Mərakeşin «Əl-İslah və ət-Tənmiyə» qəzetində Azərbaycan ilə bağlı məqalə dərc edilmişdir

Mərakeşin nüfuzlu "Əl-İslah və ət-Tənmiyə" qəzetinin 21 sentyabr tarixli nömrəsində "İki ölkə arasında əməkdaşlığın perspektivləri geniş və müxtəlifdir. Bu perspektivləri müdrik siyasi iradə dəstəkləyir" sərlövhəli məqalə dərc edilmişdir.

Azərbaycanın Mərakeşdəki səfirliyindən AzərTAc-a bildirmişlər ki, yazıda İslam Əməkdaşlıq Təşkilatına (İƏT) üzv ölkələrin dövlət və hökumət başçılarının 1994-cü ilin dekabrında Kasablankada keçirilmiş zirvə toplantısı çərçivəsində xalqımızın ümummilli lideri Heydər Əliyevin Mərakeşin mərhum Kralı II Həsən ilə tarixi görüşündən bəhs edilmişdir. Vurğulanmışdır ki, qardaş ölkələr arasındakı əlaqələrin hazırkı yüksək səviyyəsi, Rabatda Azərbaycan səfirliyinin, Bakıda isə Mərakeş səfirliyinin fəaliyyət göstərməsi məhz həmin görüşün nəticəsidir. Ulu öndər Heydər Əliyevin və Kral II Həsənin təməlini qoyduqları ənənələr bu gün Prezident İlham Əliyev və Kral VI Məhəmməd tərəfindən uğurla davam etdirilir.

Məqalədə ölkələrimiz arasındakı diplomatik əlaqələrin qurulmasının 20-ci ildönümü ilə əlaqədar Azərbaycanın Mərakeş Krallığındakı müvəqqəti işlər vəkili İ.Əliyevin müsahibəsi də öz əksini tapmışdır.

Müsahibəsində iki ölkə arasında siyasi əlaqələrin yüksək səviyyəsini, beynəlxalq təşkilatlar, xüsusilə BMT və İslam Əməkdaşlıq Təşkilatı çərçivəsindəki uğurlu əməkdaşlığı diqqətə çatdıran müvəqqəti işlər vəkili Ermənistan-Azərbaycan, Dağlıq Qarabağ münaqişəsi barədə ətraflı məlumat vermişdir. Vurğulanmışdır ki, münaqişə nəticəsində torpaqlarımızın 20 faizi Ermənistan tərəfindən işğal edilmiş, bir milyondan artıq vətəndaşımız qaçqın və məcburi köçkün vəziyyətinə düşmüşdür. İşğal olunmuş ərazilərdə şəhər və kəndlər, məktəblər, məscidlər, qəbirlər, tarixi abidələr vəhşicəsinə dağıdılmış və yandırılmışdır. BMT, İƏT kimi beynəlxalq təşkilatların işğal altındakı torpaqlarımızın azad olunmasını tələb edən qətnamə və qərarlarına Ermənistan məhəl qoymur. Azərbaycan rəhbərliyinin Dağlıq Qarabağ münaqişəsinin həlli istiqamətində göstərdiyi səylərdən danışan diplomat ölkəmizin sülhsevər siyasət yeritdiyini, bütün münaqişələrin və problemlərin beynəlxalq hüququn normaları əsasında, dövlətlərin suverenliyinə və ərazi bütövlüyünə hörmət prinsiplərinə uyğun həllinə tərəfdar olduğunu diqqətə çatdırmışdır.

Yazıda respublikamızın, xüsusilə son on ildə əldə etdiyi böyük iqtisadi nailiyyətlərdən, o cümlədən "Bakı-Tbilisi-Ceyhan", "Bakı-Tbilisi-Ərzurum", "Bakı-Tbilisi-Qars" kimi nəhəng layihələrin əhəmiyyətindən söz açılmışdır. Ölkəmizin ərzaq təhlükəsizliyinin daxili ehtiyatlar hesabına təmin edildiyi, 2003-2011-ci illərdə ümumi daxili məhsulun 14 faiz artdığı, Avropanın enerji təhlükəsizliyinin təmin edilməsində mühüm rol oynadığı, xarici valyuta ehtiyatlarının 14 dəfə artaraq 35 milyard dollara çatdığı, hazırda Azərbaycanın qaz ehtiyatlarının 2,5 trilyon kubmetr həcmində qiymətləndirildiyi, 2015-ci ildə neft hasilatının 50-55 milyon tona, qaz istehsalının isə 30 milyard kubmetrə çatacağı, ölkədə yoxsulluğun səviyyəsinin 2003-cü ildəki 49 faizdən hazırda 7 faizə endiyi qeyd edilmişdir.

Vurğulanmışdır ki, Azərbaycan və Mərakeş iki ölkə arasında iqtisadi əməkdaşlığın siyasi əlaqələr səviyyəsinə yüksəldilməsində maraqlıdırlar.

Azərbaycan.-2012.- 23 sentyabr.- S. 2.