Azərbaycan və Avstriya arasında fövqəladə halların aradan qaldırılması sahəsində əməkdaşlıq imkanları müzakirə edilmişdir

Sentyabrın 17-18-də Azərbaycanın fövqəladə hallar naziri, general-polkovnik Kəmaləddin Heydərovun başçılıq etdiyi nümayəndə heyəti Avstriyada səfərdə olmuşdur.

Səfərin ilk günü nümayəndə heyəti qərargahı Vyanada yerləşən Beynəlxalq Atom Enerjisi Agentliyin (BAEA) Baş Konfransının 56-cı sessiyasında iştirak etmiş, bir sıra görüşlər keçirmişdir.

Səfərin ikinci günü Avstriya tərəfi ilə ikitərəfli görüşlərə həsr olunmuşdur. Əvvəlcə nümayəndə heyəti Avstriya Federal Daxili İşlər Nazirliyinin Əməliyyat və Böhran Koordinasiyası Mərkəzi ilə tanış olmuşdur. Qeyd edilmişdir ki, mərkəz ölkə ərazisində və xaricdə baş verən təbii və texnogen fəlakətlər, genişmiqyaslı qəza və digər fövqəladə halların qarşısının alınması üçün bütün müvafiq qurumların bir mərkəzdən idarə olunmasını təmin edən struktur kimi 2006-cı ildə yaradılmışdır. Təqdimat zamanı mərkəzin fəaliyyəti, iş rejiminin təşkili, əhatə etdiyi sahələr, strukturları, əhalinin fövqəladə hadisələr barədə məlumatlandırılması metodları haqqında məlumat verilmişdir.

Sonra fövqəladə hallar naziri və Avstriyanın federal daxili işlər naziri xanım Yohanna Mikl-Laytner arasında ikitərəfli görüş keçirilmişdir. Görüşdə hər iki nazirlik, onların eyni təyinatlı strukturları barədə məlumat verilmiş, nazirliklər arasında imzalanması nəzərdə tutulan fövqəladə vəziyyət zamanı qarşılıqlı yardım haqqında saziş üzərində işin yekunlaşdırılması və qarşılıqlı maraq doğuran digər məsələlər ətrafında fikir mübadiləsi aparılmışdır. Tərəflər ərazi və əhalicə oxşar xüsusiyyətlərə malik Azərbaycan və Avstriya arasında fövqəladə halların aradan qaldırılması sahəsində səmərəli əməkdaşlıq üçün böyük potensial olduğuna əminlik ifadə etmişlər. Görüşün sonunda nazir K.Heydərov xanım nazir Y.Mikl-Laytneri Azərbaycana səfərə dəvət etmişdir.

Həmin gün nümayəndə heyəti Avstriya Daxili İşlər Nazirliyinin Federal Təhlükəsizlik Akademiyasında polis və mülki müdafiə mütəxəssislərinin hazırlanması prosesi ilə yaxından tanış olmuşdur. Görüşdə akademiyanın nəzdindəki fakültə və tədris mərkəzləri, nüvə şüalanması xəbərdarlığı, bioloji və kimyəvi təhlükəli maddələr, mülki müdafiə kurslarının təşkili barədə məlumat verilmiş, gələcəkdə bu təhsil ocağı ilə Fövqəladə Hallar Nazirliyinin Akademiyası arasında əməkdaşlıq imkanlarına dair fikir mübadiləsi aparılmışdır.

Vyana Peşəkar Yanğından Mühafizə Briqadasında keçirilən görüşdə nümayəndə heyətinə bu şəhərdə yanğından mühafizə xidmətinin təşkili, istifadə olunan texniki vasitələr, yanğınsöndürmə maşınları və vasitələri, qurğular və maddi-texniki baza haqqında ətraflı məlumat verilmişdir.

Sentyabrın 18-də fövqəladə hallar naziri, general-polkovnik Kəmaləddin Heydərovun Avstriyaya səfəri başa çatmışdır. Azərbaycanın Avstriyadakı səfiri Qalib İsrafilov görüşlərdə iştirak etmişdir.

Elgün NİFTƏLİYEV,

AzərTAc-ın xüsusi müxbiri

Vyana

Azərbaycan.- 2012.- 20 sentyabr.-S.4.