İşğalçı ölkə gec-tez Azərbaycanın siyasəti sayəsində məğlubiyyətə düçar olacaq

Mübariz QURBANLI: "Əgər Ermənistan sülh danışıqlarından imtina edəcəksə, onda müharibə variantı işə düşəcək və Azərbaycanın hərbi üstünlüyü özünü göstərəcək"

Erməni terror təşkilatlarının, xüsusən də ASALA-nın Azərbaycanın xarici ölkələrdəki diplomatik nümayəndələrini hədəfə götürməklə hədələməsi və Ermənistan parlamentinin qəbul etdiyi sərsəm bəyanatlar artıq dünyaya sübut etdi ki, işğalçı ölkə terrora dövlət səviyyəsində dəstək verir. Ancaq Ermənistan çox yaxşı bilir ki, istənilən arzuolunmaz olayın baş verməsi işğalçı ölkənin özünə ciddi zərbə vuracaq və dünya birliyinin qınağına çevriləcək. Hətta işğalçı ölkənin parlamentində Ermənistan-Azərbaycan, Dağlıq Qarabağ münaqişəsi ilə bağlı Minsk qrupu çərçivəsində aparılan danışıqlardan imtina etməsi ilə əlaqədar bəyanatın qəbul olunması Azərbaycana mənfi təsir etməyəcək.

Yeni Azərbaycan Partiyasının icra katibinin müavini, deputat Mübariz Qurbanlı qəzetimizə müsahibəsində ASALA-nın təhdidlərinə və Ermənistandakı olayların pərdəarxasına aydınlıq gətirib.

- Mübariz müəllim, ASALA terror təşkilatının son zamanlar aktivləşməsi və Azərbaycanın Macarıstandakı səfirliyinə təhdid dolu məktubların göndərilməsi ciddi etiraza səbəb olub. Sizcə, Ermənistan bu hərəkəti ilə terrora dövlət səviyyəsində dəstək verdiyini bir daha dünyaya bəyan etmədimi?

- "Ermənistanın azadlığı uğrunda erməni gizli ordusu" - ASALA 1975-ci ildə yaradılıb. Təşkilatın məqsədi Şərqi Türkiyə, Şimali İran və Azərbaycanın Naxçıvan və Dağlıq Qarabağ əraziləri üzərində "böyük Ermənistan" qurmaqdır. Bu təşkilat əsasən Türkiyə və Azərbaycan vətəndaşlarına qarşı terror aktları həyata keçirməsi ilə tanınır. ABŞ Dövlət Departamentinin sənədlərində bu qurum terrorçu təşkilat kimi qeydə alınıb. ASALA ötən əsrin 70-80-ci illərində bir çox qanlı terror hadisəsinin təşkilatçısı olub.

Müasir dünyada terrora qarşı mübarizə bəşəri xarakter daşıyır. Təsadüfi deyil ki, əksər ölkələr terrorizmə qarşı mübarizə aparır. Terror bu gün bəşəriyyətin ən böyük problemi hesab olunur. ASALA bu gün Ermənistan tərəfindən dövlət səviyyəsində himayə edilən, işğalçı ölkənin xüsusi xidmət orqanlarının əli ilə idarə olunan, maliyyələşdirilən terror təşkilatıdır. Bu təşkilatın yenidən üzə çıxması təsadüfi deyil. Bu, bölgədə, Yaxın Şərqdə gedən hadisələrlə bağlıdır. Ermənistanın dövlət səviyyəsində terrora dəstək verməsi heç kəsə gizli deyil. ASALA yenidən "efirə" çıxdıqdan sonra ilk bəyanatını Türkiyəyə qarşı verdi. Növbəti bəyanat isə Ramil Səfərovun Azərbaycana gətirilməsi və Azərbaycan Prezidenti İlham Əliyevin onu əfv etməsindən sonra verilib. Bu bəyanatında ASALA bütövlükdə Azərbaycana qarşı terror əməllərini fəallaşdıracağını bəyan edib. Bu, açıq-aşkar Azərbaycana qarşı təhdiddir, terror vasitəsilə məqsədə çatmaq arzusudur. Ancaq bütün beynəlxalq sənədlərdə belə hallar qəti şəkildə pislənilir. Ona görə də Azərbaycan tərəfi ASALA-nın simasında Ermənistanın terror əməliyyatları keçirmək istəyini dünyaya çatdırır və dünyadan, ATƏT, Avropa Şurası, BMT və digər təşkilatlardan Ermənistanın bu niyyətinə qarşı kəskin münasibətlər gözləyir.

- Bu bəyanatdan iki gün öncə Ermənistan prezidenti Serj Sarkisyan ölkənin Təhlükəsizlik Şurasının iclasında açıq-aşkar Azərbaycana qarşı terrorla bağlı tapşırıqlar verməsi bu ölkənin mətbuatında dərc edildi və bütün beynəlxalq təşkilatlar bundan xəbərdar oldular. Sizcə, bu təhdidlər Azərbaycanı nədənsə çəkindirəcəkmi və beynəlxalq təşkilatlar tərəfindən işğalçı ölkəyə təzyiqlər ola bilərmi?

- Bu ölkənin prezidentinin, həqiqətən, Azərbaycana qarşı terrorla bağlı tapşırıqlar verməsi Ermənistanın dövlət səviyyəsində terrorla məşğul olmasına dair növbəti fakt kimi qeyd edilə bilər. Bunun Ermənistan üçün çox pis nəticəsi olacaq. Terrorla bağlı təhdidlər Azərbaycanı heç nədən çəkindirməyəcək. Çünki Azərbaycan Ermənistandan qat-qat güclü dövlətdir. İstər milli təhlükəsizliyini təmin etmək baxımından, istər xaricdə yaşayan və fəaliyyət göstərən vətəndaşlarını qorumaq baxımından Azərbaycan kifayət qədər gücə malik olan dövlətdir. Azərbaycan Prezidentinin həyata keçirdiyi ciddi siyasət, ölkənin daxilindəki birlik, vətəndaş sülhü, həmrəylik bütün xalqımızı ASALA və digər terror təşkilatlarına qarşı birgə mübarizə aparmağa sövq etmişdir və bu yöndə də Azərbaycan cəmiyyəti sayıqlığını itirməyib. Hesab edirəm ki, erməni terror təşkilatı hay-küylü bəyanatlar versə də, bu bəyanatların arxasında real olaraq Azərbaycana hansısa bir ziyan vuracağı o qədər də asan məsələ deyil. Azərbaycan adekvat tədbirlər görəcək və bu ölkəyə qarşı edilən hər hansı bir terror əməli layiqli cavabını alacaqdır. Bu, dövlətin mövqeyidir.

- Belə çıxır ki, ASALA-nın Azərbaycana qarşı təhdidləri Ermənistanın özünə qarşı yönələcək və fərarilər ordusuna çevrilmiş, iqtisadi cəhətdən tənəzzülə uğramış işğalçı ölkə daha bir ağır zərbə alacaq...

- Bəli, bütün bunlar Ermənistanın özünə qarşı yönələcək. Bu ölkə ASALA-nın əli ilə öz mənfur niyyətini həyata keçirmək istəyir. Zamanında Avropanın başqa-başqa ölkələrində həbs edilən ASALA-nın üzvləri azadlığa buraxılmış və Ermənistanda onlar qəhrəman kimi qarşılanmış, əfv olunmuş və həmin cinayətkarlar Dağlıq Qarabağ müharibəsində Azərbaycana qarşı törədilən faciələrdə iştirak etmişlər. İndi də bu təşkilatın əli ilə yeni təhdidlər, bəyanatlar verilir. Ancaq Azərbaycanın artan nüfuzu, iqtisadi cəhətdən yüksəlişi, Cənubi Qafqazda lider dövlət olması dünya birliyi tərəfindən qəbul edilir. İndi Azərbaycan dünyada söz sahibinə çevrilib. Artıq bütün beynəlxalq təşkilatlar dünya erməniliyinin törətdiyi vəhşiliklərin şahididir. Azərbaycanın xarici diplomatiyasının apardığı təbliğat işləri öz bəhrəsini verib. Bütün dünya ictimaiyyəti Ermənistanı işğalçı dövlət kimi qəbul edir. Bu səbəbdən də hesab edirəm ki, işğalçı ölkənin bu təhdidləri bumeranq rolunu oynayacaq və Ermənistan hakimiyyəti layiqli cəzasını alacaqdır.

- Bu günlərdə Ermənistan parlamentində bir sənəd müzakirəyə çıxarılıb və əksər deputatlar həmin sənədin lehinə səs veriblər. Sənəddə göstərilir ki, bundan sonra Dağlıq Qarabağla bağlı status danışıqları heç bir halda aparıla bilməz. "Dağlıq Qarabağ Respublikası" heç bir status çərçivəsində Azərbaycanın tərkibində ola bilməz". Sizcə, bu sənədin qəbulu münasibətlərin gərginləşməsinə səbəb olmayacaqmı?

- Ermənistan parlamentarilərinin müzakirəyə çıxardıqları sərsəm sənəddə bir çox məsələlər öz əksini tapıb. Erməni tərəfinin Dağlıq Qarabağ münaqişəsi ilə bağlı aparılan danışıqlardan çıxmaqla əlaqədar irəli sürdüyü tezislərə görə demək olar ki, onlar heç bir təzyiqlərə davam gətirmirlər. Hamı bilir ki, Ermənistan bu danışıqlarda formal iştirak edir. Ermənistan, əslində, vassaldır və öz "senyorunun" tapşırığını yerinə yetirir. Bu ölkənin danışıqlarda iştirakı, sadəcə, görüntü xarakteri daşıyır. Erməni tərəfi bütün danışıqlarda qeyri-konstruktivlik nümayiş etdirib. Əgər bu ölkə danışıqlardan çıxacaqsa, buyursun çıxsın. Azərbaycan bundan heç də narahat deyil və təşviş keçirmir. Belə olan halda "B" variantı işə düşəcək. Bu isə müharibə variantıdır. Müharibə başlayacağı təqdirdə isə Azərbaycanın hərbi üstünlüyü özünü göstərəcək. Ermənistan bizi müharibə ilə "blef" etməsin. Çünki hərb meydanında bu ölkənin Azərbaycanla üz-üzə qaldığı anda tam gücsüz vəziyyətdə olacağı hər kəsə bəllidir. Onun "senyorunun" isə bu zaman ortaya girməsi qlobal müharibəyə çevriləcək. Ona görə də erməni tərəfinin bu "blefi" onun himayəçiləri tərəfindən də dəf olunacaq. Çünki müharibə Ermənistana və onun arxasında duran qüvvələrə ziyan gətirəcək. Müharibə aparmaq Azərbaycanın haqqıdır. Ölkəmizin torpaqları işğal olunub. Lakin Azərbaycan sülh danışıqları ilə torpaqlarını azad etmək istəyir. Azərbaycan Prezidenti İlham Əliyev xarici siyasətini çox dəqiq, sərrast və qətiyyətli şəkildə hücum xətti ilə qurub və bunun nəticəsində biz qonşu ölkələrlə gedən münasibətlərdə daim haqlı çıxmışıq. Bu gün də haqlıyıq və sabah da haqlı olacağıq. Həyat, zaman göstərəcək ki, Ermənistan gec-tez Azərbaycanın siyasəti sayəsində məğlubiyyətə düçar olacaq.

Rəşad BAXŞƏLİYEV

Azərbaycan.-2012.- 9 sentyabr.- S. 2.