ASALA dünya azərbaycanlılarına qarşı terror təhdidlərini artırır

Beynəlxalq təşkilatlar isə susur

Bəşəriyyət üçün ən təhlükəli təhdidlərdən biri terrorizmdir. Dünyada terror aktlarının sayı sürətlə və hər yerdə durmadan artır. Bu "sənayenin" dünyada ən güclü istehsalçısı isə Ermənistandır. Terrorizm Ermənistan siyasətinin praktikasıdır. 100 ildən artıqdır ki, bu təcrübədən işğalçı ölkə istifadə edir. Günahsız insanları qana batırır. Bu gün erməni terrorizmi dünyanın sabitliyinə, inkişaf edən ölkələrin iqtisadiyyatına, müxtəlif qlobal layihələrə və dövlətlərin siyasətinə qarşı çevrilib. Onların hər biri xüsusi strukturlara, daimi və etibarlı maliyyə mənbələrinə, ən müasir silahlara malikdir. Hədəf isə türk dünyasıdır.

1984-cü ildə erməni terrorçusu Vartanovun Bakının mərkəzində sərnişin avtobusunu partlatması, Opera və Balet Teatrının yandırılması, metro faciəsi... sıralasaq, siyahı çox uzanar.

"9 iyun qrupu" (9 June Group) 1991-ci ildə yaradılmış və İsveçrədə fəaliyyət göstərməyə başlamışdır. Qrupun məqsədi həbs və məhkum olunmuş erməni terrorçuların müəyyən dövlətlərə qarşı terror aktları törətmək yolu ilə azadlığa buraxılmasına nail olmaq idi. "Erməni Müqavimət Təşkilatı" 1997-ci ildə Parisdə təsis edilib. Təşkilat fəaliyyətində sosialist ideologiyasını rəhbər tutur. "Azadlıq pələngləri" adlı terror təşkilatının üzvləri Qarabağda gedən döyüşlərdə yüzlərlə Azərbaycan vətəndaşının canına qıyıb. "Dağlıq Qarabağın İnqilabi İdarə Olunması Komitəsi" KRUNK 1987-ci ildə Xankəndidə qeyri-qanuni olaraq xarici erməni diasporunun iştirakı ilə yaradılmışdır. Təşkilatın üzvləri Dağlıq Qarabağda gedən əməliyyatlarda iştirak etmiş, azərbaycanlı əhalini qətlə yetirmişlər. Qanlı KRUNK-un sıralarında Yaxın Şərqdən, xüsusən, Suriyadan, Livandan olan muzdlular da döyüşürdülər. Təşkilatın rəhbəri keçmiş Stepanakert tikinti-inşaat materialları kombinatının direktoru Arkadi Manuçarov idi. Qurumun ideoloji bölməsinə isə şəhərdə fəaliyyət göstərən yunəyirmə fabrikinin partiya komitəsinin katibi, sonradan Ermənistanın prezidenti olmuş Robert Köçəryan rəhbərlik etmişdi. Hazırda təşkilat dünyanın bir çox ölkələrində Dağlıq Qarabağ münaqişəsinin tarixi və qondarma "erməni soyqırımı"na dair materialların yayılması ilə məşğul olan erməni mədəniyyət mərkəzi kimi fəaliyyət göstərir.

1970-ci illərin ortalarında daşnaklar bir sıra müstəqil terrorçu təşkilatlar yaratdılar. Onların arasında "Ermənistanın azadlığı uğrunda gizli erməni ordusu" ("Armenian Secret Army for the Liberation of Armenia" - ASALA) fəallığı ilə diqqəti cəlb edir. Təşkilat 1975-ci ilin yanvar ayında Livanın paytaxtı Beyrut şəhərində yaradılmışdır. Törətdiyi ilk terror aktı 1975-ci ilin yanvar ayında Beyrut şəhərində yerləşən Ümumdünya Kilsələr Şurası binasının partladılması olmuşdur. 1975-1982-ci illər ərzində ASALA əsas etibarilə türk diplomatlarına, təşkilatın üzvlərinin həbsdə saxlandığı ölkələrin vətəndaşlarına, habelə Qərb dövlətlərinin nümayəndəliklərinə, o cümlədən KLM, LUFTHANSA, TWA şirkətlərinin ofislərinə qarşı hücumlar təşkil etmişdir. ASALA Livan, Türkiyə, ABŞ, (Los-Anceles şəhərində hava limanını partlatmaq cəhdi), Fransa (Türkiyə səfirlərinin qətli), Yunanıstan, İsveçrə, İspaniya, Avstriya, (Türkiyə səfirlərinin qətli), Böyük Britaniya (Türkiyə aviaşirkətinin Londondakı ofisində partlayışı), İtaliya, İran, Macarıstan və digər ölkələrdə 200-dən artıq terror aktı törətmişdir ki, bunların da nəticəsində 52 nəfəri türk mənşəli olmaqla 100-dək şəxs qətlə yetirilmiş, 500-dən artıq insan yaralanmışdır. "Hnçaq" və "Daşnaksütyun" partiyalarının XIX əsrin sonlarından başlayaraq başqa xalqlara, xüsusilə, türk soyundan olan millətlərə qarşı törətdiyi qanlı cinayətlər öz coğrafi əhatəsinə və qəddarlıq dərəcəsinə görə tarixdə bu qəbildən hadisələr sırasında xüsusi yer tutur.

Qafqaz terrorçular üçün dünyada ən "münbit" yerlərdən biridir. Birinci ona görə ki, Qafqaz dünyanın iri dövlətlərinin geosiyasi maraqlarının kəsişmə mərkəzidir. Avropa və Asiyanın qovuşuğunda - Qara dəniz və Xəzər dənizi arasında yerləşməsi Qafqazı dünya geosiyasətinin mərkəzlərindən biri etmişdir. Bir tərəfdən də etnik münaqişələr - Abxaziya, Çeçenistan, Dağlıq Qarabağ münaqişələri. Bu səbəblərdən son illər Cənubi Qafqaz erməni terrorçularının aktiv fəaliyyət regionlarından birinə çevrilmişdir. Ermənistanın Dağlıq Qarabağın azərbaycanlı əhalisinə qarşı törətdiyi terror cinayətləri 1989-1994-cü illərdə həddini aşmış, terrorçular insanlıq həddindən çıxmışlar. Bu qaniçənlər bir neçə ildə bölgədə 29 terror aktı törətmiş, 2 mülki helikopter, 2 təyyarə vurmuşlar. Onların başlıca hədəfi ictimai nəqliyyat - metro, avtobus, təyyarə, körpülər, xarici ölkələrdəki diplomatik nümayəndəliklər, eləcə də dinc əhalinin sıx toplaşdığı yerlər olmuşdur. Ermənistanın Azərbaycanı sürüklədiyi müharibədə Ermənistan tərəfdən vuruşan müxtəlif beynəlxalq terror təşkilatlarına məxsus onlarca silahlı məhv edilmişdi.

Günümüzün sərt reallığı budur - müxtəlif terrorçu qruplaşmalar arasında əlaqələr sıxlaşır və erməni terrorunun coğrafiyası genişlənir. Qarabağda azərbaycanlı əhaliyə qarşı törədilən qırğınlarda xüsusi rolu olmuş, Yaxın Şərqdən olan Əbu Əli və Gilbert Minasyanın adları çəkilir. Həmin terrorçular Dağlıq Qarabağ münaqişəsinin nizamlanmasında Ermənistanın maraqlarına zidd mövqe tutacaqları təqdirdə rəsmi Ankaranı, eləcə də beynəlxalq neft şirkətlərini terror aksiyaları ilə hədələmişdilər. Azərbaycan və Türkiyə əleyhinə yönəltdiyi təcavüzkar siyasəti nəticəsində Ermənistan regionun bir çox iri layihələrindən, o cümlədən BTC layihəsindən kənarda qalmışdır. Azərbaycan və türk xalqlarına olan düşmənçilik zəminində hər zaman erməni terror təşkilatları tərəfindən BTC-yə terror aksiyası törədilməsi təhlükəsi mövcuddur.

2005-ci ilin əvvəllərində Qazaxıstanın Milli Təhlükəsizlik Komitəsinin sədri Nartay Dutbayev Bakıda səfərdə olarkən bildirmişdir ki, "Əl-Qaidə" terrorçu təşkilatı ilə əlaqələri olan erməni terrorçu qruplaşmaları Xəzər dənizinin mədənlərində və regionun neft borularında bir sıra terror aktları törətmək niyyətindədirlər. Rəsmi Bakı bir an belə sayıqlığını itirmədən bütün təhlükələrin qarşısını əvvəlcədən aldı və terrorçulara iyrənc niyyətlərini həyata keçirməyə imkan vermədi. Məhz ona görə də BTC neft kəmərinin təhlükəsizliyi ən vacib məsələ kimi hər zaman dünyanın diqqətindədir.

Ölkəmiz beynəlxalq terrorizmlə mübarizədə öndə gedən ölkələrdən biridir və Beynəlxalq Antiterror Alyansının üzvüdür. Azərbaycan hər vasitə ilə dünyanın diqqətini Qafqazdakı terror hadisəsinə cəlb etməyə çalışsa da, dünya birliyi, beynəlxalq təşkilatlar hələ ki bu problemin ciddiyyətini anlamır. Terrorizm Qafqazda qlobal layihələrin dinamik inkişafına mane olur. Qafqazda elə obyektlər var ki, orada terror aktının törədilməsi bütün regiona böyük fəlakətlər gətirər. Nə yazıq ki, terrorizm durmadan genişlənir və qlobal mahiyyətini artırır. Bax, bu, dünyanı narahat etməlidir.

Azərbaycan Respublikası Müdafiə Nazirliyinin zabiti, Macarıstanda ömürlük həbs cəzasına məhkum olunmuş Ramil Səfərovun 31 avqust 2012-ci il tarixdə ölkəmizə ekstradisiya edilməsi və Azərbaycan Respublikasının Prezidenti tərəfindən əfv olunması Ermənistanda ictimai-siyasi vəziyyətin gərginləşdirilməsinə və beynəlxalq aləmdə antiazərbaycan meyillərinin güclənməsinə səbəb oldu. Bu məsələni siyasi manipulyasiya obyektinə çevirməklə dünya ictimaiyyətində fərqli rəy yaratmağa çalışan ermənilər şantaj və təhdid dolu bəyanatlar, terror təhdidləri səsləndirməkdən çəkinmirlər. Lakin aksiyaya qarşı reaksiya çox güclü olacaq. Azərbaycan ictimaiyyəti Ermənistanın terror niyyətlərini gözündə qoyacaq. Çünki bugünkü Azərbaycan nə XX əsrin əvvəllərindəki, nə də sonundakı Azərbaycandır. Amma bütün dünya, beynəlxalq təşkilatlar erməni terrorizminə qarşı qətiyyətli mübarizəyə qalxmalıdırlar. Çünki bu, bəşəriyyətin təhlükəsizliyi məsələsidir.

Rəsmiyyə RZALI

Azərbaycan.-2012.- 23 sentyabr.- S. 5.