Azərbaycan ilə Pakistan arasında turizm və mədəni irs sahələrində əməkdaşlığın perspektivləri müzakirə olunmuşdur

Sentyabrın 7-də mədəniyyət və turizm naziri Əbülfəs Qarayev Bakıda keçirilən "İpək Yolunun tamı: kulinariya, mədəniyyət və turizm" konfransında iştirak etmək üçün ölkəmizə gəlmiş Pakistanın milli irs və inteqrasiya naziri xanım Samina Xalidhurki ilə görüşmüşdür.

AzərTAc xəbər verir ki, "Jumeirah Bilgah Beach Hotel"ində keçirilən görüşdə turizm və mədəni irs sahələrində əlaqələrin inkişaf etdirilməsinə dair fikir mübadiləsi aparılmışdır.

İki ölkənin mövcud siyasi, iqtisadi və mədəni əlaqələrindən danışan Əbülfəs Qarayev bildirmişdir ki, xalqlarımız arasındakı tarixi dostluq əlaqələri son illərdə daha da genişlənmişdir. Son illərdə Pakistandan Azərbaycana gələn turistlərin sayının xeyli artdığını söyləyən Ə.Qarayev bu görüşdən sonra hər iki ölkəni ziyarət edəcək turistlərin sayında daha böyük artımın müşahidə olunacağına inandığını diqqətə çatdırmışdır.

Pakistanın milli irs və inteqrasiya naziri öz növbəsində ölkəmizə səfərindən məmnunluğunu bildirmiş və belə bir mötəbər konfransa dəvət olunduğuna görə Azərbaycan hökumətinə təşəkkürünü çatdırmışdır.

Ölkəsinin hər zaman Azərbaycanın yanında olduğunu söyləyən qonaq Ermənistan-Azərbaycan, Dağlıq Qarabağ münaqişəsinin həlli istiqamətində rəsmi Bakının ədalətli mövqeyini daim dəstəklədiklərini vurğulamışdır.

Xanım Samina Xalidhurki cari ilin fevralında Pakistan parlamentinin dünyada ilk dəfə olaraq Xocalı faciəsini soyqırımı kimi tanıdığını diqqətə çatdırmışdır.

Azərbaycan.-2012.- 8 sentyabr.- S. 9.