Azərbaycan idman dövlətidir

London Yay Olimpiya Oyunları bunu bir daha təsdiqlədi

Son bir ay hər bir azərbaycanlının həyatında başqa sahələrdə olduğu kimi, idmanda da xoş, sevincli anlarla qalmaqdadır. Son vaxtlar hamımız belə ümumi bir sevinc, duyğu içindəyik. London Yay Olimpiya Oyunlarında idmançılarımızın qələbəsi, xalqımızın həyatında əsl hadisəyə çevrildi desək, - yanılmarıq. Azərbaycan Prezidenti İlham Əliyev XXX London Yay Olimpiya Oyunlarında iştirak etmiş idmançılarla görüşündə bu faktı xüsusi qeyd etmişdir: "Bu gün nümayiş etdirilən bu kiçik videofilmdə Olimpiya Oyunlarının unudulmaz anları bir daha gözümüzün önündən keçdi. Doğrudan da, unudulmaz anlar idi və bu qələbə sevincini bizə idmançılarımız bəxş etdilər. Azərbaycan, sözün əsl mənasında, idman dövlətidir. London Yay Olimpiya Oyunları bunu bir daha təsdiqlədi, bir daha sübut etdi. Azərbaycan Olimpiya Oyunlarında ən böyük uğuru London Olimpiya Oyunlarında qazanmışdır. Bu Olimpiya Oyunlarında 200-dən çox ölkə iştirak edirdi. Azərbaycan bu yarışda 30-cu yeri tuta bilmişdir. Medalların sayına görə 24-cü yerdəyik. Avropa ölkələri arasında 15-ci, müsəlman ölkələri arasında isə 3-cü yerdəyik. Azərbaycan idmançıları 10 medal qazanmışlar - ikisi qızıl, ikisi gümüş, altısı bürünc medaldır. Bu, doğrudan da, böyük və tarixi nailiyyətdir. Bu, Azərbaycan idmanının, Azərbaycan dövlətinin təntənəsidir".

Müxtəlif illərdə Olimpiya Oyunlarında iştirakımıza və qazandığımız nailiyyətlərə nəzər saldıqda bu qələbənin təsadüf deyil, gözlənilən olduğu qənaətinə gəlirsən. Hamımız idmançılarımızdan böyük ümidlərlə qələbə xəbərini gözləyirdik. Azərbaycan 1992-ci ildə müstəqil dövlət kimi Atlantada bir medal, Sidneydə üç (2000-ci il), Afinada (2004-cü il) beş, Pekində yeddi (2008-ci il) və nəhayət, Londonda on medal qazandı. Ölkə Prezidentinin qeyd etdiyi kimi, "Əhali və ərazi baxımından bizdən bir neçə dəfə böyük olan ölkələri arxada qoyduq.

Bir daha demək istəyirəm ki, bu, tarixi qələbədir. Bu qələbə idmançılarımızın qələbəsidir. Azərbaycan dövləti və xalqı adından bütün idmançılara - peşəkarlığını, Vətən sevgisini nümayiş etdirən bütün idmançılara dərin minnətdarlığımı bildirmək istəyirəm".

İdmançılarımızın Olimpiya Oyunlarında çıxışı çox gərgin, eyni zamanda, çox uğurlu oldu. İlk günlərdən biz artıq xəzinəmizə medal daxil edə bilmişdik. Son günlərdə iki qızıl medal qazana bilməyimiz isə bütün xalqımızın sevincinə səbəb oldu. Bu medallara aparan yol isə çox çətin, əziyyətli və keşməkeşli idi. "Bu Olimpiadada qızıl medallar qazandıq. Biz o medalları qazanmaq üçün çox çalışdıq və azarkeşlərimizi və xalqımızı sevindirdik". Bu sözlər Azərbaycanın sərbəst güləş üzrə yığma komandasının böyük məşqçisi Firdovsi Umudova məxsusdur. Onun da sözlərinə görə, Azərbaycan güləşçiləri London Olimpiadasında yüksək peşəkarlıq nümayiş etdirdilər.

Azərbaycanın güclü iqtisadiyyatı, sürətli inkişafı bu qələbələrə təkan verdi. Çünki həyatımızın hər sahəsində olduğu kimi, idmanda da qələbələrimiz görülən işlərin bəhrəsidir, bu istiqamətdə aparılan düzgün dövlət siyasətinin nəticəsidir. Xüsusilə, idmançılarımızın peşəkarlığı və Vətənə, yurda sevgisi bu qələbələrin əsasını təşkil edir.

Bir vaxt bir neçə medalla kifayətlənən ictimaiyyətimiz artıq böyük qələbələrə çatmağa cəhd edir. Çünki xalqımız öz gücünü, potensialını gözəl bilir. Buna əsas verən Azərbaycan gənclərinin əzmi, iradəsidir.

"Azərbaycanda çox güclü gənc nəsil yetişir, o cümlədən idman sahəsində. Son 10 il ərzində 35 regional Olimpiya İdman Kompleksi tikilmişdir ki, bizim uşaqlar, yeniyetmələr bu komplekslərdən səmərəli şəkildə istifadə edirlər. Yəni, idman infrastrukturunun yaradılması nəticəsində biz hər bir bölgədə idmanla məşğul olmaq üçün gözəl şərait yaratmışıq. Bizdə istedadlı idmançılar çoxdur - uşaqlar, gənclər, yeniyetmələr. Təsadüfi deyildir ki, yeniyetmələr arasında I Olimpiya Oyunlarında Azərbaycan 11-ci yerə çata bilmişdir", - deyə ölkə Prezidenti qürurla bildirmişdir. Doğrudan da, bayrağımızın 10 dəfə qaldırılması, iki dəfə dövlət himnimizin səsləndirilməsi tarixi qələbədir.

Azərbaycanın idman uğurları harada yaşamasından asılı olmayaraq, bütün dostlarımızı, həqiqətsevər insanları sevindirir və duyğulandırır. Onlar ölkəmizə və onun nailiyyətlərinə çox səmimi münasibət bəsləyirlər. "Vestnik Kavkaza" informasiya-təhlil agentliyinin şərhçisi Aleksey Balaşov yazır: "Azərbaycanın Olimpiya yığmasına Olimpiya Oyunlarının ruhunu duymaq üçün xeyli vaxt lazım gəldi. Lakin növbə güləşçilərin yarışlarına çatanda Azərbaycan idmançıları ardıcıl olaraq bir neçə medal qazandılar. Hərçənd, bu sahədə ilk addımı ağır atletlər atmışdı. Artıq iyulun 29-da 56 kq çəki dərəcəsində birdən 127 kq və təkanla 159 kq qaldıran Valentin Xristov ümumi hesabda 286 kq nəticə göstərmiş və Azərbaycana Olimpiadanın ilk medalını gətirmişdi. Akademik avarçəkənlər də pis çıxış etmədilər, onların medallar uğrunda mübarizə aparmaq üçün hər cür şansı vardı, lakin hər dəfə cüzi bir fərq fəxri kürsüyə çatmağa mane olurdu. Qafqazda ənənəvi güclü sayılan Azərbaycan güləş məktəbi növbəti dəfə yaxşı nəticələr göstərdi. Yunan-Roma güləşində gümüş və bürünc medallar, sərbəst güləşçilərin əla çıxışı bütövlükdə Azərbaycan idmanının potensialını bir daha təsdiqlədi və idmançıların xarakterini sübut etdi. Azərbaycanlı sərbəst güləşçilərin iki qızıl və bürünc medal qazanması çox yaxşı nəticədir. Azərbaycan güləşdə özünün region üzrə bütün qonşularını geridə qoydu, hərçənd həmin ölkələrdə də yaxşı güləş məktəbləri var".

A.Balaşovun sözlərinə görə, Azərbaycan gimnastı Aliyə Qarayevanın çıxışını xüsusi qeyd etməyə dəyər. Düzdür, Aliyə Olimpiadada medal qazanmadı, lakin o, yetərincə yaxşı çıxış edərək fərdi çoxnövçülük təsnifatında üçüncü nəticə göstərdi: "Tam əminliklə demək olar ki, Odlar yurdunun yığmasının çıxışları möhtəşəm olub. Azərbaycan yığması müxtəlif əyarlı 10 medal, o cümlədən iki qızıl medal qazanmaqla region üzrə qonşularının demək olar ki, hamısını geridə qoyub. Məsələn, 75 milyon əhalisi olan Türkiyə ilə müqayisədə Azərbaycanın aktivində olan medalların sayı iki dəfə çoxdur".

Rusiyalı politoloq Yevgeni Krıştalyov isə bunları deyib: "Ölkə rəhbərliyi idmanın inkişafına çox böyük diqqət yetirir, bu sahədə məqsədyönlü iş aparır. Bunu qeyd etmək kifayətdir ki, Azərbaycan Prezidenti İlham Əliyev Milli Olimpiya Komitəsinə şəxsən özü rəhbərlik edir.

Bütün ölkədə Olimpiya mərkəzləri yaradılıb və bu mərkəzlər real fəaliyyət göstərir. Uşaq idmanı sistemi nizamlanıb. Bütün bunlar yüksək nailiyyətlər üçün də səmərəsiz qala bilməz. Son illərdə Azərbaycan bir sıra beynəlxalq yarışlara ev sahibliyi edib. Tezliklə ölkədə qızlar arasında futbol üzrə dünya çempionatı start götürəcək. Bu da gənclər arasında idmanın populyarlaşmasına müsbət təsir göstərir. Azərbaycan idmançılar ölkəsinə çevrilməkdədir. Əlamətdar haldır ki, Londonda qazanılmış medalların ümumi sayına görə Azərbaycan komandası Cənubi Qafqaz ölkələri arasında öz qonşularını, hətta Türkiyəni də qabaqlayıb.

Bütün Azərbaycan xalqı, idman ictimaiyyəti əmindirlər ki, gələcəkdə Azərbaycan idmançıları daha yüksək nəticələr göstərəcəklər və Rio-de-Janeyroda medallarımızın sayı çox olacaq.

Dövlət başçısı elə bu inamla daha çox gələcəyə baxaraq uğurlarımızın bundan sonra da artan xətlə gedəcəyini bildirdi: "Ümidvaram ki, bizi gələcəkdə də medallar, qələbələr gözləyir. Bu qələbələr bütün xalqımızı sevindirəcəkdir. Medallar qazanmış idmançıları bu gün xüsusilə qeyd etmək istəyirəm. Bürünc, gümüş medallar qazanmış idmançıları və əlbəttə, bizim çempionları - Toğrul Əsgərovu və Şərif Şərifovu xüsusilə qeyd edirəm. Onlar, doğrudan da, xalqımıza sevinc bəxş etdilər".

Bəxtiyar QARACA

Azərbaycan.-2012.- 6 sentyabr.- S. 6.