Azərbaycanda «Türkiyə həftəsi» keçirilir

Azərbaycan Respublikasının Prezidenti yanında Strateji Araşdırmalar Mərkəzinin (SAM) təşkilatçılığı ilə ölkəmizdə "Türkiyə həftəsi" keçirilir.

SAM-dan AzərTAc-a bildirmişlər ki, sentyabrın 28-dək davam edəcək həftə çərçivəsində Azərbaycanın və Türkiyənin beyin mərkəzlərinin nümayəndələri, deputatlar, nüfuzlu universitetlərin müəllimləri və mətbuat təmsilçilərindən ibarət nümayəndə heyəti Gəncədə, Lənkəranda və Ağdamda səfərdə olacaqdır.

SAM-ın direktoru Fərhad Məmmədov demişdir ki, nümayəndə heyəti Gəncə və Lənkəran dövlət universitetlərinin rəhbərliyi və tələbələri ilə görüşlər keçirəcəklər.

Görüşlərdə "Tarixdən günümüzə: Türkiyə-Azərbaycan münasibətləri" və "Azərbaycan-Türkiyə münasibətləri regional kontekstdə" mövzularında müzakirələrin aparılması nəzərdə tutulur. Müzakirələrdən əsas məqsəd Türkiyə-Azərbaycan münasibətlərinin inkişafına dəstək vermək, qarşılıqlı olaraq Azərbaycan və türk ictimaiyyətini bu istiqamətdə məlumatlandırmaqdır.

Sentyabrın 26-da isə SAM-da Azərbaycanda "Türkiyə həftəsi"nin yekunlarına dair mətbuat konfransı keçiriləcəkdir.

Ötən ilin oktyabrında SAM Türkiyənin beş səhərində "Azərbaycan həftəsi" keçirmişdi.

Azərbaycan.-2012.- 25 sentyabr.- S. 7.