Hesabında milyonlarla günahsız insanın qanı olan erməni terroru yenidən baş qaldırır

Dünya birliyi bu dəhşətin qarşısını almasa, yeni faciələr törədiləcəkdir

İki onillikdən artıqdır ki, erməni silahlı birləşmələri Azərbaycan torpaqlarının 20 faizini işğal edib, minlərlə günahsız insanı qətlə yetirib, Xocalıda misli görünməmiş soyqırımı törədiblər. Münaqişənin gedişində 30 min Azərbaycan vətəndaşı dünyasını dəyişib, 200 mindən çoxu yaralanıb və əlil olub, əsir və girov götürülüb, itkin düşüb. Bir milyondan çox azərbaycanlı ev-eşiyindən didərgin salınıb. Ölkənin hər səkkiz vətəndaşından birinin yaşayış hüququ pozulub. Beynəlxaq qurumlar rəsmi olaraq Azərbaycanı terrorizmə məruz qalmış dövlət kimi qəbul ediblər. Bir neçə gün öncə Qəbələdə ATƏT-in üzvü olan ölkələrin səfirlərini qəbul edərkən Prezident İlham Əliyev öz nitqində bu məsələyə toxunmuşdu: "...Siz torpaqlarınızı işğal edən ölkə ilə əməkdaşlığımızı necə gözləyə bilərsiniz? Siz öz ölkələrinizin bütün tarixi abidələrini darmadağın etmiş, ərazilərinizi işğal etmiş və bu işğalı davam etdirmək niyyətində olan işğalçı bir ölkə ilə əməkdaşlığı necə təsəvvür edə bilərsiniz? Bu, mümkün deyil, işğala son qoyulmalıdır..."

Azərbaycan və Türkiyənin erməni terrorizminin hədəfinə çevrilməsinin tarixi xeyli dərindir. Erməni terrorizmini ilk olaraq imperialist dövlətlərin ideologiyası və türkə olan düşmənçilik mövqeyi yetişdirib. Onlar başqalarının torpağına, mədəniyyətinə düşmən kimi tərbiyə olunublar və fürsət düşdükdə türk-müsəlmanları xüsusi qəddarlıqla öldürmək tapşırığı alıblar. Bunun üçün əvvəlcədən böyük terror məktəbi keçiblər. Bu xətt erməni terror təşkilatlarının daim siyasi-ideoloji fəaliyyətlərinin nüvəsində dayanıb. İki əsrdən çoxdur ki, tariximiz belə qanlı səhifələrlə doludur. XX əsrin əvvəllərindən başlayaraq türk-müsəlman qatilləri olmuş Dro, Andranik, Njde, Mikoyan və Teyleryanın adları Ermənistanın milli qəhrəmanı səviyyəsinə qaldırılaraq adları müxtəlif formada əbədiləşdirilir, heykəlləri ucaldılır.

Ən qanlı cinayətləri ilə məşhur olan ASALA da bu məqsədlə 1975-ci ildə Livanın paytaxtı Beyrutda yaradılıb. Təşkilatın təlim bazaları Suriya ərazisində olub. Məqsəd 1915-ci il qondarma "erməni soyqırımı"nın intiqamını almaq, bu "tarixi" dünyaya qəbul etdirmək, "Böyük Ermənistan" ideyası uğrunda Türkiyədən təzminat, Azərbaycandan isə torpaq qoparmaq idi. ASALA-nın siyasi-ideoloji kursunu hazırlayanlar isə erməni "ziyalıları" olmuşlar. XX əsr boyu erməni terrorçuları insanları, xüsusən də, yüzlərlə Azərbaycan və Türkiyə diplomatını qətlə yetirib və hər dəfə də xristian dövlətləri tərəfindən cəzadan yayındırılıblar. Hətta bəraət alanlar, mükafatlandırılanlar da olub. ASALA-dan öncə yaradılan "Armenakan", "Qnçaq", "Daşnaksütyun" partiyaları da Türkiyədə bir çox terror aktı törətmiş, azərbaycanlı aydınları Tiflisdə və İstanbulda qətlə yetirmiş, bundan başqa, Azərbaycanın bir çox bölgələrində insanları kütləvi şəkildə amansızlıqla öldürmüşlər. Türk-Azərbaycan əhalisinə qarşı hər zaman təxribat-pozuculuq və terrorçuluq planları həyata keçirən Ermənistanın yaratdığı terror təşkilatlarının hesabında milyonlarla insanın günahsız qanı var.

1920-ci il iyunun 19-da Azərbaycan Xalq Cümhuriyyətinin Baş naziri olmuş Fətəli xan Xoyski Tiflisdə erməni terrorizminin qurbanı olur. Bu hadisədən bir ay sonra yenə də Tiflisdə AXC Milli Məclis sədrinin müavini Həsən bəy Ağayev qətlə yetirilir. Bir il sonra isə AXC-nin daxili işlər naziri işləmiş Behbud xan Cavanşir İstanbulda yaşadığı hotelin qarşısında erməni terrorçusu tərəfindən amansızlıqla qətlə yetirilir. Qanlı salnamə bütün gücü ilə davam edib. 1921-ci il martın 15-də Türkiyənin daxili işlər naziri Tələt paşa, dekabrın 5-də Romada böyük vəzir Səid Həlim paşa öldürülür. 1922-ci il iyulun 25-də Türkiyənin hərbi-dəniz qüvvələrinin naziri Camal paşa Tiflisdə qətlə yetirilir. Terroristlərin aqibəti ilə maraqlansaq görərik ki, hər biri cəzasını çəkmədən azadlığa buraxılıb. Onların müalicəsi və istirahəti üçün hər cür şərait yaradılmış, gözdən pərdə asmaq üçün çəkdikləri cəza müddətində maddi və mənəvi yardımlarla təmin olunmuşlar.

Tələt paşanın qatili Soqomon Teyleryana Berlin məhkəməsi bəraət verib. Behbud xan Cavanşirin qatili Toplakyan təqsirli bilinsə də, Britaniya hərbi tribunalı onu məhkəmə zalından azadlığa buraxıb. Guya terroru törədərkən anlaqsız vəziyyətdə olub. Türkiyənin siyasi xadimlərindən olan Əhməd bəy Ağaoğlunun qızı, Türkiyənin ilk hüquqşünas qadını Sürəyya Ağaoğlu qatilin cəzalandırılması ilə bağlı müvafiq qurumlara müraciət etsə də, ədalət uğrunda savaşa çıxsa da, heç bir nəticəsi olmayıb. Qatil Toplakyan azad və sərbəst yaşayıb. 1973-cü il yanvarın 27-də ABŞ-ın Santa-Barbara şəhərində erməni yazıçısı Qurgen Yanikyan iki türk diplomatını - 49 yaşlı baş konsul Mehmet Bayduru və 31 yaşlı Bahadur Dəmiri "Baltimor" mehmanxanasına dəvət edərək onları orada qətlə yetirir. Bu qatil nəinki cəza alır, əksinə, öldürdüyü diplomatları "şər qüvvə" adlandırır. Siyahını uzatmaq da olar. Bunlar Ermənistanın təşkil etdiyi terror hadisələrinin az bir qismidir. ASALA-nın ilk qətl sifarişi də məhz türk diplomatları, iş adamları, sıravi insanlar idi. Onlara dünyanın hər yerindən yardımlar axırdı ki, bu da dünyanın terroru dirçəltmək, törətdikləri cinayətlərə haqq qazandırmaq mənzərəsi idi.

Keçmiş Sovet İttifaqı bu sırada həmişə "bayraqdar" olub. Kommunist rəhbərliyi hər zaman ermənilərdən yetərincə yararlanıb, ideoloji və maliyyə yardımını əsirgəməyib, qondarma "erməni soyqırımı" iddiasının yayılmasına kömək edib. 1987-ci ildə ASALA ilə PKK arasında bağlanan müttəfiqlik sazişindən sonra meydan PKK-ya verildi. Həmin vaxtdan da bu terror təşkilatının Türkiyə əleyhinə qanlı fəaliyyəti durmadan genişlənir. 10 minlərlə türk vətəndaşı PKK terrorunun qurbanı olub və bu qurbanların sayı indi də durmadan artır. Vaxtaşırı Türkiyənin müxtəlif bölgələrində əsgərlər şəhid olur. Uzun müddət İtaliyada qanlı terror aktları törətmiş "Qırmızı Briqada" terrorçu təşkilatının üzvü Marina Petrella 15 il ərzində Fransada sərbəst yaşadıqdan sonra İtaliyanın xahişi ilə 2007-ci ildə Paris ətrafında həbs olunmuşdu. İtaliya məhkəməsinin 1992-ci il qərarı ilə 1981-ci ildə törədilmiş polis zabitinin qətlinə, eləcə də, adam və silah oğurluğu daxil olmaqla digər cinayətlərə görə Petrellaya ömürlük azadlıqdan məhrumetmə cəzası verilmişdi. Lakin Fransa məhkəməsi onun ekstradisiyası haqqında qərar qəbul edir. Məhkəmə qərarını dəyişmək və ya ləğv etmək səlahiyyətinə malik olmayan Fransa Prezidenti (Nikola Sarkozi) İtaliyanın Baş nazirinə (Silvio Berluskoni) "Böyük səkkizliyin" 2008-ci ildə keçirilən zirvə görüşündə ölkəsinin Petrellanı əfv olunmaq şərtilə İtaliyaya verəcəyini bildirmişdi. Yəni, Fransa Prezidenti İtaliyada terror əməli törətmiş Petrellanı qeyd-şərtsiz ekstradisiya etməli olduğu halda, onun İtaliyada əfvi ilə əlaqədar İtaliya Baş nazirindən təminat almışdır.

Hər zaman Ermənistan dövləti tərəfindən siyasi, ideoloji, maliyyə və təşkilati dəstək alan terrorçular, xüsusən də, ASALA Ermənistan-Azərbaycan, Dağlıq Qarabağ münaqişəsində daha da fəallaşdı. Sumqayıt hadisələrində, Bakı metrosunda törədilən terror aktlarında, Moskva-Rostov sərnişin qatarında baş verən partlayışda Ermənistan dövlətinin və onun maliyyələşdirdiyi terror təşkilatlarının əli olduğu sübuta yetirildi. Qəddar Monte Melkonyanın adı bizlərə daha çox tanışdır. ASALA-nın yetirməsi olan bu qatil 1990-cı ildə Qarabağda yüzlərlə azərbaycanlı gənci qətlə yetirmişdi. Azərbaycan ordusunun hərbi əməliyyatlarının birində həmin terrorçu məhv edilmişdi. 1992-ci il 11 sentyabr tarixində Kəlbəcər rayonunda saxlanılmış, Ermənistanda dislokasiya olunmuş Rusiya Silahlı Qüvvələrinin 7-ci ordusunun (39826 saylı hərbi hissə) hərbi qulluqçuları olan şəxslər, sıravilər - Yaroslav Yevstiqneyev, Vladislav Kudinov, Konstantin Tukiş, Andrey Filippov, Mixail Lisovoy və baş leytenant Vladimir Seminov Azərbaycan Ali Məhkəməsinin Hərbi Kollegiyasının qərarı ilə azadlıqdan məhrumetmə və ölüm cəzasına məhkum edilmişlər. Adları çəkilən hərbi cinayətkarlar 1993-cü ildə Rusiyaya aparıldıqdan sonra azadlığa buraxılmışdılar. 1991-ci il yanvarın 9-da jurnalist Salatın Əsgərova və rus hərbçilərinin ölümü ilə nəticələnən terror aktında əli olduğuna görə həbs olunmuş Artaşes Mkrtçyan, Manvel Sarkisyan, Artur Zaxaryan, Yenok Osipyan, Arvid Manqasaryan, Qaqik Arutunyan və Qarnik Arustamyan cəzalarının qalan müddətini Ermənistan ərazisində çəkilməsi şərti ilə Xocalı soyqırımı zamanı girov götürülmüş Xocalı sakinləri və digər azərbaycanlı vətəndaşlarla dəyişdirilmişdilər. Lakin həmin terrorçuların da taleyi özlərindən əvvəlki kimi oldu, tez bir zamanda azadlığa buraxıldılar. Müxtəlif ölkələrdə çoxsaylı qətllərdə ittiham edilərək məhkəmə hökmü ilə ittiham olunmuş erməni cinayətkarlarının ekstradisiyası və sonra əfv edilərək qəhrəman səviyyəsinə yüksəldilməsi nümunələri yüzlərlədir. Araşdırma aparsaq, görərik ki, onların qətlə yetirdikləri insanların əksəriyyəti türk və Azərbaycan mənşəli insanlardır. Samvel Babayan 1991-ci il avqustun 13-də dinc azərbaycanlı əhaliyə qarşı terror həyata keçirməkdə ittiham olunmuşdu. Elə həmin il Azərbaycana qarşı hərbi əməliyyatlarda iştirak etməmək şərti ilə girov götürülmüş azərbaycanlı hərbi əsirə dəyişdirilmişdi. Lakin çox keçmədən cinayətkar Şuşa əməliyyatının təşkilatçılarından biri olmuş, hətta sonralar qondarma "Dağlıq Qarabağ Respublikası"nın müdafiə naziri olmuşdur.

Ermənistan dövlətinin simasında ASALA Ramil Səfərovu, Azərbaycan və türk diplomatlarını qətlə yetirəcəyini bəyan edir. Görünən odur ki, bəşəriyyətə meydan oxuyan terrorizm müasir qloballaşma şəraitində yenidən baş qaldırır. Müasir dünya özünün bütün müxtəlifliyi və ziddiyyətləri ilə yanaşı, bir sıra ümumi problem və məsələlərlə rastlaşır ki, onların da həlli yalnız dövlətlərin əməkdaşlığı sayəsində mümkündür. Azərbaycan da bu əməkdaşlıqdan və beynəlxalq hüquq əsasında dövlət suverenliyinə əsaslanan müstəqil hüququndan istifadə edərək vətəndaşını əfv edib. Nədənsə, bunu nə Ermənistan, nə də dünya birliyi həzm edə bilir. Dünyanın heç bir dövləti ASALA-nın bəyanatına münasibət bildirməyib. Azərbaycan bu gün elə bir güclü dövlətdir ki, ASALA qaniçənlərinin qarşısını almaq iqtidarındadır. Ölkə Prezidenti çıxışlarında da açıq-aşkar bəyan edir ki, Azərbaycan özünü qorumaq iqtidarındadır, hər bir terrora layiqli cavab verməyə hazırdır.

Rəsmiyyə RZALI

Azərbaycan.-2012.- 16 sentyabr.- S. 3.