Ermənistanın mövqeyi dünya siyasətçiləri tərəfindən kəskin tənqid olunur

Azərbaycan Ordusunun zabiti Ramil Səfərovun vətənə ekstradisiyası və əfv olunması ilə əlaqədar olaraq beynəlxalq miqyasda süni ajiotaj yaratmağa çalışan Ermənistan hakimiyyətinin bununla Dağlıq Qarabağ münaqişəsinin həlli prosesinə zərbə vurmaq niyyətini güdməsi hər kəsə məlumdur. İlk günlərdə məsələ ilə bağlı bəyanatlar səslənsə də, prosesi dərindən araşdıran siyasi dairələrdə Azərbaycanın haqlı olduğunu ortaya qoyan fikirlər səsləndirilir.

Azərbaycan Silahlı Qüvvələrinin zabiti Ramil Səfərov "Məhkum olunmuş şəxslərin verilməsi haqqında" Konvensiyaya uyğun olaraq Azərbaycan tərəfinə təhvil verilmişdir. Bu konvensiyaya əsasən, tərəflərin birinin ərazisində məhkum olunmuş şəxs konvensiyanın müddəalarına uyğun olaraq digər dövlətə verilə bilər. Yenə də konvensiyaya uyğun olaraq hökmün icrası qəbul edən dövlətin qanunvericiliyi ilə tənzimlənir və bu dövlət bütün zəruri qərarları qəbul etməkdə səlahiyyətlidir. Prezident İlham Əliyev Qəbələdə ATƏT-in üzvü olan ölkələrin səfirlərini qəbul edərkən bu məsələyə bir daha münasibət bildirərək deyib: "Ermənistanda Ramil Səfərovun ekstradisiyası və əfv olunması ilə bağlı hay-küy yaranıb. Mən bununla bağlı münasibətimi artıq bildirmişəm. Bir daha bildirirəm ki, Səfərovun ekstradisiyasından tutmuş əfvinə qədər hər şey Avropa Konvensiyasına, o cümlədən Azərbaycan Konstitusiyasına uyğun həyata keçirilib".

Artıq Avropada Ramil Səfərovun ölkəmizə təhvil verilməsi barədə qərarın beynəlxalq hüquq norma və qaydalarına uyğun olması və Prezident İlham Əliyev tərəfindən əfvinin hüquqi xarakter daşıması barədə Azərbaycan tərəfinin mövqeyini bölüşən bəyanatlar eşidilməkdədir. Avropanın bir sıra dövlətlərinin deputatları Ramil Səfərovun Azərbaycana qaytarılması ilə əlaqədar Ermənistanın mövqeyinə kəskin etirazlarını bildirir, rəsmi Yerevanın bu məsələdə tutduğu mövqeyi kəskin pisləyirər. Məsələn, Almaniya Bundestaqının deputatı, Xristian Demokrat Partiyasının üzvü Olav Gutting hesab edir ki, ekstradisiyanın Avropa hüquq müstəvisində qanuniliyinə heç bir şübhə yoxdur. Deputat Ermənistan hökumətini, eləcə də erməni diasporunu Almaniyanın tərəfdaşı olan Macarıstana qarşı tənqid tonunu azaltmağa səsləmişdir. O vurğulamışdır ki, Ermənistan tərəfinin Macarıstanın beynəlxalq hüququ pozmasına dair iddialarının sadəcə yanlış və əsassız olduğu sübut oluna bilər.

Almaniya Bundestaqının digər üzvü, hakim Xristian Demokrat İttifaqı Xristian-Sosial İttifaqı parlament fraksiyasının xarici siyasət komitəsinin sözçüsü Filipp Misfelder də məsələyə münasibət bildirərək deyib ki, Avropa İttifaqının üzvü kimi Macarıstan Respublikası Aİ-nin hüquqi dövlət prinsiplərinə bağlıdır, ona görə də Budapeştin Ramil Səfərovu Azərbaycana ekstradisiya etməsinin qanunauyğunluğuna heç bir şübhə yoxdur. Ermənistan hökumətinin "bizim yaxın tərəfdaşımız olan Macarıstanın Ramil Səfərovu Azərbaycana ekstradisiya etməsi Azərbaycan ilə Ermənistan arasında sülh prosesini təhlükə altına alır" iradı Macarıstanda mövcud olan Avropa ədliyyə və hüquq standartlarına uyğun gəlmir.

F.Misfelder hesab edir ki, əslində beynəlxalq hüquqla tanınmayan "Dağlıq Qarabağ respublikası"nda cari il iyulun 19-da keçirilmiş qondarma prezident seçkiləri beynəlxalq birliyin Ermənistan və Azərbaycan arasında sülhün bərqərar olması və normal qonşuluq münasibətlərinin yaradılması istiqamətində səylərinə ağır zərbə vurmuşdur. Qondarma prezident seçkilərinin birtərəfli nəticəsi Ermənistan-Azərbaycan, Dağlıq Qarabağ münaqişəsinin sülh yolu ilə həlli imkanlarını yenidən çətinləşdirmişdir.

Böyük Britaniya Lordlar Palatasının üzvləri də Ermənistanın bu məsələ ilə bağlı mövqeyini kəskin tənqid etmişlər. Britaniya Parlamentinin Lordlar Palatasının üzvü Ken Maginnis demişdir: "Ermənistan ordusunun zabitini qətlə yetirdiyi üçün həbs olunan və cəzasının səkkiz ilini çəkən Ramil Səfərovun bu yaxınlarda azadlığa buraxılması Ermənistanda və erməni diasporu tərəfindən birmənalı qarşılanmamışdır. Həssas regionda gərginliyi artıracaq hər bir şeyə qarşı çıxmaq lazımdır. Ermənistan hökuməti də qəbul etməlidir ki, bir vaxtlar azərbaycanlılar və türklər də qətlə və terrorizmə görə məhkum olunmuş ermənilərin azadlığa buraxılması və ondan sonra əfv edilməsindən hiddətlənmişlər. Xatırlasınlar ki, Parisin aeroportunda "Türk Hava Yolları"na məxsus şöbəyə hücum nəticəsində türk və avropalı dinc vətəndaşlar həlak olmuşdular. Lakin buna baxmayaraq, nə beynəlxalq ictimaiyyət, nə də Qərb mətbuatı məhkum olunmuş o terroristlərin azad edilməsini pisləyərək gərginliyi artırmaq üçün fürsət axtardı".

Lordlar Palatasının üzvü lord Laird də həmkarının fikrini bölüşür. Deputat demişdir: "Erməni zabitini öldürdüyü üçün cəza çəkən Ramil Səfərovun səkkiz ildən sonra azadlığa buraxılması Ermənistanda çox kəskin qarşılanmışdır. Lakin Ermənistanın reaksiyasının getdikcə əndazəsini aşma təhlükəsi vardır. R.Səfərovun azad olmasına cavab olaraq onlar Dağlıq Qarabağ münaqişəsinin yenidən alovlandırılması, Macarıstan ilə diplomatik münasibətlərin pozulması və Avropada yaşayan azərbaycanlıların öldürülməsi ilə hədələyir. Amma nədənsə R.Səfərovun doğulduğu Cəbrayıl rayonunun son 20 ildə erməni işğalı altında olması heç bir yerdə qeyd olunmur. Bütün regionda sülh Ermənistanın geri addım ataraq özünü təmkinli aparmasından asılıdır".

Lordlar Palatasının digər üzvü lord Kilkluni də məsələyə münasibət bildirərək vurğulamışdır ki, ermənilər özləri də illər boyu xaricdə terror hücumları və qətllər törətmiş bir neçə vətəndaşının azad olunmasını təmin etmişlər. Ermənistan prezidenti Serj Sarkisyan sülhə çağırmaqdansa, müharibə ilə hədələyir. "Dondurulmuş" münaqişələrin tez bir zamanda necə alovlandığını görmüşük. Dağlıq Qarabağın işğalı zamanı müharibəni dadan Ermənistan prezidenti dərk etməlidir ki, yenidən açıq düşmənçiliyə qayıtmaq tərəflərin hər biri üçün dəhşətli ola bilər".

Almaniyanın hakim Xristian Demokrat İttifaqı Xristian-Sosial İttifaqı parlament fraksiyasının xarici siyasət üzrə işçi qrupunun sədri Florian Hahn demişdir ki, Ermənistanın rəsmi hakimiyyət dairələrinin Ramil Səfərovun Macarıstan tərəfindən Azərbaycana qaytarılmasına reaksiyaları daha artıq narahatlıq yaradır. Qanuniliyinə heç bir şübhə olmayan bu ekstradisiyadan Ermənistan bizim Avropa tərəfdaşımız olan Macarıstana qarşı istifadə edir. Ermənistan tərəfindən Macarıstan hökumətinin beynəlxalq hüququn normalarına əsaslanan qanuni hərəkətinə qarşı reaksiyalarının davam etməsi Cənubi Qafqazda atəşkəsə daha ağır zərbə vura və onun pozulmasına gətirib çıxara bilər.

Göründüyü kimi, Ermənistanın beynəlxalq miqyasda yaratmağa çalışdığı süni ajiotaj artıq dünyanın mütərəqqi siyasi dairələri və siyasətçiləri tərəfindən kəskin tənqid olunmaqdadır. Səslənən bəyanatlarda həmçinin Ermənistan dövlətinin terrorçu xarakteri də ortaya qoyulur. Bütün bunlar ondan xəbər verir ki, Ermənistan hakimiyyətinin Ramil Səfərovun ekstradisiyası və əfvi ilə bağlı nümayiş etdirdiyi manipulyasiya cəhdləri nəticə etibarilə onun özünə problemlər yaradaraq ifşasına gətirib çıxarır.

Rəşad CƏFƏRLİ

Azərbaycan.-2012.- 13 sentyabr.- S.5.