Şimali Atlantika Alyansı Azərbaycanla əməkdaşlığa böyük önəm verir

NATO-nun müttəfiqləri terrorçuluğu bütün formalarda pisləyirlər

Azərbaycan bir sıra aparıcı beynəlxalq təşkilatlarla yanaşı, NATO ilə də əməkdaşlığa xüsusi önəm verir. 1994-cü ildən təşkilatın "Sülh naminə tərəfdaşlıq" proqramında yaxından iştirak edən ölkəmiz bunun sayəsində NATO hərbi strukturları ilə əməkdaşlıq etmək, birgə təlimlər keçirmək, hərbi kadrlar hazırlanmasında blokun təcrübəsindən bəhrələnmək imkanları qazanıb. Bu əməkdaşlıq strateji məzmun kəsb etməklə regionun mühüm enerji layihələrinin təhlükəsiz gerçəkləşdirilməsinə də əsaslı təminat yaradıb. Antiterror koalisiyasının üzvü olan Azərbaycanın ordu birləşmələri NATO qoşunlarının tərkibində sülhyaratma missiyasında da yaxından iştirak etmişlər. Bu o deməkdir ki, təşkilat münaqişə ocaqlarının söndürülməsində, mübahisələrin çözülməsində, bir sözlə, qlobal planda sülh və sabitliyin təminatında Azərbaycanın potensialını yüksək qiymətləndirir.

Avratlantik məkana inteqrasiya kursunu əsas götürən Azərbaycanın NATO ilə uğurlu əməkdaşlığı hərbi quruculuq məsələlərində də az əhəmiyyət daşımır. Azərbaycan ordusunda həyata keçirilən islahatlarda, hərbi hissələrin komplektləşdirilməsində NATO standartları əsas götürülür. Ölkəmizə səfər edən NATO rəsmiləri də keçirdikləri görüşlərdə Azərbaycan ordusunda aparılan islahatlardan razılıqlarını dəfələrlə bəyan ediblər. Bu, həm də Azərbaycan-NATO əməkdaşlığının perspektivləri barədə daha nikbin düşünməyə əsas verir.

NATO özünün təfərdaş ölkəsi kimi Azərbaycanın ərazi bütövlüyünün bərpasında, Ermənistan-Azərbaycan, Dağlıq Qarabağ münaqişəsinin mümkün qədər tez həllində maraqlıdır. Azərbaycanın ərazi bütövlüyü, suverenliyi məsələsi NATO-nun 2006, 2008-ci illərdə keçirilən zirvə toplantılarında bir daha ifadə olunmuşdur. Ölkəmizin ərazi bütövlüyü məsələsi NATO-nun 2009-cu ildə keçirilən zirvə sammitinin yekun bəyanatının 58-ci maddəsində də öz əksini tapmışdır. Bəyanatda qeyd olunub ki, alyans Azərbaycan, Gürcüstan, Ermənistan və Moldovanın ərazi bütövlüyü, müstəqilliyi və suverenliyini dəstəkləməkdə davam edir, eyni zamanda, regional münaqişələrin sülh yolu ilə həllini dəstəkləməkdə də davam edəcək. Bunu Lissabon sammitinin yekunlarına dair qəbul etdiyi bəyanatı ilə Şimali Alyans bir daha diqqətə çatdırmış oldu. Ermənistan tərəfi Strasburq-Kehl sammitində təşkilata üzv ölkələrin Azərbaycanın ərazi bütövlüyünün dəstəklənməməsi üçün uğursuz cəhdlər etmişdi. İşğalçı Ermənistan tərəfinin bütün cəhdlərinin əbəs olduğu NATO-nun son zirvə toplantısında bir daha təsdiqləndi. Təşkilatın yekun bəyannaməsində Azərbaycanın ərazi bütövlüyü və suverenliyi növbəti dəfə dəstəklənmişdir.

Azərbaycan-NATO münasibətləri son illər qarşılıqlı maraqlar əsasında, uğurla inkişaf edir. Rəsmi Bakı alyansla münasibətlərini regionun geosiyasi özəlliklərini nəzərə almaqla inkişaf etdirmək, sülh və təhlükəsizliyin qorunması üçün hərbi-siyasi sahədə birgə proqramlar həyata keçirmək niyyətini açıq bildirib. "SNT" proqramı və "Fərdi Əməkdaşlıq üzrə Fəaliyyət Proqramı" çərçivəsində əməkdaşlıq ölkəmizə NATO hərbi strukturları ilə əməkdaşlıq etmək, birgə təlimlər keçirmək, hərbi kadrların hazırlanmasında blokun təcrübəsindən bəhrələnmək imkanları yaratmışdır. Bu əməkdaşlıq strateji məzmun kəsb etməklə regionun mühüm enerji layihələrinin təhlükəsiz gerçəkləşdirilməsinə də əsaslı təminat kimi nəzərdən keçirilir.

NATO-nun Baş katibi Anders Foq Rasmussenin başçılıq etdiyi nümayəndə heyətinin bu günlərdə ölkəmizə səfəri də Azərbaycanla adıçəkilən mötəbər qurumun əməkdaşlığının uğurla inkişaf etdiyini bir daha təsdiqlədi. A.Rasmussen ölkə başçısı ilə keçirdiyi görüş zamanı əlaqələrimizin hazırkı vəziyyəti və perspektivləri ətrafında geniş fikir mübadiləsi apardı. Baş katib bir daha bəyan etdi ki, NATO Azərbaycana strateji baxımdan xüsusi önəm verir və azərbaycanlı sülhməramlılarının Əfqanıstanda sülhyaratma tədbirlərində fəal iştirakı münasibətlərimizə yaxşı nümunə ola bilər.

Prezident İlham Əliyev NATO-nun Baş katibi Anders Foq Rasmussen ilə görüşü zamanı Azərbaycanla NATO arasında əməkdaşlıq əlaqələrinin müxtəlif sahələrdə uğurla inkişaf etdiyini bildirdi. NATO iqamətgahında sonuncu səfəri, diplomatik korpusun nümayəndələri ilə keçirdiyi görüşləri və Azərbaycanın BMT Təhlükəsizlik Şurasına sədrlik etdiyi zaman Nyu-Yorka səfərini, eləcə də alyansın Çikaqo sammitində iştirakını məmnunluqla xatırladı.

Azərbaycan NATO-nun Əfqanıstandakı sülhməramlı missiyasında yaxından iştirak edir, tranzit ölkə kimi Əfqanıstana yüklərin daşınmasında səmərəli əməkdaşlıq edir. Prezident İlham Əliyev bildirib: "Biz bir çox məsələlər üzərində çalışırıq. O məsələlərdən biri Əfqanıstandakı vəziyyətdir. İlk günlərdən Azərbaycan sülhməramlı əməliyyatlarda iştirak edib və beynəlxalq təhlükəsizliyə yardım qüvvələrinin apardığı əməliyyatlara töhfə verib. Əfqanıstandakı hərbçilərimizin sayını 2 dəfə artırmışıq. Biz yerləşdirmə, tranzit, logistika, o cümlədən hava məkanından istifadə dəstəyi ilə töhfəmizi də veririk. Bu gün Əfqanıstana göndərilən qeyri-hərbi yüklərin 30 faizindən çox hissəsi Azərbaycan ərazisi ilə daşınır. Biz fəaliyyətimizi davam etdirməyə hazırıq. 2014-cü ildən sonra da bu işlər davam etdiriləcəkdir. Biz 2014-cü ildən sonra da proseslərin inkişafında iştirak etməyə hazırıq. Biz həmçinin təlim proqramlarında, qeyri-hərbi yardım proqramlarında iştirak edirik. Biz əfqan milli ordusunun qəyyumluq fonduna yardım etmişik və əlavə yardımların göstərilməsi ilə bağlı bəyanat vermişik. Başqa sözlə desək, bu əməkdaşlıq çox səmimi və açıqdır və ortaq dəyərlərə əsaslanır. Biz əlimizdən gələni edəcəyik ki, əfqan dostlarımız qarşılaşdıqları çətinlikləri aradan qaldıra bilsinlər".

Azərbaycan Respublikası Silahlı Qüvvələrinin zabiti Ramil Səfərovun ölkəmizə ekstradisiya edilməsi Ermənistan rəhbərliyi, eləcə də onların xaricdəki diaspor təşkilatları və erməniləri müdafiə edən bəzi qüvvələr tərəfindən böyük narahatlıqla qarşılanıb. Ramil Səfərovun əfv olunmasından sonra Ermənistan Təhlükəsizlik Şurasının iclasında çıxış edən Serj Sarkisyan ölkəmizin əleyhinə kəskin bəyanatlar səsləndirib. Bundan sonra erməni terror təşkilatı "ASALA" ölkəmizin Macarıstandakı və bir sıra digər ölkələrdəki səfirliklərinə məktub göndərib. "ASALA" terror təşkilatından daxil olmuş sənəddə Azərbaycan diplomatları, xaricdə təhsil alan azərbaycanlı tələbələr, iş adamları, diaspor təşkilatlarının fəalları hədəf kimi göstərilir və onların qətlə yetiriləcəyi bildirilir.

Prezident İlham Əliyev və NATO-nun Baş katibi Anders Foq Rasmussenin birgə mətbuat konfransında bu məsələlərə də toxunulub. Dövlət başçısı İlham Əliyev məsələyə aydınlıq gətirib: "Mən Ramil Səfərovun məsələsi ilə bağlı danışmaq istərdim. Reaksiyalara cavab olaraq qeyd edirəm ki, Ramil Səfərovla bağlı qərar Avropa Konvensiyasına uyğun verilib və Prezidentin sərəncamı ilə onun əfv edilməsi Azərbaycan Konstitusiyasına uyğundur. Buna görə ümumi nöqteyi-nəzərdən vəziyyət tam aydındır. Azərbaycanı Konvensiyanın pozulmasında günahlandırmağa çalışanlar ya reallığı bilmir, ya da ictimai rəyi çaşdırmaq istəyirlər. Onu da qeyd etmək istəyirəm ki, Ermənistan bundan Azərbaycanla sülh prosesinə xələl gətirmək üçün fürsət kimi istifadə etməli deyildir. Azərbaycan Ermənistan-Azərbaycan, Dağlıq Qarabağ münaqişəsinin beynəlxalq hüquq normaları əsasında sülh yolu ilə həllinə sadiqdir. Minsk qrupunun həmsədr ölkələrinin prezidentlərinin verdiyi bəyanat bizi çox həvəsləndirdi. Bu bəyanatda deyilirdi ki, status-kvo qəbuledilməzdir. Bu status-kvo dəyişilməlidir. Ermənistan status-kvonu qoruyub saxlamağa çalışır".

Ermənistan prezidenti Serj Sarkisyan tərəfindən ölkəmiz əleyhinə səslənən bəyanatlar və erməni terror təşkilatlarının da dərhal məsələyə reaksiya vermələri rəsmi Yerevanın terrorizmin ideoloji mərkəzi qismində çıxış etdiyini bir daha sübuta yetirir. Müasir dövrdə beynəlxalq terrorizmə qarşı fəal mübarizə aparan dünya birliyi erməni terroru təhlükəsinə daha ciddi yanaşmalıdırlar. NATO-nun Baş katibi Anders Foq Rasmussen "ASALA" terror təşkilatının ölkəmizin Macarıstandakı və bir sıra digər ölkələrdəki səfirliklərinə ünvanladığı məktubla bağlı sualı cavablandırıb: "Təbii ki, NATO-nun müttəfiqləri terrorçuluğu bütün formalarda pisləyirlər. Biz bütün məsuliyyətli siyasi liderlərə müraciət edirik ki, onlar terrorçuluğun həvəsləndirilməsindən əl çəksinlər. Yerli, regional vəziyyətə gəldikdə, gərginliyin azaldılmasına, əməkdaşlığın və barışığın təşviq edilməsinə böyük ehtiyac vardır. Mən vəziyyətlə bağlı çox narahatam. Ümid edirik ki, Dağlıq Qarabağ münaqişəsinin sülh yolu ilə həllini görəcəyik. NATO Dağlıq Qarabağ münaqişəsi ilə bağlı mövqeyini təşkilatın Çikaqo sammitində bildirib. NATO bu münaqişənin həllinin tapılmasında birbaşa iştirak edən təşkilat deyildir və Minsk prosesini dəstəkləyir. Buna əsaslanaraq biz münaqişənin sülh yolu ilə həllini görməyə ümid edirik".

Ölkəmiz işğalçı Ermənistanla müharibə vəziyyətindədir. Azərbaycan torpaqlarının 20 faizi işğal altındadır. Belə bir vəziyyət isə müdafiə məsələlərinə diqqətin artırılmasını tələb edir. Prezident İlham Əliyevin də qeyd etdiyi kimi, bu siyasət davam etdiriləcək və ölkənin gəlirləri çoxaldıqca, iqtisadi qüdrəti artdıqca bunun da miqyası genişlənəcəkdir.

Ölkəmizə səfər edən NATO rəsmiləri də keçirdikləri görüşlərdə Azərbaycan ordusunda aparılan islahatlardan razılıqlarını dəfələrlə bəyan edirlər. Bu, həm də Azərbaycan-NATO əməkdaşlığının perspektivləri barədə daha nikbin düşünməyə əsas verir.

Elnur HACALIYEV

Azərbaycan.-2012.- 12 sentyabr.- S.5.