Naxçıvanda Məmməd Səid Ordubadinin 140 illiyi ilə bağlı elmi konfrans keçirilib

Azərbaycan Respublikası Prezidenti "Məmməd Səid Ordubadinin 140 illik yubileyinin keçirilməsi haqqında" 10 aprel 2012-ci il tarixdə sərəncam imzalayıb. Həmin sərəncamda deyilir: "2012-ci ildə görkəmli Azərbaycan yazıçısı, şair, dramaturq, publisist və ictimai xadim Məmməd Səid Ordubadinin anadan olmasının 140 ili tamam olur.

Məmməd Səid Ordubadi Azərbaycan ədəbiyyatında tarixi roman janrının banisidir. Çoxşaxəli ədəbi fəaliyyət göstərən və bir çox məşhur operaların librettosunun müəllifi olan sənətkar həmçinin dövrün mühüm ictimai-siyasi hadisələrini zəngin faktlar, sənədlər əsasında dolğun əks etdirən əsərləri ilə tanınır".

Bu şəxsiyyətin ədəbi-bədii irsini, ictimai fəaliyyətini, publisistik görüşlərini bir daha nəzərə çatdırmaq məqsədilə Naxçıvan Muxtar Respublikası Ali Məclisinn Sədri tərəfindən təsdiq olunmuş tədbirlər planına əsasən, Naxçıvan Dövlət Universiteti, AMEA Naxçıvan Bölməsi və Naxçıvan Muxtar Respublikası Yazıçılar Birliyinin birgə təşkilatçılığı ilə "Məmməd Səid Ordubadi Azərbaycan tarixi roman məktəbinin banisi kimi" adlı elmi konfrans keçirilib.

AMEA Naxçıvan Bölməsində keçirilən konfransı giriş sözü ilə açan bölmənin sədri, Milli Məclisin deputatı, akademik İsmayıl Hacıyev ölkə başçısının ədəbiyyata, mədəniyyətə göstərdiyi diqqət və qayğıdan danışıb. İ.Hacıyev M.S.Ordubadinin 140 illik yubileyinin keçirilməsi haqqında olan sərəncamın da bu qayğının davamı olduğunu qeyd edib.

Naxçıvan Dövlət Universitetinin rektoru, akademik, Milli Məclisin deputatı İsa Həbibbəyli "Azərbaycanda tarixi roman məktəbinin banisi" mövzusunda geniş və məzmunlu çıxış edib. İ.Həbibbəyli M.S.Ordubadi irsinin çoxşaxəli yaradıcılıq diapazonuna malik olduğunu bildirib və əlavə edib ki, ədibin indiyədək nəşr olunan səkkiz cildliyindən başqa son illərdə arxivlərdən əldə edilmiş zəngin əlyazmalar hesabına daha səkkiz cildini də nəşr etmək olar. Belə ki, bu tapıntılar içərisində felyetonlar, dram əsərləri, romanlar vardır.

Ölkə başçısının imzaladığı sərəncamın Ordubadişünaslığın tədqiqi sahəsində yeni mərhələnin başlanğıcı kimi də əhəmiyyətli olduğunu qeyd edən akademik İsa Həbibbəyli bunun üçün gənc tədqiqatçıların Ordubadi irsinin araşdırılmasına yönəldilməsinin vacibliyinə diqqət çəkib.

Elmi konfransda Naxçıvan Muxtar Respublikası Yazıçılar Birliyinin sədri, şair Asim Yadigar "M.S.Ordubadinin şeir yaradıcılığı", AMEA Naxçıvan Bölməsinin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Amanoğlu "M.S.Ordubadi yaradıcılığında ədəbi dil məsələsi", həmin institutun əməkdaşları, filologiya üzrə fələsəfə doktoru Ramiz Qasımov "M.S.Ordubadinin həyat və yaradıcılığı", filologiya üzrə fələsəfə doktoru Rafiq Babayev "M.S.Ordubadi və Azərbaycan romançılıq ənənəsi", elmi işçi Əli Həşimov "M.S.Ordubadinin publisistik fəaliyyəti", sənətşünaslıq üzrə fəlsəfə doktoru Ələkbər Qasımov isə "M.S.Ordubadinin əsərləri Naxçıvan səhnəsində" mövzularında məruzə ilə çıxış ediblər.

Elxan MƏMMƏDOV

Azərbaycan.-2012.- 22 sentyabr.- S.6.