Rusiya Azərbaycanlı Gənclər Təşkilatının nümayəndələri Milli Mədəniyyətlər Festivalında iştirak etmişlər

Rusiya Azərbaycanlı Gənclər Təşkilatının (RAGT) Kaluqa bölməsinin nümayəndələri Kaluqa Şəhəri Gününə həsr olunmuş Milli Mədəniyyətlər Festivalında iştirak etmişlər.

RAGT İdarə Heyətinin üzvü Emin Hacıyev AzərTAc-a bildirmişdir ki, Azərbaycan gəncləri Kaluqa Mərkəzi Mədəniyyət və İstirahət Parkında keçirilmiş bayrama fəal qatılmışlar. Milli geyimlərdə Azərbaycan xalq rəqslərini ifa edən RAGT-ın nümayəndələri mədəniyyətimizi uğurla təmsil etmişlər. Gənclər təşkilatının nümayəndələrinin təşkil etdikləri ölkəmizin zəngin mədəniyyətinə və tarixinə həsr olunmuş "Azərbaycan" sərgisi maraq doğurmuşdur.

E.Hacıyev əlavə etmişdir ki, RAGT-ın Kaluqa bölməsinin əlaqələndiricisi Ramin Rəcəbov tədbirdə çıxış edərək toplaşanları bayram münasibəti ilə təbrik etmişdir. O, kaluqalılara doğma şəhərlərinin çiçəklənməsi naminə birgə çalışmağı arzulamışdır.

E.Hacıyev demişdir: "RAGT regional bölmələrinin ümumrusiya tədbirlərində iştirakı təşkilatımızın gənclərin cəmiyyətə inteqrasiyasının dərinləşməsi və möhkəmlənməsinə, Azərbaycan mədəniyyətinin və incəsənətinin təbliğinə yönəldilmiş ideologiyasının tərkib hissəsidir.

Asya HACIZADƏ,

AzərTAc-ın xüsusi müxbiri

Moskva

Azərbaycan.-2012.- 6 sentyabr.- S. 5.