«ASAN - xidmət» layihəsinin tətbiqi vətəndaşların dövlət qurumlarının xidmətindən daha səmərəli yararlanmasına imkan yaradacaq

Vətəndaşlara Xidmət və Sosial İnnovasiyalar üzrə Dövlət Agentliyi ölkə əhalisinə diqqət və qayğının bariz nümunəsidir

Son illər ölkəmizin iqtisadi gücü artdıqca, dövlət qurumları tərəfindən göstərilən xidmətləri vətəndaşlara daha yaxın etmək məqsədilə yeni-yeni idarəetmə və xidmət mərkəzləri yaradılır. Azərbaycan Prezidenti İlham Əliyevin 2012-ci il 5 sentyabr tarixli "Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin fəaliyyətinin təmin edilməsi haqqında" fərmanı buna bariz nümunədir.

Yaradılmış yeni qurum vasitəsi ilə vətəndaşlara xidmətlər daha keyfiyyətli, rahat, vahid məkandan və müasir innovasiyaları tətbiq etməklə təmin ediləcəkdir. Bu xidmətlər çərçivəsində vətəndaşlıq vəziyyəti aktlarının, doğumun, ölümün, nikahın, övladlığa götürmənin, atalığın müəyyən edilməsinin, adın, ata adının və soyadın dəyişdirilməsinin qeydə alınması, şəxsiyyət vəsiqələrinin verilməsi və dəyişdirilməsi, notariat fəaliyyəti, daşınmaz əmlakla bağlı əməliyyatların qeydiyyatı, gömrük rəsmiləşdirmələri üçün sənədlərin qəbulu və s. kimi ən müxtəlif məsələlər yer alır. İşlərin nümunəvi təşkili üçün agentliyin "ASAN - xidmət" mərkəzləri yaradılacaqdır. Yeni qurum əsasən Azərbaycanda son dövrlərdə dövlət idarələrində görülən işləri sistemləşdirməyə və genişləndirməyə xidmət edəcəkdir.

Dövlət idarəçiliyində yeni mərhələ olan bu agentliyin yaradılması mühüm islahat kimi qiymətləndirilir. Xatırladaq ki, Vətəndaşlara Xidmət və Sosial İnnovasiyalar üzrə Dövlət Agentliyinin zəruri işçi qüvvəsinin, texniki kommunikasiya və informasiya resurslarının formalaşmasında Ədliyyə Nazirliyi, Daxili İşlər Nazirliyi, Vergilər Nazirliyi, Maliyyə Nazirliyi, Rabitə və İnformasiya Texnologiyaları Nazirliyi, Əmlak Məsələləri Dövlət Komitəsi, Dövlət Gömrük Komitəsi, Dövlət Miqrasiya Xidməti, Dövlət Torpaq və Xəritəçəkmə Komitəsi, Dövlət Sosial Müdafiə Fondu, Milli Arxiv İdarəsi, Xüsusi Dövlət Mühafizə Xidməti birgə fəaliyyət göstərəcək. "ASAN - xidmət" mərkəzlərində çalışacaq işçilərin təyinatı zamanı isə bir çox zəruri keyfiyyətlər- nəzakətlilik, məsuliyyətlilik, peşəkarlıq, ünsiyyət qurmaq və izah etmək bacarığı əsas amillərdən hesab olunacaq.

"ASAN - xidmət" mərkəzlərinin yaradılması respublikada idarəetmə sistemində yeni mərhələnin başlanğıcıdır. Bu mərkəzlərdə vətəndaşlara ən müasir və rahat texnologiyalar əsasında vaxta və xərclərə qənaət etməklə yüksək keyfiyyətli xidmət göstəriləcək. Yeni xidmət sisteminin ən mühüm cəhəti ondan ibarətdir ki, burada əhaliyə xidmətin texniki tərəfləri ilə yanaşı, mənəvi cəhətləri, yəni, məmur-vətəndaş münasibətlərində nəzakətliliyə, iş prosesinin müsbət əhval-ruhiyyədə icrasına, vətəndaşların "ASAN - xidmət"dən xoş ovqatla ayrılmasına xüsusi diqqət yetiriləcəkdir.

Əhali tərəfindən böyük razılıqla qarşılanan Dövlət Agentliyinin fəaliyyətə başlaması insanların həyatına müəyyən dəyişikliklər gətirəcək, onların müsbət gözləntilərini cavablandıracaq və cəmiyyətdə vətəndaş məmnunluğu yaradacaqdır. Əhaliyə dövlət orqanları tərəfindən göstərilən bir sıra xidmətlər daha operativ və keyfiyyətli olacaq, onların ehtiyacları yüksək səviyyədə təmin ediləcəkdir. Bununla ictimaiyyət arasında dövlət orqanlarına etimad da artacaqdır.

Agentliyin əsas yükünü öz üzərinə götürən "ASAN - xidmət" mərkəzləri dövlət orqanları tərəfindən göstərilən xidmətlərin vahid və əlaqələndirilmiş formada həyata keçirilməsini təmin edəcəklər. Bu, vətəndaşların belə işlərə sərf etdikləri vaxt itkisini aradan qaldıracaqdır. Vətəndaş mərkəzə daxil olarkən məlumat köşkündən əldə etmək istədiyi sənəd üçün hansı şöbəyə və hansı sənədlərlə müraciət etməli olduğunu öyrənəcək. Daha sonra növbəsi çatdıqda xidmətin həyata keçirilməsi üçün tələb edilən sənədləri təqdim edərək əldə etmək istədiyini müəyyən olunmuş müddətdə götürəcəkdir. Mərkəzlərdə vətəndaşların məlumat əldə etməsini asanlaşdırmaq məqsədilə elektron lövhələr və işarələr yerləşdiriləcək və xidmətlər qeydiyyat yerindən asılı olmayaraq bütün vətəndaşlar üçün həyata keçiriləcəkdir. Mərkəzlər həftənin bütün günlərində açıq olacaq və vətəndaşlara fasiləsiz xidmət göstəriləcəkdir. Mərkəzlərdə vətəndaşların gözləməsi və vaxtını səmərəli keçirməsi üçün uşaq əyləncə mərkəzi, internet-kafe, bank, poçt şöbələri və s. olacaqdır. Mərkəzlərdə şəffaflığın təmin edilməsi üçün və əməkdaşların fəaliyyəti üzrə qiymətləndirmənin aparılması məqsədilə bütün zəruri tədbirlər nəzərdə tutulmuşdur.

Fərmana əsasən, "ASAN - xidmət" mərkəzlərində vətəndaşlıq vəziyyəti aktlarının dövlət qeydiyyatı, notariat fəaliyyəti, şəxsiyyət vəsiqələrinin, ümumvətəndaş pasportlarının verilməsi və dəyişdirilməsi, sürücülük vəsiqələrinin dəyişdirilməsi, məhkumluq barədə arayışların verilməsi, mənzillərin dövlət qeydiyyatı ilə bağlı təkrar çıxarışların və əhali arasında daha çox "forma 1" kimi tanınan əmlakın yüklülüyü barədə arayışların, o cümlədən torpaq kadastrı məlumatları barədə arayışların verilməsi, əmək pensiyalarının təyin edilməsi, kommersiya hüquqi şəxslərin və vergiödəyicilərinin qeydiyyatı, hüquqi və fiziki şəxslərə arxiv arayışlarının verilməsi kimi xidmətlər daxildir. Buraya həmçinin gömrük bəyannamələrinin, gömrük rəsmiləşdirilmələri üçün sənədlərin qəbulu, Azərbaycan Respublikasında müvəqqəti və daimi yaşamaq üçün icazə sənədlərinin verilməsi aiddir. Mərkəzlər həmçinin dövlət orqanlarının göstərdikləri bütün xidmətlər üzrə informasiya təminatını həyata keçirəcəkdir.

Xidmətlər vətəndaşın birbaşa müraciəti əsasında, özünəxidmət və çağırış xidməti formasında göstəriləcəkdir. Gələcəkdə isə səyyar xidmətlərin həyata keçirilməsi nəzərdə tutulur. Səyyar xidmətlər vasitəsilə vətəndaşların qanunla müəyyən edilmiş məbləğdə əlavə haqq ödəməklə öz iş və ya yaşayış yerini tərk etmədən xidmətlərdən yararlanması mümkün olacaqdır. Əlillər və sağlamlıq imkanları məhdud olan uşaqlar üçün səyyar xidmətlər pulsuz nəzərdə tutulubdur.

Bizim ölkə üçün yeni olan belə bir sosial innovasiyanın respublikamızda tətbiqi məqsədilə ən yaxşı beynəlxalq təcrübələr öyrənilmişdir. Qaydalar isə elə tərtib edilmişdir ki, vətəndaşlara göstərilən xidmətlər bütün cəhətlərdən asan olsun. Bu prosesdə Böyük Britaniya, Almaniya, Kanada, Rusiya, Avstraliya və sair ölkələrin təcrübəsi nəzərdən keçirilmişdir. Ölkəmizdə həyata keçirilməsinə hazırlaşdığımız "ASAN - xidmət" layihəsi xarici ölkələrdəkindən daha miqyaslı və əhatəlidir və daha çox dövlət qurumunun xidmətlərini özündə birləşdirəcəkdir.

Yeni xidmət sistemi vətəndaşların səmərələşdirmə və qeydiyyat işlərini sürətlə həyata keçirməsinə imkan verəcək. Prezident Administrasiyasının Hüquq-mühafizə orqanları ilə iş şöbəsinin müdiri Fuad Ələsgərov KİV-ə müsahibəsində bildirib: "ASAN - xidmət", ilk növbədə, dövlət qulluqçularının fəaliyyətində əhaliyə münasibətdə vətəndaş məmnunluğunun təmin edilməsinə xidmət edən yeni yanaşmanın formalaşdırılması deməkdir: "Bu, dövlət idarəçiliyinə özəl sektorda geniş yayılmış "müştəri məmnunluğu" ideyasının inkorporasiya edilməsidir və ölkədə dövlət qulluqçusu-vətəndaş münasibətlərinin keyfiyyətcə yeni müstəviyə keçməsinə təkan verəcəkdir".

Təbii ki, yaradılacaq yeni sistem dövlət orqanlarının fəaliyyətində, vətəndaşlara göstərilən xidmətdə qanunçuluq və şəffaflığı ən yüksək səviyyədə təmin etmək gücündədir. Bu isə dövlətin vətəndaşlarına göstərdiyi diqqət və qayğının daha bir bariz nümunəsidir.

Rəhman SALMANLI

Azərbaycan.-2012.- 18 sentyabr.- S.4.