Astanada TÜRKSOY-un üzvü olan ölkələrin UNESCO-nun işləri üzrə Milli komissiya və komitələrinin üçüncü müşavirəsi öz işinə başlamışdır

Astananın türk dünyasının mədəniyyət paytaxtı elan olunması ilə əlaqədar sentyabrın 13-də Qazaxıstan paytaxtında TÜRKSOY-un üzvü olan ölkələrin UNESCO-nun işləri üzrə Milli komissiya və komitələrinin üçüncü müşavirəsi öz işinə başlamışdır.

Tədbirdə Azərbaycanın UNESCO üzrə Milli Komissiyasının (MK) baş katibi Günel Əfəndiyevanın rəhbərliyi ilə nümayəndə heyəti də iştirak edir.

Astana şəhərinin akimi, UNESCO və İSESCO üzrə Qazaxıstan Milli komissiyasının sədri İmanqali Tasmaqambetov müşavirəni açaraq bildirmişdir ki, türkdilli ölkələr və subyektlər arasında bu dialoqa 2010-cu ildə Ankarada başlanmış, ötən il Kazanda görüş keçirilmişdir. Şadam ki, növbəti müşavirə Astanada keçirilir və Qazaxıstan TÜRKSOY və UNESCO ilə humanitar əlaqələrin dərinləşdirilməsində maraqlıdır.

Qazaxıstanın xarici işlər naziri Erjan Kazıxanov, Türkdilli Dövlətlərin Əməkdaşlıq Şurasının baş katibi Xəlil Akınçı, görkəmli siyasi və ictimai xadim, Qazaxıstanın UNESCO-dakı nümayəndəsi Oljas Süleymenov, TÜRKSOY-un baş direktoru Düsen Kaseinov və başqaları çıxış etmiş, deyilmişdir ki, gələn il TÜRKSOY-un yaradılmasının 20 illiyi tamam olur. Öz məqsəd və vəzifələri, türkdilli xalqların mədəniyyətinin təbliği və inkişafı istiqamətində TÜRKSOY bir növ türk dünyasının UNESCO-sudur.

Sonra Azərbaycan, Türkiyə, Qırğızıstan, Türkmənistan və Rusiyanın altı türkdilli subyektləri - Tatarıstan, Başqırdıstan, Altay, Xakasiya, Saxa-Yakutiya, Tıva respublikaları və Moldovanın Qaqauz Yeri muxtar inzibati bölgəsinin təqdimatı keçirilmişdir.

Günel Əfəndiyeva bildirmişdir ki, bu il ölkəmizin UNESCO-ya üzv olmasından 20 il ötür. Bu illər ərzində ölkəmiz, o cümlədən Milli Komissiya təşkilatın prioritet sahələri üzrə intensiv əməkdaşlıq həyata keçirmiş, çoxsaylı uğurlu layihələrə imza atmışdır. Bildirilmişdir ki, qurum ilə Azərbaycan arasında əməkdaşlıq əlaqələrinin inkişafında Heydər Əliyev Fondunun prezidenti, UNESCO və İSESCO-nun xoşməramlı səfiri, Milli Məclisin deputatı Mehriban xanım Əliyevanın xüsusi rolu olmuşdur. Onun fəaliyyəti kilsə və məscidlərin, mədəni abidələrin bərpası və bu kimi çoxsaylı layihələrin həyata keçirilməsi ilə məhdudlaşmır. Mehriban Əliyeva Afrikada savadsızlığın ləğvi, xarici ölkələrdə məktəblərin tikintisi kimi layihələrin həyata keçirilməsi sahəsində də uğurla fəaliyyət göstərir.

G.Əfəndiyeva Ermənistan-Azərbaycan, Dağlıq Qarabağ münaqişəsi haqqında danışmış, Azərbaycanın işğal olunmuş ərazilərində Ermənistanın dağıtdığı milli mədəni sərvətlərimiz haqqında ətraflı məlumat vermişdir.

Müşavirə öz işini davam etdirir.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.-2012.- 14 sentyabr.- S.7.