxasında dayanır.

Bu hadisə ilə əlaqədar daha bir detalı qeyd etməyə dəyər. Həbsdən azad edilməsi Ramilin ad günündə onun üçün ən böyük hədiyyə oldu. Avqustun 25-də onun 35 yaşı tamam olmuşdur.

Ramil Səfərov 1977-ci ildə Cəbrayıl rayonunda doğulmuşdur. 1991-ci ildə Cəmşid Naxçıvanski adına hərbi liseyə daxil olmuşdur. 1992-ci ildə Müdafiə Nazirliyinin sərəncamı ilə təhsilini davam etdirmək üçün Türkiyənin İzmir şəhərinə göndərilmişdir. Maltəpə hərbi liseyində təhsilini uğurla başa vurandan sonra Ankarada Ali Hərbi Məktəbə daxil olmuşdur. 2001-2002-ci illərdə Gədəbəy rayonundakı hərbi hissələrin birində bölmə komandiri vəzifəsində xidmət etmişdir. 2002-ci ilin mart ayında Ali Hərbi Komandirlər Məktəbinə göndərilmiş, orada baş leytenant rütbəsinə qədər irəliləmişdir. 2004-cü ilin yanvar ayında NATO-nun proqramı çərçivəsində Budapeştdə üç aylıq ingilis dili kurslarına göndərilmişdir. 2004-cü ilin fevral ayında erməni zabitini öldürdüyünə görə Macarıstanın hüquq-mühafizə orqanları tərəfindən tutulmuşdur. 2006-cı il aprelin 13-də Budapeşt Şəhər Məhkəməsi onu ömürlük həbs cəzasına məhkum etmişdir.

Ramil Səfərov törətdiyi əməli məhkəmədə onunla izah etmişdir ki, erməni zabiti Azərbaycan xalqını və Azərbaycan dövlətini dəfələrlə təhqir etmiş, erməni zabit tərəfindən Azərbaycan bayrağının təhqir edilməsi isə Ramilin səbir kasasını daşdıran sonuncu damla olmuşdur. Ramil Səfərovun vəkilləri bu hökmün həddən artıq sərt olmasını və onun müdafiə olunmaq hüququnun pozulmasını hələ o vaxt qeyd etmişdilər. Aydındır ki, belə bir hökm çıxarılmasına erməni lobbisinin səyləri sayəsində bu məsələnin ifrat dərəcədə siyasiləşdirilməsi şərait yaratmışdı.

Ramil Səfərovun Azərbaycana verilməsindən əvvəl Macarıstanın dövlət orqanları ilə intensiv danışıqlar aparılmışdır. Bu məsələ Azərbaycan Prezidenti İlham Əliyevin şəxsi nəzarətində idi. Prezident Administrasiyasının Hüquq-mühafizə orqanları ilə iş şöbəsinin müdiri Fuad Ələsgərov AzərTAc-a müsahibəsində bildirmişdir ki, dövlət başçısının tapşırıqlarına uyğun olaraq Azərbaycan zabitinin azad edilməsi üçün müvafiq tədbirlər görülmüşdür.

İslah müəssisəsində Ramil nümunəvi davranışı ilə fərqlənirdi. Bu müddətdə o, macar dilinə maraq göstərmiş və macar yazıçılarının bir neçə əsərini Azərbaycan dilinə tərcümə etmişdir.

Ramil Səfərov jurnalistlərlə söhbətində qeyd etmişdir ki, yenidən öz Vətəninə, Azərbaycan dövlətinə xidmət etməyə hazırdır. O, azad edilməsi üçün səy göstərmiş insanların hamısına təşəkkürünü bildirmişdir.

Bu gün təkcə Ramilin deyil, bütün Azərbaycan xalqının yaddaşında həmişəlik qalacaqdır. Ona görə ki, bu gün dövlətimizin gücü və nüfuzu, ölkə Prezidentinin müdrikliyi və qətiyyəti bir daha bütün dünyaya nümayiş etdirildi. Müəyyən mənada, bu gün bizim özümüzə, öz Vətənimizə və ümumi gələcəyimizə inamı artıran həqiqət anı oldu!

AzərTAc

Azərbaycan.- 2012.- 1 sentyabr.- S.2.