Azərbaycan Prezidenti İlham Əliyev Litva Respublikasının daxili işlər nazirinin başçılıq etdiyi nümayəndə heyətini qəbul etmişdir

Azərbaycan Respublikasının Prezidenti İlham Əliyev sentyabrın 6-da Litva Respublikasının daxili işlər naziri Arturas Melianasın başçılıq etdiyi nümayəndə heyətini qəbul etmişdir.

Azərbaycana səfərindən məmnunluğunu bildirən nazir Arturas Melianas ölkələrimizin müvafiq qurumları arasında əməkdaşlığın genişləndirilməsi ilə bağlı məsələlərin müzakirəsi baxımından səfərin əhəmiyyətini qeyd etdi. O, səfəri çərçivəsində təmsil etdiyi qurumla Azərbaycanın Daxili İşlər və Fövqəladə Hallar nazirlikləri arasında əməkdaşlığa dair imzalanacaq müqavilənin əhəmiyyətini vurğuladı.

Dövlət başçısı ölkələrimiz arasında əməkdaşlığın müxtəlif sahələrdə genişləndirilməsi üçün yaxşı perspektivin olduğunu dedi. Prezident İlham Əliyev təbii fəlakətlər zamanı ölkələrarası əlaqələndirmənin və qarşılıqlı yardımın əhəmiyyətini vurğuladı. Azərbaycanda Fövqəladə Hallar Nazirliyinin güclü maddi-texniki bazaya, müasir texnika və infrastruktura malik olduğunu deyən dövlətimizin başçısı bu sahədə qarşılıqlı təcrübə mübadiləsi aparılmasının önəmini qeyd etdi.

AzərTAc

Azərbaycan.-2012.- 7 sentyabr.- S.1.