Bakıda Üzeyir Hacıbəyli IV Beynəlxalq musiqi festivalının təntənəli açılış mərasimi olmuşdur

Sentyabrın 18-də Müslüm Maqomayev adına Azərbaycan Dövlət Filarmoniyasında Heydər Əliyev Fondunun və Mədəniyyət və Turizm Nazirliyinin təşkilatçılığı ilə keçirilən Üzeyir Hacıbəyli IV Beynəlxalq musiqi festivalının təntənəli açılış mərasimi olmuşdur.

AzərTAc xəbər verir ki, festivalın açılışından əvvəl jurnalistlərə müsahibə verən mədəniyyət və turizm naziri Əbülfəs Qarayev Üzeyir Hacıbəylini Tanrının Azərbaycan xalqına bəxş etdiyi misilsiz bir töhfə kimi səciyyələndirmişdir. Bildirmişdir ki, onun yaradıcı irsi təkcə öz xalqı üçün deyil, bütün bəşəriyyət üçün çox dəyərli mənəvi sərvətdir. Zaman keçdikcə Üzeyir sənəti dünya xalqları tərəfindən daha çox sevilir, onun əsərləri heç bir sərhəd tanımır. Dünyanın ən möhtəşəm teatrlarının səhnəsində bu əsərlər dönə-dönə tamaşaya qoyulur, ekranlaşdırılır, məşhur müğənnilər tərəfindən sevilə-sevilə ifa olunur. Üzeyir bəyin əsərləri milli olduğu qədər də bəşəridir.

Əbülfəs Qarayev diqqətə çatdırmışdır ki, Üzeyir Hacıbəyli IV Beynəlxalq musiqi festivalında Rusiya, Türkiyə, ABŞ, Fransa, Almaniya, İtaliyadan dünya şöhrətli musiqiçilər və kollektivlər iştirak edirlər.

Azərbaycan musiqisinin dünyada geniş şəkildə təbliğini yüksək qiymətləndirən nazir bildirmişdir ki, artıq hər il ölkəmizdə silsilə beynəlxalq tədbirlər keçirilir. Bu bizi olduqca sevindirir.

Festivalın açılış mərasimində Üzeyir Hacıbəyli adına Azərbaycan Dövlət Simfonik Orkestrinin ifasında geniş konsert proqramı təqdim edilmişdir. Orkestrə xalq artisti, professor Rauf Abdullayev dirijorluq etmişdir. Konsertin solisti fransalı violin ifaçısı Solenne Paidassi olmuşdur.

Azərbaycan Dövlət Xor Kapellasının da çıxış etdiyi konsertdə Ü.Hacıbəylinin "Koroğlu" operasından üvertüra, III akt və "Şeyx Sənan" operasından fraqmentlər, həmçinin S.Prokofyevin violin və orkestr üçün 2 saylı konsert səsləndirilmişdir. Festival sentyabrın 29-dək davam edəcəkdir.

Azərbaycan.-2012.- 19 sentyabr.- S.6.