Əli ƏHMƏDOV: Erməniləri azərbaycanlılara qarşı terror hərəkətlərinə səsləyən Jirinovski bununla əslində erməni terrorizmini etiraf etmişdir

Jirinovski həmin mitinqdə özünü siyasətçi kimi deyil, xalis təhrikçi kimi aparmışdır. Rusiya tarixində ibrətamiz təhrikçilik nümunəsi vardır. Lakin Liberal Demokrat Partiyasının sədrinin ənənə halını almış belə hərəkətləri, görünür onun beynindəki ziddiyyətlə əlaqədardır.

AzərTAc xəbər verir ki, bu fikirləri Yeni Azərbaycan Partiyasının sədr müavini - icra katibi, Milli Məclisin deputatı Əli Əhmədov Moskvada Ramil Səfərovun əfv edilməsinə etiraz olaraq erməni diasporunun təşkil etdiyi mitinqdə çıxış edən Rusiya Liberal Demokrat Partiyasının sədri Vladimir Jirinovskinin erməniləri azərbaycanlılara qarşı terror aksiyaları həyata keçirmək barədə çağırışına münasibət bildirərkən demişdir.

"Erməniləri azərbaycanlılara qarşı terror hərəkətlərinə səsləyən V.Jirinovski bununla əslində erməni terrorizmini etiraf etmişdir" - deyən Əli Əhmədov bildirmişdir ki, bir vaxtlar V.Jirinovski Səddam Hüseynin sarayından çıxmırdı.

Ə.Əhmədov demişdir: "Düşünmürəm ki, bu, Səddam Hüseynə sevgidən irəli gəlirdi. Xeyr, sadəcə olaraq Səddamın sarayında olanlar oradan yaxşı hədiyyələrlə geri dönürdülər. Səddamın axırına çıxdılar, Müəmmar Qəddafinin sarayına ayaq açdı. Motiv eyni idi. Səddamı da, Qəddafini də provokasiyalara çəkib məhvə apardı. V.Jirinovski onları da silahlanmağa, terrora əl atmağa çağırırdı. İndi erməniləri silahlanmağa, terror əməliyyatlarına səsləyir. Üzdə liberal-demokrat, batində provokator və terrorçu ideoloqun - Jirinovskinin mahiyyəti budur. Ancaq mən ermənilərə ehtiyatlı olmağı məsləhət görərdim. Jirinovskinin dostları Səddam Hüseyn və Mühəmmar Qəddafinin taleyini unutmasınlar. Bu provokator siyasətçi kiminlə dostluq edib, məsləhətlər veribsə, onun axırı yaxşı qurtarmayıb".

YAP-ın sədr müavini daha sonra qeyd etmişdir ki, V.Jirinovski heç də ermənilərə olan xoş münasibətindən onları terrorçuluğa səsləmir. "Qoy bir sual versinlər, zəngin iş adamı Ara Abramyanın mitinqdə iştirak etməməsi nədən V.Jirinovskinin kefinə soğan doğramışdır? Görünür, Jirinovski daha böyük qonorar alacağına ümid edirmiş, lakin zəngin iş adamının mitinqə qatılmaması onun istəyini gözündə qoymuşdur. Yəqin Ara Abramyan Vladimir Volfoviçin xasiyyətinə yaxşı bələddir. Jirinovski ilk dəfə deyildir ki, Azərbaycana və azərbaycanlılara qarşı hədyanalar danışır. Əlbəttə, bunun nə Azərbaycana, nə də azərbaycanlılara isti-soyuğu yoxdur. Lakin bütöv bir xalqın qəzəbini və nifrətini artıq qazanmışdır. Bu faktdır" - deyə Əli Əhmədov bildirmişdir.

Azərbaycan.-2012.- 18 sentyabr.- S.2.