Beynəlxalq konfrans kibernetika və informatikanın problemlərinə həsr olunmuşdur

Sentyabrın 12-də Azərbaycan Milli Elmlər Akademiyası (AMEA) Rəyasət Heyətinin binasında "Kibernetika və informatika problemləri" mövzusunda dördüncü Beynəlxalq konfrans (PCI`2012) işə başlamışdır.

Konfrans Azərbaycan Milli Elmlər Akademiyası, Rabitə və İnformasiya Texnologiyaları və Təhsil nazirlikləri, Kibernetika və İnformasiya Texnologiyaları üzrə Problem Şurası, AMEA Kibernetika İnstitutu, AMEA İnformasiya Texnologiyaları İnstitutu, Milli Aviasiya Akademiyası, Bakı Dövlət Universiteti (BDU), Azərbaycan Dövlət Neft Akademiyası, Azərbaycan Texniki Universiteti, Azərbaycan Memarlıq və İnşaat Universiteti, Qafqaz Universiteti və BDU-nun Tətbiqi Riyaziyyat Elmi-Tədqiqat İnstitutunun təşkilatçılığı ilə keçirilir. Tədbirin texniki sponsoru IEEE (Elektrik və Elektronika Mühəndisləri İnstitutu) Kompyuter Cəmiyyətinin regional şöbəsidir. PCI`2012 konfransına maliyyə dəstəyi Rabitə və İnformasiya Texnologiyaları Nazirliyi və AMEA İnformasiya Texnologiyaları İnstitutu tərəfindən həyata keçirilir.

Əvvəlcə tədbir iştirakçıları ümummilli lider Heydər Əliyevin foyedəki büstü önünə tər çiçək dəstələri düzmüş, ulu öndərin xatirəsini ehtiramla yad etmişlər.

Tədbirdə AMEA-nın prezidenti, akademik Mahmud Kərimov bildirmişdir ki, hazırda respublikada kibernetika və informatika problemləri istiqamətində yüksək səviyyədə elmi-tədqiqat işləri aparılır. Son illər alimlərimiz bu sahələr üzrə yeni elmi problemlər üzərində çalışır və çox mühüm nəticələr əldə edirlər. Seysmologiya, stoxastik analiz, hesablama riyaziyyatı, Cloud-computing texnologiyalarının tətbiqi, "elektron hökumət"in formalaşması və s. istiqamətlərdə mövcud problemlərin həlli ilə bağlı olduqca yeni metodlar, modellər irəli sürülmüşdür.

Qeyd olunmuşdur ki, kibernetika və informatika sahəsində elmi nailiyyətlərin təbliği, bilik və təcrübə mübadiləsinin aparılması baxımından mühüm əhəmiyyət kəsb edən bu tədbir ilk dəfə Bakıda 2006-cı ildə keçirilmişdir. Müntəzəm olaraq 2 ildən bir keçirilən konfransda Azərbaycanın kibernetika və informatika problemləri ilə məşğul olan əsas elmi-tədqiqat qurumları və universitetlərinin nümayəndələri ilə yanaşı, Türkiyə, ABŞ, Rusiya, İtaliya, Koreya Respublikası, İran, Gürcüstan, Belarus və digər ölkələrdən 40-a yaxın alim və mütəxəssis iştirak edir. Konfransa ümumilikdə 250-yə yaxın məruzə təqdim olunmuşdur. IEEE tərəfindən seçilən məqalələr "IEEE Xplore" rəqəmsal kitabxanasına daxil ediləcəkdir.

Akademik M.Kərimov konfransın aktuallığını və əhəmiyyətini qeyd etmiş, onun işinə uğurlar arzulamışdır.

Rabitə və informasiya texnologiyaları nazirinin müavini Elmir Vəlizadə ölkəmizdə informasiya-kommunikasiya texnologiyalarının (İKT) inkişafı istiqamətində görülən işlərdən danışmışdır. Bildirmişdir ki, AMEA-nın institutlarında və ali təhsil müəssisələrindəki kadr potensialı bu işlərin həyata keçirilməsində yaxından iştirak edir. Lakin bu işlərin davamlı olması üçün yeni kadrların yetişdirilməsi vacibdir. Bu istiqamətdə mühüm addımların atıldığını, xüsusi dövlət proqramının həyata keçirildiyini vurğulayan E.Vəlizadə demişdir ki, həmin proqramda İKT prioritet sahələrdən biri kimi qeyd olunmuşdur və bu sahəyə ölkəmizdə xüsusi diqqət yetirilir.

Nazir müavini bildirmişdir ki, təmsil etdiyi qurum imkanları çərçivəsində kadr potensialının hazırlanmasını həyata keçirir. Bütün bunlar bilavasitə innovativ fəaliyyətin təmin olunmasına xidmət edir. Bu istiqamətdə elmlə istehsalatın, elmlə dövlət orqanlarının və təhsil sahəsinin sıx əməkdaşlığının yaradılması vacib məsələlərdəndir.

E.Vəlizadə əminliklə bildirmişdir ki, "PCI`2012" konfransı geniş fikir, bilik və təcrübə mübadiləsinin aparılmasına, kibernetika və informasiya texnologiyaları elminin inkişafına, bu sahədə mövcud problemlərin həlli üçün yeni imkanların yaranmasına, o cümlədən əməkdaşlıq əlaqələrinin davamlı inkişafına təkan verəcəkdir. Bu isə, öz növbəsində, kibernetika və informatika sahəsində innovativ inkişafın əldə olunması baxımından mühüm şərtdir.

Konfransda AMEA Fizika-Riyaziyyat və Texnika Elmləri Bölməsinin akademik-katibi akademik Akif Hacıyev, IEEE-nin regional nümayəndəsi Mehmet Haseki, Rusiyada nəşr olunan "İnformasiya texnologiyaları" jurnalının baş redaktoru Nikolay Filimonov, Kibernetika və İnformasiya Texnologiyaları üzrə Problem Şurasının sədri akademik İsmayıl İbrahimov çıxış edərək bildirmişlər ki, kibernetika və informatikanın əsas problemləri həll edilmədən bu sahədə innovativ inkişafa nail olmaq qeyri-mümkündür. Hazırda ölkəmizdə kibernetika və informatika problemləri istiqamətində yüksək səviyyədə elmi-tədqiqat işlərinin aparıldığı, bu cür konfransların keçirilməsinin beynəlxalq əlaqələrin möhkəmləndirilməsində mühüm rol oynadığı qeyd edilmişdir. Natiqlər "PCI`2012"-nin Azərbaycanda elmi-texniki sahənin inkişafına böyük töhfə verəcəyinə əminliklərini ifadə etmişlər.

Sonra AMEA Kibernetika İnstitutunun direktoru akademik Telman Əliyevin "Dağıdıcı zəlzələlərdən dəymiş zərərin minimallaşdırılması üçün texnologiya və sistemlər", Çexiyanın Hradek Kralov Universitetinin kafedra müdiri professor Hana Skalskanın "Texnologiyaların dövlət təcrübəsində tətbiqi: inkişafı, səmərəliliyi və problemlər", ABŞ-ın Corc Vaşinqton Universitetinin professoru Nozer Sinqpurvallanın "Resursların istismarı və onların ötürülmə riskləri", İspaniyanın Barselona Universitetinin əməkdaşı Anna Mariya Gil Lafuentenin "Qloballaşma şəraitində İspaniya, Rusiya və Azərbaycanda müqayisəli iqtisadi analizin nəzərdən qaçırılmış təsirləri" mövzularında məruzələri dinlənilmişdir.

Konfransın bölmə iclaslarında informasiya-kommunikasiya texnologiyaları, intellektual optimallaşdırma, modelləşdirmə, ədədi üsullar və hesablama texnologiyaları, identifikasiya, sosial-iqtisadi sistemlərdə qərarların qəbul edilməsi və digər mövzular müzakirə olunacaqdır.

İclaslarda, həmçinin müasir dünyada kibernetika və informatikanın inkişaf tendensiyaları və perspektivləri, bu sahələrdə mövcud problemlər və onların həlli yolları ilə bağlı fikir mübadiləsi aparılacaqdır. Konfrans sentyabrın 14-də başa çatacaqdır.

Azərbaycan.-2012.- 13 sentyabr.- S.4.