Rumıniya mətbuatı Ramil Səfərovla bağlı erməni hay-küyünü tənqid edir

Rumıniyanın aparıcı və ən çox tirajla satılan "Romania Libera" qəzetinin 21 sentyabr tarixli nömrəsində azərbaycanlı zabit Ramil Səfərovun verilməsi və əfv olunması ilə bağlı Ermənistan dövlətinin və erməni diasporunun yaratdığı süni ajiotaj və əsassız iddialarından bəhs edən geniş məqalə dərc edilmişdir. Məqalə "Azərbaycanlı zabit Ramil Səfərovun verilməsi ilə bağlı əsassız iddialar" adlanır.

Məqalədə bildirilir ki, Ramil Səfərovun verilməsi və əfvindən sonra Ermənistan dövləti və diasporu çılğınlaşmışdır. Birtərəfli təbliğatdan yararlanan xarici mətbu orqanlar hadisəni əsl faciəyə çevirərək eyni məzmunlu yazıları ilə oxucuları bezdirmişdir. Təəssüf ki, bu hal məsələni ədalətli şəkildə təhlil etmədən hadisələri öz mənafeləri və maraqları əsasında yozan müasir dünya siyasətçilərinin acınacaqlı "keyfiyyətləri"ndən biridir. Bu günlərdə "erməni məsələsi" və ya qondarma "soyqırımı"nın tanınması bir çox siyasətçilərin seçkilər vaxtı səs toplaması üçün "hava jileti" kimi istifadə olunur. Siyasətçilər dünyaya yayılan erməni diasporunun uydurduqları yalanların rənginə belə baxmırlar. Görünür yalanlar illərlə və dəfələrlə təkrar olunduqca müəyyən müddətdən sonra həmin yalanı uyduranlar üçün də həqiqət kimi qəbul edilir.

Daha sonra müəllif Ermənistan ordusunun zabiti Qurgen Marqaryanın qətl məsələsini "qorxu filmi" kimi təqdim edənlərə səslənərək hadisənin gizlədilən motiv və məqamlarını açıqlayır. Qeyd edilir ki, Ramil Səfərova qeyri-insani adları yaraşdıranlar bilməlidirlər ki, Qurgen Marqaryanın qətli heç də əvvəlcədən düşünülmüş akt deyildir. Məlumdur ki, hər hansı bir dövlətin atributlarına, bayrağına sataşmaq həmin ölkənin vətəndaşı tərəfindən təhqir kimi qəbul olunur. Qurgen Marqaryan Azərbaycan bayrağını davamlı olaraq təhqir etməklə, Azərbaycan xalqını alçaldan sözlər işlətməklə Ramil Səfərovu bu addımı atmağa təhrik etmişdir. Digər tərəfdən Ramil Səfərov kiçik yaşlarında ermənilərin Azərbaycan torpaqlarının işğalını yaşamış, erməni ordusunun günahsız insanlara qarşı vəhşi rəftarının canlı şahidi olmuş şəxs kimi hazırda erməni tapdağı altında olan Azərbaycanın Cəbrayıl rayonundan məcburi köçkün düşmüş ailənin üzvüdür. O, indiyə qədər həmin hadisələri unuda bilmir. Ramil Səfərov işğal olunmuş Dağlıq Qarabağ və ətrafındakı 7 rayondan məcburi köçkün düşmüş 800 min qurbandan biridir.

R.Səfərovun verilməsinin beynəlxalq konvensiyalara zidd olması ilə bağlı ittihamların gülünc olduğuna diqqət çəkərək müəllif iddia edilən qanun pozuntusu ilə NATO və Avropa İttifaqının üzvü olan Macarıstanın öz nüfuzunu heç vaxt riskə salmasının inandırıcı olmadığını bildirmişdir. Ramil Səfərovun əfvi ilə bağlı ittihamları isə absurd adlandıran müəllif Azərbaycan Respublikası Prezidenti İlham Əliyevin Konstitusiya ilə nəzərdə tutulan müstəsna hüquqlarından istifadə etdiyini vurğulamışdır.

Məqalədə qeyd olunur ki, Norveçdə bir gün içində 77 insanı qətlə yetirən və haqqında 21 il həbs qətimkan tədbiri seçilən Anders Breyviklə müqayisədə Ramil Səfərov Macarıstanda 9 ilə yaxın müddət həbs həyatında öz cəzasını kifayət qədər çəkmişdir.

Müəllif ermənilərin bu cür iddialarla öz düşmən təbiətlərini üzə çıxardıqlarını yazır. Daha sonra məqalədə 1983-cü ildə Parisin Orli hava limanında Türk Hava Yollarının ofisində 8 nəfərin ölümü ilə nəticələnən erməni terror təşkilatı ASALA-nın üzvü Varujan Qarabedyanın Ermənistana verilməsi zamanı hələ Yerevana ayaq basmadan o vaxt prezident Robert Koçaryan tərəfindən əfv edilməsinə toxunulur. Ramil Səfərovu terrorçu ilə müqayisə etməyin doğru olmadığını bildirən müəllif Ermənistan rəhbərliyinin Varujan Qarabedyanla bağlı "mərhəmətli" addımına dünya ictimaiyyəti tərəfindən heç bir etirazın edilmədiyini vurğulamışdır.

Məqalədə göstərilir ki, erməni qatillərinin cəzasızlığı bu gün Azərbaycan xalqını üzən başlıca amillərdən biridir. Dünya ictimaiyyəti Azərbaycanın günahsız insanlarına qarşı qanlı qırğınlar törətmiş militant ermənilərin hazırda yüksək dövlət postlarında xidmət etməsinə göz yumur. Ermənistan prezidenti Serj Sarkisyanın ingilis yazıçısı və eksperti Varujan Qarabedyana azərbaycanlıların soyqırımı ilə bağlı verdiyi müsahibəsindən sitat gətirərək müəllif Xocalıda erməni vəhşilikləri haqqında ətraflı məlumat vermişdir.

Qeyd olunur ki, Azərbaycanı narahat edən əsas məqamlar təkcə 1991-1994-cü illər ərzində Dağlıq Qarabağ da daxil olmaqla işğal edilmiş Azərbaycan torpaqlarında azərbaycanlılara qarşı kütləvi qırğın törətmiş şəxslərin Ermənistan dövləti tərəfindən himayə olunması faktı ilə məhdudlaşmır. Bu günlərdə Ermənistanın qızışdırdığı erməni terror təşkilatı ASALA Azərbaycanın xaricdəki diplomatik nümayəndəliklərinə iki dəfə təhdid məktubu göndərmişdir. Məqalədə ASALA-nın türk diplomatlarına qarşı terror aktlarından bəhs edilir.

Sonda müəllif Ramil Səfərovun verilməsi ilə bağlı Azərbaycanı günahlandıran və düşmənçilik yayan Ermənistana sadə hadisələri yozmaqla beynəlxalq ictimaiyyətdə çaşqınlıq yaratmamağı və özünü aldatmamağı tövsiyə edir. Eyni zamanda, vurğulanır ki, Ermənistan regionda sülhün açarı olan və uzun müddətdən bəri xalqların yaxınlaşması və barışına fayda gətirməyən gərginliyin yaradılmasından əl çəkməlidir.

Azərbaycan.-2012.- 23 sentyabr.- S. 5.