Türkiyədə «Caucasus İnternational» jurnalının dördüncü nömrəsi çap olunmuşdur

Ankarada fəaliyyət göstərən Avrasiya Elm Adamları Dərnəyi ilə Azərbaycan Respublikasının Prezidenti yanında Strateji Araşdırmalar Mərkəzinin (SAM) birgə nəşri olan "Caucasus İnternational" jurnalının dördüncü nömrəsi Türkiyədə çap olunmuşdur.

SAM-dan AzərTAc-a bildirmişlər ki, jurnalın bu nömrəsinin əsas mövzusu Xəzər regionunda enerji siyasəti olmuşdur. Nəşrdə həmçinin qlobal mövzulara çevrilmiş İran, Suriya məsələləri ilə bağlı aparıcı ekspertlərin yazıları da dərc edilmişdir.

Jurnalda nüfuzlu İran-İsrail eksperti Meir Cavedanfarın "Suriyada qeyri-sabitlik: İranın daxili və xarici siyasəti", ABŞ-ın German Marşall Fondunun əməkdaşı Coşua Voulkerin "Avrasiya asılılığı: Azərbaycanın üçtərəfli balanslaşma siyasəti", iranlı ekspert, ABŞ-da İran-Amerika Şurasının prezidenti Trita Parsinin "İranın nüvə siyasəti ilə bağlı ABŞ-ın mövqeyi və siyasəti", israilli ekspert Aleksandr Murinsonun İsrail-Azərbaycan əlaqələrinə dair yazıları, gündəlikdəki məsələlərin analitik təhlilləri oxuculara təqdim olunur.

Bundan əlavə, jurnalda Ceymstaun Fondunun prezidenti Qlen Hovardın "Yeni Dəmir İpək Yolu: Bakı-Tbilisi-Qars dəmir yolu", Azərbaycan Respublikası Prezidenti Administrasiyasının siyasi təhlil və informasiya təminatı şöbəsinin müdiri Elnur Aslanovun "Qarabağın gələcəyi Qafqazın gələcəyidir", Rusiya İctimai-siyasi tədqiqat mərkəzinin direktoru Vladimir Yevseyevin "İranın nüvə silahı: Rusiyanın yanaşması", SAM-ın iqtisadiyyatın təhlili və qloballaşma məsələləri şöbəsinin aparıcı elmi işçisi Gülmira Rzayevanın "Mürəkkəb dəhliz: Avropaya qaz ötürülməsi yalnız iqtisadiyyat deyil" yazıları da yer almışdır. Həmçinin nəşrdə Azərbaycan Diplomatik Akademiyasının professoru Elnur Soltanov Azərbaycanın son 20 ildəki enerji siyasətinin davam edən və dəyişən məsələlərini tədqiq etmişdir. Eyni zamanda, keçən saydan başlayaraq "Caucasus İnternational"ın postsovet məkanı ilə bağlı çıxan kitabların təhlilini apardığı layihə jurnalın yeni nömrəsində də davam etdirilmişdir.

Qeyd edək ki, "Caucasus İnternational" təkcə Cənubi Qafqaz regionunda deyil, dünyadakı qlobal məsələlərin intellektual müzakirəsini təşviq edir. Jurnalı artıq Türkiyənin kitab satış dükanlarından, www.amazon.com saytından, eləcə də Bakının kitab mağazalarından əldə etmək mümkündür.

Azərbaycan.-2012.- 13 sentyabr.- S.4.