«Ziya Bünyadov - qəhrəman kimi döyüşdü, qəhrəman kimi yaşadı» miniatür kitabının təqdimatı keçirilmişdir

Sentyabrın 14-də Miniatür Kitab Muzeyində "Ziya Bünyadov - qəhrəman kimi döyüşdü, qəhrəman kimi yaşadı" miniatür kitabının təqdimatı keçirilmişdir.

AzərTAc xəbər verir ki, miniatür kitab görkəmli tarixçi və şərqşünas, tanınmış ictimai xadim, akademik Ziya Bünyadovun 90 illiyinə həsr olunmuşdur.

Akademik Ziya Bünyadovun böyük şəxsiyyəti, hələ sovet dövründə atdığı cəsarətli addımlar haqqında geniş məlumat verən Miniatür Kitab Muzeyinin yaradıcısı və rəhbəri Zərifə Salahova bildirmişdir ki, kitabın ilk səhifələrində akademikin 90 illik yubileyinin keçirilməsi haqqında Azərbaycan Respublikası Prezidentinin 2011-ci il 24 noyabr tarixli sərəncamı verilmişdir. Daha sonra burada ümummilli lider Heydər Əliyevin akademik Ziya Bünyadov haqqında dəyərli fikirləri də öz əksini tapmışdır.

Nəşrdə əməkdar jurnalist İradə Əliyevanın elm xadiminin ömür yoluna və yaradıcılıq fəaliyyətinə həsr edilmiş məqaləsi yer almışdır. Burada böyük şəxsiyyətin həyatının ən əlamətdar, yaddaqalan anları, hadisələri, qızıl ulduzlu qəhrəmanın keçdiyi döyüş yolu öz əksini tapmışdır.

Kitabda xüsusi vurğulanmışdır ki, akademik Ziya Bünyadovun qələmindən çıxan 300-dən çox elmi əsərin hər biri onun geniş erudisiyasını, hədsiz işgüzarlığını və böyük tədqiqatçılıq qabiliyyətini nümayiş etdirir.

Nəşrdə güclü zəkası, gözlənilməz proqnozları, heyrətamiz fəhmi, qeyri-adi duyumu, həssaslığı ilə seçilən akademikin elm təşkilatçısı, AMEA-nın vitse-prezidenti, Milli Məclisin deputatı kimi fəaliyyətindən də, tarix elminə gətirdiyi yeniliklərdən də söhbət açılmış, AMEA-nın Şərqşünaslıq İnstitutuna rəhbərlik etdiyi dövr geniş işıqlandırılmış, bu elm məbədinin inkişafında, mütəxəssislərin yetişməsində müstəsna xidmətləri xüsusi vurğulanmışdır.

Kitabda respublikada milli azadlıq hərəkatının inkişafında, Yeni Azərbaycan Partiyasının yaradılmasında Ziya Bünyadovun apardığı işlər barədə də ətraflı məlumat verilmişdir.

Miniatür kitabda daha sonra akademik Ziya Bünyadovun avtoqrafı və imzası ilə "Nə üçün Sumqayıt? Vəziyyətin təhlili" məqaləsi (rus dilində) verilmişdir.

Yüz nüsxə tirajla çap olunmuş kitabda 53 ağ-qara fotoşəkil yerləşdirilmişdir. "Kitab" Cəmiyyətinin xətti ilə "Elm xadimləri" seriyasından "İndiqo" mətbəəsində yüksək poliqrafik səviyyədə nəşr olunan 270 səhifəlik miniatür kitab 40x45 mm formatdadır.

Təqdimat mərasimində Azərbaycan Milli Elmlər Akademiyası Şərqşünaslıq İnstitutunun direktoru, Milli Məclisin deputatı, professor Gövhər Baxşəliyeva, əməkdar jurnalist İradə Əliyeva və başqaları akademik Ziya Bünyadovun ictimai və elmi fəaliyyətindən geniş danışmışlar.

Azərbaycan.-2012.- 16 sentyabr.- S.6.