Azərbaycan Prezidenti dünya erməniliyinə növbəti zərbə vurdu

Ölkəmizdə gerçəkləşdirilən siyasət daim Azərbaycan xalqının maraqlarına xidmət göstərir. Bu siyasəti yürüdən Azərbaycan dövləti və onun Prezidenti cənab İlham Əliyevin siyasi iradəsi və qətiyyəti nəticəsində Azərbaycan ordusunun zabiti Ramil Səfərovun Macarıstandan ölkəmizə ekstradisiyası və əfv edilməsi ermənilərin dünyada apardıqları yalançı təbliğata endirilmiş qüvvətli mənəvi-psixoloji zərbədir.

İnsanlar Ramil Səfərovun gec-tez ölkəmizə qayıdacağına ümidlərini itirmirdilər. Çünki hamımız yaxşı bilirik ki, dövlət başçısı İlham Əliyev harada olmasından və yaşamasından asılı olmayaraq vətəndaşlarımızın taleyinə biganə deyildir. Odur ki, Azərbaycan ordusunun zabitinin vətənə gətirilməsi, elə hava limanındaca əfv edilməsi hər kəs tərəfindən Prezident İlham Əliyevin qətiyyətinin və cəsarətinin təcəssümü, vətənpərvərliyinin, hər bir vətəndaşımızın təəssübkeşi olmasının göstəricisi kimi dəyərləndirildi. Azərbaycan bayrağının şərəfini öz şərəf və ləyaqəti kimi qoruyan Ramil Səfərovun vətənə qaytarılması və azad olunması dövlət başçısının hər bir azərbaycanlının hüquqlarının, azadlığının və təhlükəsizliyinin qarantı olduğunu növbəti dəfə sübut etdi. Bir daha təsdiq olundu ki, Prezident İlham Əliyev başda olmaqla Azərbaycan dövləti öz vətəndaşlarını darda qoymur. Bu insanlar harada olsalar, dövlət onları müdafiə etmək, onların salamatlığı və təhlükəsizliyi qeydinə qalmaq iqtidarındadır.

Bu məsələ daim Azərbaycan ictimaiyyətinin diqqətində olmuşdur. Son nəticədə zabitimizin Vətənə dönməsi yalnız Azərbaycan vətəndaşlarının hüquq və mənafelərinin qorunmasında hər zaman prinsipiallıq nümayiş etdirən dövlət başçısının siyasi iradəsi və beynəlxalq arenada şəxsi nüfuzu sayəsində mümkün olmuşdur. Məsələnin həlli üçün bütün zəruri tədbirlər görülmüşdür və bütün bunların təntənəsi olaraq Azərbaycan ordusunun zabiti artıq Vətəndədir. Beləliklə, bu fakt bir daha göstərdi ki, cənab İlham Əliyev Azərbaycan Respublikasının Prezidenti və Ali Baş Komandan kimi hər bir vətəndaşımızın, hər bir əsgər və zabitin müdafiəçisidir. Bu, həm də düşmən qarşısında bütün Azərbaycan xalqının həmrəyliyi üçün bir çağırışdır.

Təəssüflə qeyd etməliyik ki, Ramil Səfərovun Azərbaycana gətirilməsi və əfvi məsələsində bir sıra Qərb dairələri ermənipərəst mövqe tuturlar. Türk diplomatlarına qarşı terrorçuluq edənlərin azadlığa buraxılmasına, beynəlxalq terrorçu, Qarabağda əli dinc azərbaycanlıların qanına bulaşan M.Melkomyana abidə qoyulmasına göz yuman Qərb indi "narahat"lıq keçirməyə başlayıb. Hətta bu "narahatçılıq" qərəzli formada müşahidə olunur. Azərbaycan Silahlı Qüvvələrinin zabiti Ramil Səfərov "Məhkum olunmuş şəxslərin verilməsi haqqında" Konvensiyaya uyğun olaraq Azərbaycan tərəfinə təhvil verilmişdir. Bu konvensiyaya əsasən, tərəflərin birinin ərazisində məhkum olunmuş şəxs konvensiyanın müddəalarına uyğun olaraq digər dövlətə verilə bilər. Yenə də konvensiyaya uyğun olaraq hökmün icrası onu qəbul edən dövlətin qanunvericiliyi ilə tənzimlənir və bu dövlət bütün zəruri qərarları qəbul etməkdə səlahiyyətlidir.

Ümumiyyətlə isə, bu məsələ Azərbaycanla Macarıstan arasında ikitərəfli hüquqi münasibətlərin predmetidir və bütün beynəlxalq hüquq normaları çərçivəsində həll edilmişdir. Hansısa dövlətin və siyasi dairənin bununla bağlı "həyəcan keçirməsi", "narahat olması" olduqca yersiz və məntiqsizdir.

Ramil Səfərovun Azərbaycana qayıdışı ölkə əhalisinin böyük sevincinə səbəb olub. Hər yerdə şadyanalıq hiss olunur. Hər bir vətəndaş Prezident İlham Əliyevə bu addımına görə dərin minnətdarlığını bildirir. Bu günlərdə ətrafımdakı insanların, həmçinin seçicilərimin bir-birini təbrik etməsinin şahidi olanda böyük qürur hissi keçirdim. Sadə vətəndaşlar ürəkdən sevinib ermənilər üzərindəki bu simvolik qələbənin dadını çıxarır və bu, Qarabağ probleminin həll olunacağına olan inam hissini daha da artırır.

Bu gün bir-birinə gözaydınlığı verən insanlar çox tezliklə torpaqlarımızın bütövləşməsinə və işğal olunmuş ərazilərimizin azad olunmasına görə bir-birilərini təbrik edəcəklər. Çünki Ramil Səfərovun gəlişi həm də Dağlıq Qarabağın tezliklə azad olunacağının müjdəsidir. Bu mənada Ramil Səfərovun vətənə qaytarılması həm də Ermənistan üçün bir siqnaldır. Düşmən başa düşməli və görməlidir ki, güclü Azərbaycan dövləti ilə qarşılaşmaq ona çox baha başa gələcək.

Bütün ölkə ictimaiyyəti əmindir ki, işğal altında olan torpaqlarımız da Prezident İlham Əliyevin uzaqgörən siyasəti nəticəsində azad olunacaq. Cənab Prezidentin uğurlu siyasəti bizi sürətlə həmin möhtəşəm tarixə yaxınlaşdırır. Prezident İlham Əliyevin özünün dediyi kimi: "Biz malik olduğumuz, özümüzə məxsus olan və beynəlxalq aləmin təsdiq etdiyi bir ərazinin qaytarılmasından danışırıq və bunun sadəcə gec və ya tez baş verməsindən danışmaq olar".

Hər birimiz qarşıdakı tarixdə ərazi bütövlüyümüzün təmin ediləcəyi, dövlətinin daha güclü, xalqının daha yüksək rifahda yaşadığı, milli maraqları qoruyan siyasi lideri ətrafında sıx birləşən Azərbaycan adının əzəmətinə dünyanın şahidlik edəcəyi zamanın artıq başlandığının fərqində olmalıyıq. Zamanın keşməkeşli zərbələrini dəf edə bilmək yalnız müdrik liderin xalqla birliyi sayəsində mümkün olur. Nəticədə, xalq özünün mənəvi gücünü, mövcudluq haqqını bir daha sübut edir.

İlham MƏMMƏDOV,

Milli Məclisin deputatı

Azərbaycan.- 2012.- 4 sentyabr.- S.5.