«Teleqraf» qəzeti Ətraf Mühitin Mühafizəsi üzrə Beynəlxalq Dialoq Kampaniyasının həyata keçirdiyi foto müsabiqəsinə geniş yer vermişdir

Böyük Britaniyanın nüfuzlu "Teleqraf" qəzeti Ətraf Mühitin Mühafizəsi üzrə Beynəlxalq Dialoq Kampaniyasının (IDEA) təşəbbüsü və fotoqraf Reza ilə əməkdaşlıq çərçivəsində həyata keçirilən "Yer kürəsi uşaqların gözü ilə - 2012" beynəlxalq foto müsabiqəsinə geniş yer vermişdir.

AzərTAc xəbər verir ki, qəzet dünyanın müxtəlif ölkələrindən minlərlə gənc fotoqrafın çəkdikləri fotoları "Yer kürəsi uşaqların gözü ilə - 2012" müsabiqəsinə təqdim etdiklərini bildirmişdir. "Sənin seçimin" onlayn ictimai səsvermə resursunun açılması indi ictimaiyyətə bu fotolara səs vermək imkanı yaratmışdır.

Qəzet yazır ki, müsabiqənin əsas məqsədi ətraf mühit məsələləri ilə bağlı maarifləndirmənin səviyyəsini artırmaqdır. Bu layihə ilə 17 və ondan aşağı yaşdakı uşaqlar "Mən təbiəti sevirəm" və "Mən çirklənmədən qorxuram" mövzularında fotolar çəkməyə həvəsləndirilmişlər.

Məqalədə beynəlxalq foto müsabiqəsinin rəsmi veb-səhifəsi - http://childrenseyesonearth.org/contest/biz-kimik - ambassadors#ambassadors yerləşdirilmiş və bildirilmişdir ki, ictimaiyyət sentyabrın 25-dək bu sayta daxil olmaqla seçilmiş 50 foto arasından qalibi müəyyən etmək üçün səs vermək imkanı əldə edir. Ən çox səs qazanan foto "Sənin seçimin" mükafatına layiq görüləcəkdir.

"Yer kürəsi uşaqların gözü ilə - 2012" beynəlxalq foto müsabiqəsinin rəsmi veb-səhifəsi 7 dildə - Azərbaycan, ingilis, fransız, rus, italyan, fars, portuqal dillərində fəaliyyət göstərir. Müsabiqəyə təqdim olunmuş fotolardan münsiflər heyəti tərəfindən müəyyənləşdirilən 50 şəkil səsverməyə çıxarılmışdır.

Səhifədə "Yer kürəsi uşaqların gözü ilə - 2012" Beynəlxalq foto müsabiqəsinin IDEA-nın təşəbbüsü və fotoqraf Reza ilə əməkdaşlıq çərçivəsində həyata keçirildiyi qeyd olunmuşdur. Layihə Azərbaycan Respublikası Gənclər və İdman Nazirliyi, Dünya Fotoqrafçılıq Təşkilatı (WPO), Böyük Britaniyanın "National Geographic" uşaq jurnalı, SDN, FotoEvidence, Webistan Foto Agentliyi və Ainaworld qeyri-hökumət təşkilatı tərəfindən dəstəklənir.

Saytda http://childrenseyesonearth.org/contest/az/-biz-kimik - ambassadors#ambassadors müsabiqənin təşəbbüsçüsü, IDEA-nın təsisçisi Leyla xanım Əliyeva haqqında ətraflı məlumat verilmişdir. Qeyd olunmuşdur ki, Leyla xanım Əliyeva gənclərlə iş əsnasında Şərqi Avropada yaşayan və təhsil alan Azərbaycan gənclərini narahat edən əsas qayğılardan birinin ətraf mühit olduğunu aydın görürdü. Azərbaycanda və Şimali Qafqazda yaşayan hər bir uşaq on bir iqlim qurşağından doqquzuna sahib olan regionda böyüməkləri ilə fəxr duyur.

Bildirilmişdir ki, IDEA gənclərlə ətraf mühitlə bağlı maarifləndirici işlərin aparılmasına, daimi fəaliyyətin təmin olunmasına, ekologiya problemlərinin ailənin, cəmiyyətin və milli həyatın tam ortasına çəkilməsinə xidmət edən kampaniyadır. Hazırda Azərbaycanda hakimiyyətin ətraf mühitin qorunması məqsədi ilə həyata keçirilən proqramlar əsasən sənaye təmizlənməsi, güclü Milli Park layihəsi, kütləvi ağac əkilməsi və sərf olunan enerjinin bərpası ilə bağlıdır.

Səhifədə həmçinin Leyla xanım Əliyevanın aşağıdakı sözləri əksini tapmışdır: "Dünya gənclərinin ətraf mühitə diqqəti və qayğısı artmaqdadır. Bizi həyatla təmin edən ətraf mühit ilə harmoniyada yaşaya biləcəyimiz gələcəyi qurmaq bizim öz əllərimizdədir".

Bundan başqa, veb-səhifədə "Yer kürəsi uşaqların gözü ilə - 2012" Beynəlxalq foto müsabiqəsinin komandasının digər üzvləri - məşhur fotoqraf Reza, layihənin baş redaktoru Lauren Jarvis, sosial media meneceri Emili Edvards, layihə meneceri Lidiya Norel, eləcə də dünyanın məşhur fotoqraflarından ibarət beynəlxalq münsiflər heyəti və Məsləhət Şurası haqqında da ətraflı məlumat verilmişdir.

Azərbaycan.-2012.- 21 sentyabr.- S.6.