Bakıda keçirilən «Neft, qaz və media» beynəlxalq konfransı başa çatmışdır

Sentyabrın 19-da Bakıda keçirilən "Neft, qaz və media" beynəlxalq konfransı başa çatmışdır.

AzərTAc xəbər verir ki, konfrans Beynəlxalq Mətbuat İnstitutu tərəfindən (BMİ) Azərbaycan Respublikası Dövlət Neft Şirkətinin (ARDNŞ) dəstəyi ilə keçirilmişdir.

Dünyanın 27 ölkəsindən 200-dən çox media nümayəndəsinin qatıldığı beynəlxalq konfransın məqsədi azad mediada neft və qazın rolunu müəyyənləşdirməkdən, neft-qaz sahəsində yazan jurnalistlərlə enerji tərəfdaşları arasında əlaqələri inkişaf etdirməkdən, enerji istehsalçısı olan dövlətlərin birgə səyi ilə mütərəqqi medianın inkişafını asanlaşdırmaqdan ibarət idi.

Beynəlxalq konfransın ikinci iş günündə BMİ-nin icraçı direktoru xanım Alison Betel MakKenzinin moderatorluğu ilə keçirilən sessiyada "Financial Times" qəzetinin reportyoru Tom Burgis, "New Vision"un jurnalisti Co Nem, Ukraynanın "Nida işarəsi" televiziyasının aparıcısı Artyom Şevçenko və "Azərpress" (Azərbaycan) agentliyinin baş redaktoru Aidə Sultanova məruzə ilə çıxış etmişlər.

Prezident Administrasiyasının İctimai-siyasi məsələlər şöbəsinin sektor müdiri Vüqar Əliyev çıxış edərək bildirmişdir ki, burada həm tədqiqatçılar, həm də jurnalistlər üçün çox dəyərli fikirlər səslənmişdir. Bu, jurnalistlərin gələcək fəaliyyətində onlara yardımçı ola bilər. "Neft heç vaxt hökumətlərin və ayrı-ayrı şirkətlərin sərvəti deyil. Bu, ümumilikdə xalqın sərvətidir və hər bir vətəndaşın rifahında öz ifadəsini tapmalıdır", - deyən V.Əliyev qeyd etmişdir ki, bunun üçün şəffaf sistem fəaliyyət göstərməlidir. Bu şəffaf sistemi də təmin edən ən güclü struktur jurnalistikadır. Hakimiyyətlərin də əsas vəzifəsi ondan ibarətdir ki, jurnalistlərə maksimum dərəcədə cəmiyyəti məlumatlandırmaq üçün imkan yaratsın. Bu, qanunlarla da ola bilər. Misal üçün, Azərbaycanda 2005-ci ildə informasiya əldə etmək haqqında qanun qəbul olunub və bu qanuna əsasən neft şirkətinin jurnalistikadan, cəmiyyətdən gizlədə biləcəyi, ya xidməti hesab edəcəyi heç bir məlumat yoxdur. Bütün məlumatlar verilməlidir, jurnalistlər də onu media vasitəsilə ictimaiyyətə çatdırmalıdır. Bundan başqa, 2000-ci illərin əvvəllərində Azərbaycanın 1 milyard dollar dövlət büdcəsi vardısa, bu gün 25 milyarddır. Bu gün Azərbaycanın 40 milyard dollardan artıq valyuta ehtiyatı vardır. Bu gün Azərbaycanda məhsul istehsalının 80 faizi qeyri-neft sektorunun payına düşür. Yəni Azərbaycan hakimiyyətinin prioriteti ondan ibarətdir ki, neftdən əldə olunan gəlir hesabına iqtisadiyyatın digər sektorlarını inkişaf etdirsin. Azərbaycanda infrastruktur tamamilə yenidən qurulur. Son 3 ildə Azərbaycanda 2 min 200 yeni məktəb tikilib, yüzlərlə poliklinika, xəstəxana, mədəniyyət ocaqları, abidələr, teatrlar, muzeylər inşa olunubdur. Azərbaycan Mədən Sənayesində Şəffaflıq Təşəbbüsünə də qoşulmuşdur. Azərbaycanın neftdən əldə olunan vəsaitinin toplandığı Dövlət Neft Fonduna həm vətəndaş cəmiyyəti, həm də beynəlxalq audit şirkətləri tərəfindən nəzarət olunur. Onun fəaliyyəti və hesabatları ilə sayt vasitəsilə tanış olmam mümkündür. Bir sözlə, jurnalistlərin normal fəaliyyət göstərmələri üçün ölkəmizdə bütün imkanlar vardır. Burada əsas məsələ isə jurnalistlərin məsuliyyətidir.

Sonrakı sessiyalarda isə "Azad Azərbaycan International" televiziya kanalının rəhbəri Azər Xəlilovun, Azərbaycan Respublikası Dövlət Neft Şirkətinin vitse-prezidenti Vitali Bəylərbəyovun, "İçərişəhər" Dövlət Tarix-Memarlıq Qoruğunun direktoru Mikayıl Cabbarovun, "Forbes" (ABŞ) jurnalının reportyoru Kaşmir Hillin, "Reuters" informasiya agentliyinin (Böyük Britaniya) müxbiri Tom Bergin, "OpenOil"un (Almaniya) araşdırmaçı əməkdaşı Zara Rahmanın iştirakı ilə maraqlı diskussiyalar aparılmışdır.

Sessiyalarda bildirilmişdir ki, Bakının yerləşdiyi Abşeron yarımadasında neft çıxarılmasının qədim tarixi vardır. XIX əsrin sonunda isə Bakının "Qara qızıl paytaxtı" kimi şöhrəti bütün dünyaya yayılmışdı. Sovet hakimiyyəti illərində də Azərbaycan ittifaq miqyasında ən çox neft hasil edən respublika idi.

Vurğulanmışdır ki, ulu öndər Heydər Əliyev yenidən hakimiyyətə qayıtdıqdan sonra onun təşəbbüsü ilə Azərbaycanda neft sənayesinin inkişafı istiqamətində tarixi əhəmiyyət daşıyan addımlar atılmışdır. Azərbaycanın iqtisadi müstəqilliyinin əsasını təşkil edən yeni neft strategiyasının uğurları ilbəil artır. Xalqımızın ümummilli lideri Heydər Əliyevin rəhbərliyi ilə işlənib hazırlanmış bu strategiyanın reallaşdırılmasından əldə olunan gəlirlər ölkəmizin maliyyə dayaqlarının getdikcə möhkəmlənməsinə səbəb olur. Bu da öz növbəsində, iqtisadiyyatın şaxələndirilməsinə, qeyri-neft sahələrinin inkişaf etdirilməsinə imkan yaradır.

Tədbirdə "Əsrin müqaviləsi"in imzalanmasından keçən müddət ərzində görülmüş işlər vurğulanmış, qeyd edilmişdir ki, yeni neft strategiyası hazırda Azərbaycan Prezidenti İlham Əliyev tərəfindən də uğurla davam etdirilir.

Tanınmış neft mütəxəssislərinin, alimlərin və media nümayəndələrinin iştirak etdikləri sessiyalarda, həmçinin şirkətlərin və hökumətlərin geniş ictimaiyyətlə hansı informasiyaları bölüşməli olmalarından, bu informasiyanın necə və nə zaman yayılmasının vacibliyindən, eləcə də bu istiqamətdə sosial medianın önəmindən ətraflı danışılmışdır.

Sessiyalarda iştirakçıları maraqlandıran suallar cavablandırılmış, Azərbaycanın neft və qaz sənayesi ilə bağlı həyata keçirilən və gələcəkdə reallaşdırılacaq yeni neft layihələri haqqında filmlər və slaydlar nümayiş olunmuşdur.

Bununla da beynəlxalq konfrans işini yekunlaşdırmışdır.

AzərTAc

Azərbaycan .-2012.- 20 sentyabr.- S.3.